သမုဒယသစ္စာ၏ အာယူဟနဋ္ဌအနက်
တဏှာ=သမုဒယသစ္စာက အာယူဟနဋ္ဌ အနက်သဘောရှိတယ်လို့ ဘုရားကဟောထားတယ်။ အာယူဟနဋ္ဌဆိုတာ ဒုက္ခ၀တ္ထု ဒုက္ခမှုတွေကို စုဆောင်း ဆည်းပူးတတ်တဲ့သဘောပဲ။ ဒီ နှစ်ခုကို သူက ရွက်ဆောင်တတ်တယ်။ ရွက်ဆောင်တတ်တဲ့ ကိစ္စရှိတယ်။ သူက ဒုက္ခ၀တ္ထုတွေကို အိမ်သို့ သယ်ပို့ပေးမယ်။ ဒုက္ခမှုတွေကိုလည်း ဘယ်တော့မှ မပြတ်ရအောင်လုပ်ပေးမယ်။ မင်းတို့ အိမ်မှာ ထိုင်နေလို့လဲမရအောင် ငါလုပ်ပေးမယ်။ ဒုက္ခမှု ဟူသရွေ့ မင်းအလုပ်နဲ့လက်နဲ့ မပြတ်ရအောင် မင်း သေတာ၊ မသေတာ အပထား၊ ဒုက္ခမှုနဲ့တော့ မင်းနဲ့မခွဲရအောင် ငါလုပ်ပေးမယ်တဲ့၊ သူက။ အံမယ်လေး စေတနာကောင်းလိုက်တဲ့ဖြစ်ခြင်း။ ဒုက္ခ၀တ္ထုတော့ အိမ်တိုင်ယာရောက် ငါပို့ပေးမယ်၊ အိမ်ကရှိတာတွေဟာ မင်း ပစ္စည်းတွေချည်းပဲ၊ မင်းစောင့်ရှောက်၊ ဒါတွေမီးမလောင်အောင်၊ ချမစားရအောင် မင်းပဲ နေ့တိုင်းကြည့်၊ ဒီလိုချည်းခိုင်းနေမှာပဲ။ အိမ်ထဲက ဒုက္ခ၀တ္ထု ဒုက္ခမှုတွေ အိမ်ပြင်မှာရှိတဲ့ အမှုကိစ္စကြီးငယ်တွေကို မင်း မအားလပ်ရအောင်လုပ်။ အိမ်လဲမအားရအောင်၊ ဈေးလဲမအားရအောင်လုပ်ပေးမယ်တဲ့။ဈေးထဲမှာ ထမင်းမစားဟင်းမစားနဲ့ လုပ်ရပြီးအိမ်ကျတော့နားလိုက်မဟဆိုပေမယ့် အိမ်မှုကိစ္စတွေလဲ မအားအောင် လုပ်နေတာပဲ။ အိမ်ထဲလဲ မနေနိုင်အောင်၊ အိမ်ထဲနေတော့လဲ မအားမနားရအောင် ဒုက္ခ၀တ္ထု ဒုက္ခမှုတွေပေးမယ်တဲ့၊ သူက။
ဒီတော့ တဏှာလောဘဟာ ဂြိုလ်ပဲဟေ့။ ဂြိုလ်ဆိုးပဲ။ မင်းဒုက္ခရောက်ဖို့ ဒုက္ခ၀တ္ထုတွေကို သူသယ်ပေးမယ်။ အိမ်ရောက်လို့ရှိရင် ဒီပစ္စည်းတွေကို ရေတွက်မှုနဲ့ မအားရအောင် လုပ်ပေးမယ်-တဲ့၊ ဒီပစ္စည်းက အိမ်သယ်ရမှာ၊ ဒီပစ္စည်းက ဒီမှာထားရမှာ။ ပြင်ဘက်ကဒုက္ခမှုတွေကိုလဲ ပေးမယ်၊ ဟို မိတ်ဆွေ ဒီမိတ်ဆွေတွေနဲ့ ဆက်သွယ်၊ ပေါင်းသင်းတန် ပေါင်းသင်း၊ ပေးတန်ပေး ကျွေးတန်ကျွေး၊ ဒီလိုဒုက္ခမှုတွေကိုလဲ မအားရအောင် တဏှာကလုပ်ပေးတယ်။ အိမ်မှာ မအားရအောင် ဒီပစ္စည်းတွေနဲ့ ချိန်ရတွယ်ရ မှတ်ရ စာရင်းချုပ်ရတာတွေလဲ တဏှာ=သမုဒယရဲ့သတ္တိပဲ။ အိမ်ထဲမှာ မအားရသလို အိမ်ပြင်ထွက်တော့လည်း ပြင်ဘက်အမှုတွေနဲ့ ဘယ်တော့မှ မပြတ်အောင်လွှဲပေးတာပဲ။ တဏှာက။
တဏှာအကြောင်း ကောင်းကောင်း ထိုးထွင်း၍ သိရင် မင်းတို့ နိဗ္ဗာန်ရောက်မယ်တဲ့၊ ဘုရားက သုတ္တနိပါတ်မှာ ဟောထားတယ်။ တဏှာအကြောင်း ကောင်းကောင်းမသိရင် တဏှာအဖေါ်လုပ်ရင် သံသရာလည်တယ်။ နိဗ္ဗာန်မရောက်နိုင်ဘူးတဲ့။ တဏှာအကြောင်းကောင်းကောင်းသိဖို့အရေးဟာ ကိစ္စဉာဏ်နဲ့ မပြောလို့ရှိရင် မသိနိုင်ဘူး။ သူ့ကိစ္စဆိုးပုံကို အကုန်ဖေါ်ထုတ်ရမယ်။ ဖေါ်ထုတ်ပြီး သူ့ကို ၀ိပဿနာဉာဏ်နဲ့ သတ်ပစ်ရမယ်။ ခင်ဗျားတို့ တမြို့လုံး အငြိမ်မနေနိုင်အောင် လုပ်နေတာဟာ ဒီ တဏှာတစ်ခုတည်းပဲ။ ဒီ တစ်မြို့လုံး အုပ်ချုပ်နေတာ သူတစ်ယောက်ထဲပဲ။ ဘယ်သူမှ မအားရဘူး။ တဏှာ ခိုင်းသလိုလုပ်နေရတာပဲ။ တဏှာဖြစ်ချင်တိုင်း ဖြစ်နေရတာပဲ။ မင်းတို့ ၃၁-ဘုံမှာ ဘယ်ဘုံကမှ မထွက်နဲ့။ မင်းတို့ကို ငါထင်သလို ကြိုးဆွဲနေမယ်ဆိုပြီး ဘယ်သူကမှ အလုပ်နဲ့လက်နဲ့ မပြတ်ရအောင် ဒုက္ခနဲ့ မပြတ်ရအောင် တဏှာက လုပ်ထားတယ်။
တဏှာက အကုသိုလ်မှုတွေမှာ ထင်သလိုချယ်လှယ်တယ်။ တဏှာရဲ့တိုက်တွန်းမှုကြောင့် ကြွယ်ဝချမ်းသာချင်ကြတဲ့ ပုဂ္ဂိုလ်တွေဟာ အကုသိုလ်ဒုစရိုက်မှုတွေကို တွင်တွင်ကြီးလုပ်ရဲကြတယ်။ မင့် သားမယား ကောင်းကောင်း ၀တ်နိုင် စားနိုင် နေနိုင်ဖို့အရေးဟာ မင်းတာဝန်ပဲလို့ တဏှာကမြှောက်ပေးတယ်။ အကုသိုလ်နေရာမှာမပြောနဲ့၊ ကုသိုလ်ပြုတဲ့နေရာမှာတောင် သူက၀င်ရှုပ်သေးတယ်။ သံသရာမှာ မဆင်းရဲရအောင် ပေးကြ ကမ်းကြဆိုတာ တဏှာကခိုင်းတာ။ ဒီတော့ သတ္တ၀ါတွေ ၃၁-ဘုံ အတွင်းမှာ ထက်အောက်စုန်ဆန် လှည့်ပတ် ဖြစ်နေအောင် တဏှာကလုပ်တယ်။ ၃၁-ဘုံမှ ထွက်သွားမှာတော့ သူက အလွန်စိုးရိမ်တယ်။ ကုသိုလ်ပြုတဲ့နေရာမှာ သံသရာကောင်းစားရေးကို ဘမ်းပြပြီး အလုပ်ခိုင်းတယ်၊ သံသရာမှ လွတ်မြောက်စေမယ့် ကုသိုလ်မျိုးကျတော့ သူကကန့်ကွက်တယ်။
ဒီတော့ တဏှာဦးစီးတဲ့ ကုသိုလ်ဟူသရွေ့ဟာ ဒုက္ခပဲ အကျိုးပေးမှာပဲ။ တဏှာပါတဲ့ ကုသိုလ်တွေဟာ ဘာကြီးပဲ လုပ်နေနေ ဒုက္ခပဲ ပြန်ရမှာပဲ။ ဒုက္ခမှ လွတ်မှာမဟုတ်ဘူး။ အလှူပေးတော့မယ်ဆိုရင် တဏှာအာရုံအပြုဆုံး- အခင်ဆုံး- အနီးစပ်ဆုံးပုဂ္ဂိုလ်က အရင်ဆုံးပေါ်လာတယ်။ ဘယ်ဘုန်ကြီးမပင့်ရင် မကောင်းဘူး။ ဘယ်လူမဖိတ်ရင် မကောင်းဘူးနဲ့ တဏှာက ရှေ့က၀င်လာပြန်တယ်။ ကုသိုလ်ပြုပြီးတော့လည်း လူချမ်းသာ နတ်ချမ်းသာ ဖြစ်ရပါလို၏ဆိုတော့ ၀ဋ်ဒုက္ခပဲ တဏှာနဲ့ဆုတောင်းတယ်။ ၀ဋ်ဒုက္ခမှကျွတ်ပြီး နိဗ္ဗာန်ရောက်ရပါလို၏လို့ ဆုမတောင်းကြဘူး။ ကုသိုလ်အလုပ်ထဲ တဏှာဝင်ဦးတာကို ခင်ဗျားတို့ မသိလိုက်ကြဘူး။
တဏှာက ခင်ဗျားတို့အတွက် ဒုက္ခ၀တ္ထု ဒုက္ခမှုတွေကိုသာ စုဆောင်းပေးတာမဟုတ်ဘူး။ ခင်ဗျားတို့ ဒုက္ခရောက်ကြောင်းဖြစ်တဲ့ ကုသိုလ် အကုသိုလ်ကံတွေကိုလည်း မပျောက်ပျက်အောင် သူက သိမ်းဆည်းထားတယ်။ ခင်ဗျားတို့ပြုတဲ့ ကုသိုလ်ကံ အကုသိုလ်ကံ စေတနာတွေဟာ ဖြစ်ပြီးရင် ချုပ်ပျောက်သွားတာပဲ။ ဒါပေမယ့် နောင်အကျိုးပေးဖို့အတွက် ဒီစေတနာတွေရဲ့သတ္တိကို ပျောက်မသွားအောင် တဏှာက သိမ်းထားတယ်။ နောက်နောက်က ဘ၀များစွာသံသရာက ခင်ဗျားတို့ပြုခဲ့တဲ့ ကုသိုလ် အကုသိုလ်ကံတွေဟာ မရေတွက်နိုင်ဘူး။ ဒီ ကံတွေ အကျိုးမပေးရသေးသရွေ့ ပျောက်ပျက်မသွားရအောင် တဏှာက စုသိမ်းထားတယ်။ တဏှာကစုသိမ်ထားလို့ပေါ့။ ဒီ ကုသိုလ် အကုသိုလ်ကံတွေဟာ သံသရာမှာ ကောင်းကျိုး ဆိုးကျိုးတွေ ပေးနေနိုင်တာ၊ ဒုက္ခတွေမပြတ်အောင် ပေးနိုင်တာ။ တဏှာမရှိတဲ့ ပုဂ္ဂိုလ်မှာကျတော့ အဲဒီ ကုသိုလ် အကုသိုလ်တွေဟာ ၀ဋ်ဒုက္ခအကျိုးမပေးတော့ဘူး၊ အဟောသိကံဖြစ်သွားတယ်။ ဒါကြောင့် တဏှာချုပ်ရင် ဒုက္ခငြိမ်းတယ် လို့ပြောတာ။
ကုသိုလ်လုပ်တဲ့အခါမှာ နိဗ္ဗာန်ကို တကယ်လိုချင်ရင် ဤကုသိုလ်ကောင်းမှုကြောင့် နိဗ္ဗာန်ရရပါလို၏လို့ တိုက်ရိုက်တောင်းလိုက်ပါလား၊ မဟုတ်ဘူး၊ နိဗ္ဗာန်မရမီစပ်ကြားက ပါလိုက်သေး။ နိဗ္ဗာန်မရမီ စပ်ကြားဆိုရင် တဏှာပါပြီသာမှတ်။ နိဗ္ဗာန်ရရပါလို၏ဆိုရင် တဏှာမပါဘူး။ ကုသိုလ်စိတ် သက်သက်နဲ့တောင်းတာ၊ သဒ္ဓါဆန္ဒနဲ့တောင်းတာ၊ နိဗ္ဗာန်မရမီစပ်ကြား ဆိုကထဲက တဏှာအသံသာ မှတ်ပေရော့။ စပ်ကြားပါရင် တဏှာက ကြိုက်ပြီ။ နိဗ္ဗာန်ဆိုရင် သူက ကန့်ကွက်ပြီ။ ၀ဋ်လည်အလုပ်တွေကျတော့ သူက သဘောကျတယ်။ အားပေးတယ်။ နေရာတကာမှာ တဏှာနဲ့ပေါင်းနေလို့ ခင်ဗျားတို့ မဂ်ဖိုလ်မရတာ၊ နိဗ္ဗာန်မရောက်တာ။ ဥပုသ်ရက်ရှည်သွားစောင့်တော့မယ်ဆိုရင် သွားတော့သွားတာပေါ့တဲ့။ ဒီမှာ လုပ်စရာတွေကုန်မှ စိတ်အေးလက်အေးနဲ့ သွားတာပေါ့တဲ့။ အရေးမကြီးရင် မပြန်ခဲ့နဲ့တဲ့။ ဒီလို နှစ်ဘက်သွားလုပ်တာ တဏှာက။ တော်တော်ကြာ အရေးကြီးတာက လာဦးမှာ။ ရှေ့ကအရေးကြီးတာတွေနဲ့၊ နောက်ကအရေးကြီးတာတွေနဲ့ဆိုတော့ ဥပုသ်ရက်ရှည်တောင် မစောင့်ဖြစ်ပါဘူး။ ဒါကြောင့် အိမ်ကထွက်မယ်ကြံရင် မလွယ်ဘူးဗျ။ ပြန်မယ်ကြံရင်သာလွယ်တာ။ တဏှာက အတင်းပြန်ခေါ်တာကိုး။ အိမ်ကနေပြီး ကျွန်တွင်းက လွတ်ကင်းတဲ့ဆီ သွားမယ်ကြံတော့ ဆိုင်းပါဦးတဲ့၊ တဏှာက။
အချုပ်။ ။ တဏှာဆိုတာ ဝေဒနာကလာတာ။ သုခဝေဒနာကလာတာ။ လောကီအာရုံတွေ သာယာလို့ တဏှာဖြစ်လာတာ။ ဒီတဏှာကိုလက်ခံရင် ခင်ဗျားတို့ ဒုက္ခရောက်ပြီသာမှတ်။ ယခု ဒုက္ခ၀တ္ထု ဒုက္ခမှုတွေနဲ့ မခွဲသာအောင် လုပ်ထားတာလဲ တဏှာပဲ။ ဒုက္ခရောက်ကြောင်းကံတွေကို မပျောက်ပျက်အောင် စုသိမ်းထားတာလဲ တဏှာပဲ။ ဒီလို တဏှာရဲ့ဆိုးယုတ်ပုံ သူ့ကိစ္စတွေကို ကိစ္စဉာဏ်နဲ့သိမှသာ ကတဉာဏ်ရမယ်။ ကတဉာဏ်ရမှ နိဗ္ဗာန်ရောက်မယ်။ ဒီတော့ တဏှာမလာအောင်လုပ်ရမယ်။ တားရမယ်။ ဘယ်လိုတားရမလဲ။ တဏှာဖြစ်လာရင် ၀င်လာရင် သူ့ကိုဖြစ်ပျက် - ၀ိပဿနာမဂ်နဲ့ရှုရမယ်။ ဖြစ်ပျက်ရှုလိုက်ရင် တဏှာချုပ်သွားတယ်။ တဏှာနိရောဓ ဖြစ်သွားတယ်။ တဏှာနိရောဓဖြစ်အောင် တဏှာကို ကိစ္စဉာဏ်နဲ့ အဖန်ဖန်ရှုပေး။ တဏှာကို ကိစ္စဉာဏ်နဲ့အဖန်ဖန်ရှုမှ သူလူဆိုးမှန်းသိမှ သူ့ကိုမုန်းမှာ၊ အ၀င်မခံမှာ၊ နှင်ထုတ်မှာ၊ ချေမှုန်းပစ်မှာ။ ချေမှုန်းပစ်လို့ တဏှာသေရင် နိဗ္ဗာန်ရောက်ပြီမှတ်။ သူ့မတော်လှန်ရင် တဏှာကျွန်ဘ၀မှ မထွက်ရတော့ဘူးမှတ်။
မိုးကုတ်ဆရာတော်ဘုရားကြီး၏ သစ္စာအနက် ၁၆-ချက် တရားတော်များမှ
No comments:
Post a Comment