ဓမ္မနုဓမ္မပဋိပတ္တိ။ ။ သောတာပန်တည်ခြင်း၏ အကြောင်း(၄)ပါးရှိတယ်။ ဒီ လေးပါးက (၁) ကလျာဏမိတ္တ = သူတော်ကောင်းနဲ့ ပေါင်းမှု၊ (၂) သူတော်ကောင်းတရား နာမှု၊ (၃) သူတော်ကောင်းတရားကို နှလုံးသွင်းမှု၊ (၄) ဓမ္မာနုဓမ္မပဋိပတ္တိ = သူတော်ကောင်းတရားအားလျော်စွာ တရားကိုကျင့်မှု။ ဒီလေးချက်ကို လုပ်ဆောင်ရင် သောတပန်တည်နိုင်တယ်လို့ အဂုတ္တိုရ်မှာ ဘုရားကဟောထားတယ်။ ဒီတော့ သောတာပန်တည်ချင်လို့ရှိရင် ဓမ္မာနုဓမ္မာပဋိပတ္တိ အလုပ်ဟာအရေးကြီးတယ်။ ဓမ္မာနု = ဓမ္မအားလျော်စွာ၊ ဓမ္မပဋိပတ္တိ = ဓမ္မကိုကျင့်ကြံအားထုတ်မှု၊ ပဋိပတ္တိဆိုတာ အကျင့်ကိုပြောတာ။ ဒီတော့ ဓမ္မာနုဓမ္မာပဋိပတ္တိဆိုတာ ဓမ္မသဘောကို ဓမ္မသဘောနဲ့ ကြည့်ပါလို့ ပြောတာ။
ဓမ္မဆိုတာက နာမ်တွေလဲဓမ္မပဲ၊ ရုပ်တွေလဲဓမ္မပဲ၊ ဒီရုပ်နာမ်ဓမ္မတွေဟာ အမြဲဖောက်ပြန်ပျက်စီးနေတာပဲ။ ဖောက်ပြန်ပျက်စီးနေတာကို အမြဲပြကြတယ်။ ဒီလို ရုပ်နာမ်ဓမ္မတွေက အမြဲဖောက်ပြန်ပျက်စီးနေတာကို ပြလို့ရှိရင် ဒီကဉာဏ်က (မဂ္ဂင် ငါးပါးက) အဲဒီဖောက်ပြန်ပျက်စီးနေတဲ့ ရှေ့ဓမ္မ၏ (ရှေ့ရုပ်နာမ်ဓမ္မ၏) သဘောကို နောက်ဓမ္မက (နောက်ဉာဏ်က) နေပြီး ကြည့်ပေးပါတဲ့။ ဒီလို ဓမ္မနုဓမ္မပဋိပတ္တိကျင့်မယ်ဆိုရင် ဒီဘ၀မှာ သောတာပန်တည်ရမယ်လို့ အဂုင်္တ္တိုရ်က လေးချက်ပြတဲ့အထဲမှာ ဒါ အရေးကြီးဆုံးအချက်ပဲ။
ခင်ဗျားတို့ ခန္ဓာကြီးဟာ ဓမ္မသဘော မပြောတဲ့အချိန်ရယ်လို့ မရှိဘူး။ အမြဲပြောနေတာပဲ။ ဒါပေမယ့် ခင်ဗျားတို့က မကြည့်ဘူး။ ပြောတဲ့အချိန်တိုင်း လိုက်ကြည့်ပါ။ ပြောတာကဖြင့် မရေတွက်နိုင်ဘူး။ မရေတွက်နိုင်အောင်ပြောနေပေမယ့် ကြည့်မှုက မရေတွက်နိုင်အောင် မကြည့်ပဲနေသောကြောင့် ကိလေသာခပ်သိမ်း ရုပ်သိမ်းတဲ့ ဒုက္ခခပ်သိမ်း ချုပ်ငြိမ်းတဲ့ နိဗ္ဗာန်မရောက်တာ။ ဒါဖြင့် ဓမ္မက ပြောတိုင်း မကြည့်တာသည် နိဗ္ဗာန်မရခြင်း၏ အကြောင်းပဲလို့မှတ်။ ဓမ္မကိုကျင့်ရင် သောတာပန်ဖြစ်မယ်။ မကျင့်မိတဲ့အတွက် သောတာပန်မဖြစ်တာ။ ဒီ ဓမ္မဟာ နာမ်ဓမ္မကြည့်ကြည့်၊ ရုပ်ဓမ္မကြည့်ကြည့် ကြည့်လိုက်တိုင်းဟာ အဲဒီ ဓမ္မထဲမှာ ဖောက်ပြန်ပျက်စီးနေတာတွေ့ရမှာပဲ။ ဒါဟာ ဓမ္မရဲ့ ဖောက်ပြန်ပျက်စီးနေတာကို သိတာပဲလို့မှတ်။ ဒီလိုသိရင် ဒီ ဓမ္မကိုခင်တွယ်တဲ့ တဏှာဟာ အခွင့်မရတော့ဘူး။
အခုတော့ ဓမ္မရဲ့ ဖောက်ပြန် ပျက်စီးနေတာကို(၀ါ) ဖောက်ပြန်ပျက်စီးနေတဲ့ ဓမ္မကိုမကြည့်လို့၊ ၀ိပဿနာဉာဏ်နဲ့ မကြည့်မိလို့ ငါနာတယ်၊ ငါကိုက်တယ်ဆိုပြီး သက္ကာယဒိဋ္ဌိနဲ့ ကြည့်နေတာ၊ သမ္မာဒိဋ္ဌိနဲ့ မကြည့်မိဘူး။ ဒါကြောင့် မဂ္ဂင်နဲ့ဝေးနေတာ။ တရားနာပြီး ကျင့်ရမယ့် အလုပ်ကဖြင့် ဓမ္မနုဓမ္မပဋိပတ္တိနဲ့ ကြည့်ပေးလို့ရှိရင် သစ္စဉာဏ်ဖြစ်တယ်။ သစ္စဉာဏ် ဖြစ်လို့ရှိရင်၊ ကိစ္စဉာဏ် နောက်က လိုက်ရလိမ့်မယ်၊ ကိစ္စဉာဏ်လိုက်လို့ရှိရင် ကတဉာဏ်ဟာ အလိုလိုရောက်သွားမှာပဲ။
ဝိပရိဏာမဋ္ဌနှင့် ကိစ္စဉာဏ်။ ။ ကဲ ......ကိစ္စဉာဏ်ကို ရှေးဦးစွာပြမယ်။ ၀ိပရိဏာမဋ္ဌော= ပင်ကိုယ်သဘောအားဖြင့် ဖောက်ပြန်ပျက်စီးတတ်တဲ့သဘော၊ ရုပ်နာမ်အစုဖြစ်တဲ့ လက်ရှိခန္ဓာကြီးဟာ အမြဲပဲဖောက်ပြန်နေတယ်။ ခင်ဗျားတို့ လက်ရှိခန္ဓာကြီးထဲ၌ တရားနာရင်းမတ္တနဲ့ စိတ်အမျိုးမျိုးပြောင်းသွားတယ်။ ရုပ်အမျိုးမျိုးပြောင်းသွားတယ်။ ဒီလိုနာမ်အမျိုးမျိုး ရုပ်အမျိုးမျိုး ပြောင်းနေပုံကို သတိထားပါ။ သတိထားပြီး ပြောင်းနေတဲ့ဆီကို ဉာဏ်ရောက်သွားပြီဆိုရင်၊ သြော်..... ရုပ်နာမ်တွေဟာ ဖြစ်ပြီး ပျက်သွားပါလားဆိုတာ တွေ့မယ်၊ သိမယ်။ ဒီလို ဉာဏ်က ခန္ဓာကိုယ်ထဲမှာ တည့်တည့်ပြီးပေးလိုက်ရင် တရားအပြီး နာပြီးတဲ့အဆုံးမှာ ကိစ္စပြီးနိုင်တယ်လို့မှတ်။
ရုပ်နာမ် ခန္ဓာကြီးဟာ အမိဝမ်းခေါင်းထဲက ထွက်လာကတည်းက ဇရာ၊ မရဏ (အို-သေ)ကို ရွက်ပြီး ထွက်လာခဲ့တာ။ ဇရာမရဏကို ယူဆောင်လာခဲ့လို့ ခန္ဓာငါးပါးဟာ ၀ိပရိဏာမဋ္ဌဖြစ်ရရှာတယ်။ ဖောက်ပြန် ပျက်စီးရရှာတယ်။ ရုပ်နာမ် ခန္ဓာကြီးကို ၀ိပဿနာဉာဏ်နဲ့ စိုက်ကြည့်လိုက်တဲ့အခါကျတော့ ရုပ်နာမ် နှစ်ပါးစလုံးဟာ ဇရာမရဏ ဒဏ်ချက်နဲ့ အချိန်မရွေး ဖောက်ပြန်ပျက်စီးနေတာကိုတွေ့ရတယ်။ ဇရာမရဏသည် ခန္ဓာထဲမှာမွေးကတည်းက တစ်ခါတည်း ပါလာသောကြောင့် ခန္ဓာငါးပါးသည် ၀ိပရိဏာမလက္ခဏံစ ဒုက္ခသစ္စံ။ (ဖောက်ပြန်ပျက်စီးတတ်တဲ့ လက္ခဏာသည် ဒုက္ခသစ္စာ) ဆိုသောကြောင့် ဒီခန္ဓာကြီးဟာ ဒုက္ခသစ္စာ=ဆင်းရဲတာအမှန်ပဲ။ ဒီလိုခန္ဓာကြီးကို ဒုက္ခသစ္စာလို့သိရင် သစ္စဉာဏ်ရပြီ။ ခန္ဓာကြီးကို ဉာဏ်နဲ့စိုက်ကြည့်လိုက်တဲ့အခါ ရုပ်နာမ်ခန္ဓာကြီး(၀ါ)ခန္ဓာငါးပါးဟာ ခဏခဏ ဖောက်ပြန်ပျက်စီးနေပါလား။ ဖောက်ပြန်ပျက်စီးတတ်တဲ့ ကိစ္စသာရှိပါလားလို့သိရင်၊ ဒီ သိတဲ့ဉာဏ်ဟာ ကိစ္စဉာဏ်ပါပဲ။ ကိစ္စဉာဏ်ပြီးရင် ကတဉာဏ် ရောက်တာပဲ။ ကတဉာဏ်ဆိုတာ မဂ်ဉာဏ်ကိုပြောတာ။
ဒီတော့ ကတဉာဏ် (မဂ်ဉာဏ်) ရချင်လို့ရှိရင် ကိစ္စဉာဏ်ရအောင်လုပ်ရမယ်။ ခန္ဓာကိုယ်ထဲကို ဉာဏ်နဲ့စိုက်ပြီး ကြည့်ကြည့်ပေးပါ။ ကြည့်ကြည့်ပေးသွားတော့ ခန္ဓာကိုယ်ထဲရှိ ရုပ်ဓမ္မနာမ်ဓမ္မတွေဟာ သူတု့်ယူလာခဲ့တဲ့ ဇရာမရဏ (အိုမှု၊ သေမှု) ဒဏ်ချက်ကြောင့် ဖြတ်ဖြတ် ဖြတ်ဖြတ်နဲ့ ပျက်စီးသွားတာကိုတွေ့ရမယ်။ ရှုတဲ့အခါ ဝေဒနာတစ်လုံးထဲရှုလဲ ဒီကိစ္စဉာဏ်နဲ့ရှု။ သညာတစ်လုံးထဲရှုလဲ ဒါနဲ့ရှု။ ကာယာနုပဿနာခေါ်တဲ့ ရုပ်ရှုရင်လဲ ဒါနဲ့ပဲရှု။ စိတ်ရှုလဲ ဒါနဲ့၊ ကိစ္စဉာဏ်နဲ့ရှုပေး။ ဒီလိုရှုပေးလို့ရှိရင် မိမိခန္ဓာကြီးဟာ ၀ိပရိဏာမကိစ္စ= ဖောက်ပြန်ပျက်စီးတဲ့ ကိစ္စမှတစ်ပါး ဘာကိစ္စမှ မရှိဘူး။ ဒီတော့ ခန္ဓာငါးပါးဟာ ၀ိပရိဏာမ= ဖောက်ပြန်ပျက်စီးခြင်းကိစ္စရှိတယ်။ ဇရာမရဏဒဏ်ချက်နဲ့ ရုပ်နာမ်တွေ ပျောက်ပျက်သွားတာကို ဒီကအသိနဲ့ = ၀ိပဿနာ မဂ်ဉာဏ်နဲ့ လိုက်ပေး။ ဒီလို ခန္ဓာငါးပါး၏ ဖောက်ပြန်ပျက်စီးနေတာကို သေသေချာချာမြင်ရင် ကိစ္စဉာဏ်ရပြီမှတ်။
ကတဉာဏ်။ ။ ကိစ္စဉာဏ်ပြီးရင် ကတဉာဏ် ရောက်တာပဲ။ ကတဉာဏ်ရောက်တော့ ခင်ဗျားတို့ကိုယ်တိုင်ပဲ ခန္ဓာမရှိတဲ့နေရာ (နိဗ္ဗာန်)ကို မြင်ရမယ်။ မြင်တော့ သြော် .. ဒီနေရာက အသေလွတ် ဇရာမရဏတို့ မရောက်နိုင်တဲ့ နေရာပါလားဆိုတာကို ကိုယ်တိုင်အားထုတ်ပြီး ကတဉာဏ်ရရင် မြင်ရပါလိမ့်မယ်။ ၀ိပဿနာအလုပ်လုပ်တဲ့ ပုဂ္ဂိုလ်မှာ ကိစ္စဉာဏ်ဆုံးသွားရင် ခန္ဓာချုပ်သွားမယ်။ ဒါကြောင့် ခန္ဓာချုပ်အောင်ကြည့်ရမယ်။ ခန္ဓာချုပ်သွားတော့ အဲဒီခန္ဓာချုပ်= ဒုက္ခချုပ်တဲ့နေရာမှာ သုခနိဗ္ဗာန်လာမယ်။ ကတဉာဏ်ရရင် ခန္ဓာချုပ်= ဒုက္ခချုပ်တဲ့ နိရောဓ= နိဗ္ဗာန်ကိုမြင်ရပြီ၊ မျက်မှောက်ပြုရပြီ။ နိရောဓဆိုတာ ဒုက္ခချုပ်ငြိမ်းပြီး သန္တိသုခ=အေးငြိမ်းချမ်းသာမှုရှိတာကိုပြောတာ။ ဥပမာ - လက်မောင်းမှာ အနာပေါက်တယ်၊ ဆေးကုလို့ ပျောက်သွားတော့ အနာမရှိတော့ဘူး။ ဒီမှာလဲ ထို့အတူပဲ၊ နဂိုကဒုက္ခနဲ့ ဆက်သွယ်နေတာ ၀ိပဿနာမဂ်ဉာဏ် ဆေးနဲ့ကုလိုက်လို့ရှိရင် အကုန်ပျောက်တာပဲ။ ဥဒါန်းပါဋ္ဌိတော်မှာ အတ္ထိဘိက္ခဝေ နိဗ္ဗာနံ (ရဟန်းတို့ နိဗ္ဗာန်ဆိုတာ ဧကန်ရှိတယ်)လို့ ဟောထားတော့၊ နိဗ္ဗာန်ဟာ ဧကန်ရှိ တကယ်ရှိ။ ဒုက္ခနဲ့ ဆက်သွယ်တာသာ မရှိတာ။ ဒုက္ခနဲ့ ဆက်သွယ်တာကတော့ ဒီဇရာမရဏနဲ့ ဆက်သွယ်တဲ့ ရုပ်နာမ်ပဲ။ နိဗ္ဗာန်ဟာ ဇရာမရဏနဲ့ မဆက်သွယ်တော့ဘူး။ ကတဉာဏ်နဲ့ ကြည့်ရင် မြင်ရတယ်။ ဘုရားကနိဗ္ဗာန်ရှိတယ်လို့ ဟောထားပြီ၊ ခင်ဗျားတို့က မယုံဘူး။ ဒီကိစ္စဉာဏ်ကို ရအောင်လုပ်ပြီး ကတဉာဏ်ရသွားရင် နိဗ္ဗာန်ရှိတာကို သေသေချာချာ မြင်မယ်လို့မှတ်။
အဲဒီတော့ အိုတာရှိရင် မအိုရာ၊ နာရာရှိရင် မနာရာ၊ သေရာရှိရင် မသေရာရှိတာပေါ့။ အပူရှိရင် အအေးရှိတယ်။ ဒါကြောင့် ကတဉာဏ်ရအောင်လုပ်ကြည့်။ ကတဉာဏ်ရချင်ရင် ကိစ္စဉာဏ်ကို အရင်လုပ်။ ကိစ္စဉာဏ်ဆိုတာ ခန္ဓာငါးပါး၏ ခဏခဏ နှိပ်စက်နေတာကို သိတဲ့ဉာဏ်ပဲ။ ခန္ဓာငါးပါးကို ကိစ္စဉာဏ်နဲ့ ကြည့်ကြည့်ပြီးသွားတော့၊ ဒီခန္ဓာကြီးကိုဖြင့်မကြည့်ချင်တေ့ပါဘူး၊ မရချင် မလိုချင်တော့ပါဘူး ဆိုတာလာမယ်။ လာရင် သမုဒယချုပ်တယ်။ သမုဒယဆိုတာ ခန္ဓာငါးပါး၏ ဒုက္ခဖြစ်ကြောင်းတဏှာပဲ။ သမုဒယ= တဏှာချုပ်သွားရင် ဒုက္ခလဲ ချုပ်သွားတာပဲ။ မကျန်ရစ်တော့ဘူး။ မီးငြိမ်းသွားရင် အပူပျောက်ရသလိုပဲ။ မီးက သမုဒယသစ္စာနဲ့တူတယ်။ အပူကတော့ ဒုက္ခသစ္စာနဲ့တူတယ်။ သူတို့နှစ်ခု မီးနဲ့အပူပျောက်သွားတဲ့အခါ အေးတဲ့သတ္တိပဲ ကျန်ရစ်တော့တယ်။ ဒီတော့ ကတဉာဏ်ဆိုတာ မီးနဲ့အပူငြိမ်းပြီး အေးပြီပေါ့။ ဒီဒုက္ခနဲ့ ၀ဋ် ကျွတ်ပေပေါ့လို့ သိတဲ့ဉာဏ်ပဲ။
အချုပ်။ ။ သစ္စဉာဏ်ကတော့ ဘုန်းကြီးဟောတာနဲ့ရပါတယ်။ ကိစ္စဉာဏ်ကတော့ ခင်ဗျားတို့ ပွားယူမှရမယ်၊ ပွားလိုက်ရင်ရတယ်။ ကိစ္စဉာဏ်နဲ့ ပွားတဲ့အခါကျတော့ ရုပ်နာမ်ခန္ဓာကြီးဟာ ပျက်နေတာပဲ။ ဘယ်ခန္ဓာဖြစ်ဖြစ် ပျက်မှာပဲ။ အတိတ်ကလဲ ဒီလိုချည်းပဲ။ အခုလဲ ဒီလိုပဲ။ နောင် အနာဂတ်လဲ ဒီလိုနေမှာပဲ။ ဒီ ခန္ဓာခင်တဲ့ တဏှာကုန်ရင် ခန္ဓာချုပ်တာပဲ။ ခန္ဓာခင်တဲ့ တဏှာရှိရင် ခန္ဓာရမှာပဲ။ ဒီတော့ ဒီခန္ဓာခင်တဲ့ တဏှာမရှိတော့ရင် ခန္ဓချုပ်ငြိမ်း ဒုက္ခသိမ်း၍ အေးငြိမ်းတဲ့နိဗ္ဗာန် ရောက်တော့တာပဲ။ ဒီတော့ နိဗ္ဗာန်ရောက်ချင်ရင် နိဗ္ဗာန်မြင်တဲ့ ကတဉာဏ် ရချင်ရင် ကိစ္စဉာဏ်ရအောင် ဖိပြီးအလုပ်လုပ်။ ကိစ္စဉာဏ်ဆိုတာ တခြားမဟုတ်ပါဘူး။ ဘုန်းကြီးက ဖြစ်ပျက်အရှုခိုင်းတဲ့ အလုပ်ပါပဲ။ ဖြစ်ပျက်ရှုဖို့ ဝေဒနာတွေသင်ထား စိတ်တွေသင်ထား ရုပ်တွေသင်ထား ကြိုက်ရာရှုလို့ သင်ထားပြီးပြီ။ ဒါတွေဟာ ကိစ္စဉာဏ်ရအောင် သင်ထားတာပဲ။ ကိစ္စဉာဏ်ရင့်သွားလို့ ဒီခန္ဓာကြီး မလိုချင်တော့ပါဘူးဆိုရင် ကတဉာဏ်ဖြစ်ပြီ၊ ရပြီ။ ကိစ္စဉာဏ်က ဖြစ်ပျက်=ဒုက္ခကို အာရုံပြုတယ် (မြင်တယ်)။ ကတဉာဏ်က ဒုက္ခချုပ်ရာ နိဗ္ဗာန်ကို အာရုံပြုတယ်(မြင်တယ်)။ ဒါဖြင့် ခင်ဗျားတို့က ဖြစ်ပျက် မြင်အောင်ရှု။
ဒီတော့ ပထမ ဘုန်းကြီးတာဝန်က သစ္စ္ပဉာဏ်ရအောင် ဟောပြောရတဲ့အလုပ်။ ခင်ဗျားတို့တာဝန်က ကိစ္စဉာဏ်ရအောင် ၀ိပဿနာ ပွားများရတဲ့အလုပ်။ ပွားများဖန်များလို့ ကိစ္စဉာဏ်ပြီးတဲ့အခါကျတော့၊ ကိစ္စဉာဏ်သာ ဆုံးအောင်လုပ်ခဲ့လို့ရှိရင် ကတဉာဏ်ဟာ အလိုလိုပေါ်မယ်။ ဒီတော့ ကတဉာဏ်ဆိုတာ အားထုတ်ရမယ့်ဉာဏ်မဟုတ်ဘူး။ ကိစ္စပြီးပြီလို့ သိတဲ့ဉာဏ်ပဲ။
မိုးကုတ်ဆရာတော်ဘုရားကြီး၏ သစ္စာအနက် ၁၆-ချက် တရားတော်များမှ
No comments:
Post a Comment