ခင်ဗျားတို့ကိုယ်မှာ ရုပ်နာမ် နှစ်မျိုးပဲရှိတယ်။ ထိုင်နေတာက ရုပ်တရား၊ နာနေတာကနာမ်။ ယောက်ျားရယ်မိန်းမရယ်လို့ဆိုကြတာက သမုတိသစ္စာနယ်မှာ ပညတ်အားဖြင့်မှန်တယ်။ ဥပမာ - မြစ်ဟိုဘက်ကမ်းကို လှေနဲ့ ကူးသွားမယ်ဆိုရင်၊ လှေကြောင့်လဲ ဟိုဘက်ကမ်းကိုရောက်တယ်ဆိုရမယ်၊ လူကြောင့်လဲ ဟိုဘက်ကမ်းကိုရောက်တယ် ဆိုရမယ်။ တစ်ခုနှင့်တစ်ခု အမှီပြုနေတာပဲ။ အကြောင်းနဲ့အကျိုးပဲရှိတယ်။ ရုပ်ကြောင့်လည်း နာမ်ဖြစ်တယ်။ နာမ်ကြောင့်လည်း ရုပ်ဖြစ်ပေါ်လာရတယ်လို့ မှတ်ပါ။ ဒီခန္ဓာမှာရှိတဲ့ ရုပ်နာမ်ဟာ ခင်ဗျားတို့ ပြုခဲ့တဲ့ “ကံ” ၏ အစွမ်းကြောင့်ဖြစ်ရတယ်။ ကံရှိသရွေ့ ဒီရုပ်နာမ်အစဉ်ဟာ ပြတ်မသွားဘူး။ သေရင်ဘာမှ မဖြစ်ဘူးဆိုတဲ့ အယူဟာ ဥစ္ဆေဒဒိဋ္ဌိ အယူပဲ။ ဒါ မှားတဲ့အယူပဲ။ ကုသိုလ်အကုသိုလ်ကံတွေကြောင့် ရုပ်နာမ် အစဉ်တွေ အဆက်မပြတ် ဖြစ်နေရတယ်။ ကံ၊ ကံ၏အကျိုးပေးဆိုတာရှိတယ်။ ကံတို့၏ အကျိုးပေးတရားဟာ ဥာဏ်နဲ့ မှန်းဆပြီး သိနိုင်တယ်။ အကြောင်းတရားတိုင်းမှာ အကျိုးတရားရှိတာချည်းပဲ။ အတိတ် ပစ္စုပ္ပန် အနာဂတ်ဆိုတဲ့ ကာလသုံးပါးရှိနေတာပဲဟာ။ ကာလသုံးပါးရှိနေတော့ အတိတ်ဘ၀လဲရှိရမယ်၊ ယခုလက်ရှိဘ၀လဲရှိရမယ်။ နောင်အနာဂတ်ဘ၀လဲရှိရမှာပေါ့။
လူတွေဟာ အတိတ်ဘ၀ကံ အကြောင်းတရားအမျိုးမျိုးကြောင့် ယခုဘ၀မှာ အကျင့်အမျိုးမျိုး၊ ရုပ်ရည်အမျိုးမျိုး၊ စိတ်နေသဘောထားအမျိုးမျိုး၊ ပညာမှာလည်း ထူးချွန်မှု၊ မထူးချွန်မှုအမျိုးမျိုး၊ ဆင်းရဲချမ်းသာအမျိုးမျိုး ကွဲပြားခြားနားနေကြတာပေါ့။ ဒီလိုကွဲပြားမှုတွေဟာ ရာသီဥတုနဲ့ ပတ်ဝန်းကျင် အတွေ့အကြုံ ကြိုးစားမှုအပေါ်မှာ အနည်းအပါးတော့တည်တယ်။ ဒါပေမယ့် ခင်ဗျားတို့ပြုခဲ့တဲ့ စေတနာကံက ပဓာနပဲ။ သူက စီမံတာ။ ဒီတော့ အခု ဘ၀ သုံးပါး ဆက်စပ်ပုံကို ရှင်းပြမယ်။
လွန်ခဲ့တဲ့ အတိတ်ဘ၀၊ ယခုရောက်ဆဲ ပစ္စုပ္ပန်ဘ၀၊ နောက်လာမယ့် အနာဂတ်ဘ၀လို့ ဘ၀သုံးပါးကို တန်းပြီးတော့မှတ်ထားပါ။ ဘာကြောင့်များ ဒီဘ၀သုံးပါးဟာ တခုနဲ့တခု ဆက်မိအောင် ဆပ်စပ်နေပါသလဲ၊ ဒီဘ၀တွေကို ဆက်မိအောင်လုပ်တဲ့ လက်သည်ကိုရှာကြစို့။ အပ်ချုပ်သမားဟာ အထည်စက်ရုံ၊ ယက္ကန်းစင်တို့ကထွက်လာတဲ့ အ၀တ်အထည်တွေကို ခင်ဗျားတို့ကိုယ်နဲ့ အံကျဖြစ်အောင် ဆက်စပ်ချုပ်လုပ်ပေးလို့ ခင်ဗျားတို့ရဲ့ လုံချည်အင်္ကျီတွေဖြစ်လာရတာ၊ ဒီတော့ သမုဒယသစ္စာဆိုတဲ့ တဏှာလောဘဟာ ဒီအပ်ချုပ်သမားလိုပဲ ဒုက္ခသစ္စာ=ဘ၀တွေကို ဆက်စပ်ပေးနေတယ်။ တစ်ဘ၀ပြီး တစ်ဘ၀ မပြတ်ရအောင် ဆက်ပေးနေတယ်။ အတိတ်ဘ၀က စုတေပြီးသည်နှင့် တပြိုင်နက် ယခုရောက်ဆဲ ပစ္စုပ္ပန်ဘ၀ကို ဆက်ပေးတယ်။ ဒီ ပစ္စုပ္ပန်ဘ၀က သေကြရဦးမယ်။ သေရင် ပစ္စုပ္ပန်ဘ၀ စုတိစိတ်ကလေးနဲ့ အနာဂတ်ဘ၀ ပဋိသန္ဓေစိတ်ကလေးကို ဆက်ပေးဦးမယ်။ ဒီတော့ “တဏှာလောဘ” မသေရွေ့တော့ ဘ၀=ဒုက္ခ အဆက်မပြတ်တော့ပါဘူး။ ဒီတော့ “တဏှာလောဘ”ဟာ အတိတ်ဘ၀နဲ့ ပစ္စုပ္ပန်ဘ၀၊ ပြီးတော့ ပစ္စုပ္ပန်ဘ၀နဲ့ အနာဂတ်ဘ၀တွေ အဆက်မပြတ်အောင် ဆက်ပေးနေတာပဲ။ ဒီ တဏှာလောဘ မသေသရွေ့တော့၊ “စုတိပြီးပဋိသန္ဓေ၊ ပဋိသန္ဓေပြီးစုတိ” ဆက်စပ်ပေးနေမှာပဲ။
တစ်သံသရာလုံး မင်းတို့ငါတို့ကို ဒုက္ခအားလုံးနဲ့ ဆက်စပ်ပေးနေတာဟာ ဒီ “တဏှာလောဘ”ပဲ။ ဒီ တဏှာလောဘကို အသေမသတ်နိုင်သရွေ့ ကာလပတ်လုံး ဘယ်တော့မှ ဒုက္ခဆက် ပြတ်တော့မှာ မဟုတ်ဘူးလို့မှတ်ပါ။ ခင်ဗျားတို့ကတော့ ဒီ ဘုံဘ၀ကို ကုသိုလ်ကံကဆက်သလိုလို ထင်ချင်ထင်နေမယ်။ ကုသိုလ်ကံပေမယ့် ဒီတဏှာမရှိရင် ဒီကုသိုလ်ကံဟာ နိဗ္ဗာန်ပို့တယ်။ သူက ဘ၀တွေဆက်ပေးနေလို့ နိဗ္ဗာန်မရောက်တာ။ ကုသိုလ်ကံဟာ တဏှာရဲ့လက်အောက်ခံဖြစ်တဲ့အတွက် လူစုတိနဲ့ နတ်ပဋိသန္ဓေဆက်ပေးလိုက်တာပဲ။ စုတိနဲ့ပဋိသန္ဓေ အဆက်မပြတ်ရအောင် ဆက်ပေးတဲ့ လက်သည်ရင်းကတော့ ဒီ “တဏှာလောဘ”ပဲ။ ခင်ဗျားတို့က သာမညဥာဏ်လေးနဲ့ကြည့်တော့ သြော် .....ကံကောင်းလို့ လူ့ပြည်ရောက်လာတယ်။ ကံကောင်းလို့ နတ်ပြည်ရောက်လာတယ်လို့ ထင်ကြမယ်၊ ဒီကံတွေဟာ ဘယ်လိုကောင်းကောင်း၊ တဏှာသေရင် အဟောသိကံဖြစ်သွားရတယ်။ အကျိုးမပေးနိုင်တော့ဘူး။ ဘုရားဖြစ်ခါးနီး ဝေဿန္တရာမင်းကြီးဟာ ဒါနကုသိုလ်ကံတွေ အများကြီးပြုလုပ်ခဲ့တယ်။ ဘုရားအဖြစ်သို့ရောက်တော့ သူ့ရဲ့ဒါနကုသိုလ်ကံတွေဟာ ကုန်ပြီလို့မဆိုနိုင်ဘူး။ တဏှာရှိတဲ့ ပုဂ္ဂိုလ်သာဆိုရင် အကျိုးပေးလို့ မကုန်နိုင်ဘူး။ သို့သော် ဗောဓိပင်နဲ့ရွှေပလ္လင်မှာဝိပဿနာအလုပ်ကို လုပ်လိုက်တဲ့အတွက် တဏှာလောဘက သေသွားတော့ ဘုရားပရိနိဗ္ဗာန်စံပြီးရင် ဘယ်ဘ၀မှ မဆက်တော့ဘူး။ ဒါ တဏှာကုန်လို့မဆက်တာ။ “ကံ”ကတော့မကုန်ဘူး။ မဏှာကုန်လို့သာ မဆက်နိုင်တာ။ ဒါဖြင့် ဘ၀ဆက်လေသမျှဟာ “တဏှာလောဘ”လို့သာ မှတ်ကြ။
ဒါဖြင့် “ကံ”ဟာ ကြောက်စရာကောင်းသလား၊ “တဏှာ”ဟာ ကြောက်စရာကောင်းသလားဆိုတော့ တဏှာက ကြောက်စရာကောင်းတာ၊ ခင်ဗျားတို့ကတော့ အကုသိုလ်ကံနှိပ်စက်မှာ ကြောက်လိုက်ကြတာ၊ တဏှာကြောက်တယ်လို့မပါဘူး။ အကုသိုလ်ကံ အကျိုးပေးလို့ ဒိုင်းကနဲ သေမှာ၊ စီးပွားရေးပျက်သွားမှာပဲ ခင်ဗျားတို့ ကြောက်နေကြတာ၊ တစ်သက်လုံး မုဆိုးလုပ်စားနေတဲ့ မုဆိုးကြီးဟာ အကုသိုလ်ကံတွေ မနည်းဘူး လုပ်ထားတာ။ သို့သော်လည်း ဘုရားနဲ့တွေ့လို့ ဘုရားရဲ့ တရားကိုနာပြီး ၀ိပဿနာအလုပ် လုပ်လိုက်တော့ အဲဒီ အကုသိုလ်ကံတွေဟာ အကျိုးဆက် မပေးနိုင်တော့ဘူး။ ဘာပြုလို့လဲ၊ တဏှာချုပ်သွားလို့၊ ဒီတော့ ခင်ဗျားတို့တတွေ “ကုသိုလ်ကံ”တွေကိုလည်း ဒီလောက်အားကိုးစရာ မလိုပါဘူး။ “အကုသိုလ်ကံ”တွေကိုလည်း ဒီလောက်ကြောက်စရာ မရှိပါဘူး။ ခင်ဗျားတို့ ဘ၀များစွာက ၀ဋ်ထဲလည်မယ့် ၀ဋ်ကုသိုလ်ကံတွေ အကုသိုလ်ကံတွေ တစ်ပုံကြီးရှိမှာပဲ။ အဲဒီအကုသိုလ်ကံတွေကို မကြောက်ပါနဲ့၊ ဘ၀ဆက်တတ်တဲ့ “တဏှာ” သေရင် အဲဒီ ကုသိုလ်ကံ အကုသိုလ်ကံတွေဟာ “အဟောသိကံ” ဖြစ်ပါတယ်။ အကျိုးမပေးတော့ပါဘူး။ တဏှာခေါင်းဆောင်တဲ့ကံကသာ အကျိုးပေးနိုင်တော့ ခေါင်းဆောင်တဏှာကိုသတ်လိုက်ရင် “ကံ”က မဆက်နိုင်တော့ပါဘူး။ ဒါကြောင့် “ကံ”ကို မကြောက်ပါနဲ့။ သစ္စာလေးပါးမှာ ကုသိုလ်အကုသိုလ်ကံတွေ ဒီလောက်မဟောပါဘူး။ သမုဒယ=တဏှာသေရင်ပြီးတာပဲလို့ ဘုရားက ဒီတစ်လုံးတည်းဟောထားတယ်။ တဏှာ=သမုဒယကို မဂ်နဲ့ ပယ်သတ်လိုက်ရင် ဘာမှပူစရာမရှိပါဘူး။
ခင်ဗျားတို့က ကုသိုလ်ကံလေးတွေ ၀င်လာရင် တပြုံးပြုံးနဲ့ အကုသိုလ်ကံလေးတွေဝင်လာရင် တမဲ့မဲ့ တရွဲ့ရွဲ့နဲ့မဟုတ်လား။ ဒီတော့ကုသိုလ်ကံကို ၀မ်းမြောက်တာလည်းမှားတယ်။ အကုသိုလ်ကံကိုကြောက်တာလည်း မှားတယ်။ သစ္စာနဲ့ဝေဖန်လိုက်တော့၊ သမုဒယသစ္စာ တဏှာလောဘကို ကြောက်မှ အကြောက်မှန်။ ဘုရားက “တဏှာအပ်ချုပ်သမား”လို့သာ ဟောတယ်။ “ကံအပ်ချုပ်သမား”လို့ မဟောခဲ့ဘူး။ ခင်ဗျားတို့ကို တကယ်ဒုက္ခပေးနေတာဟာ ဒီတဏှာပဲ။ ဒုက္ခအပေးဆုံးဖြစ်တဲ့တဏှာက အရှောင်ကောင်း အပုန်းကောင်းဆိုတော့ သူ့ကိုဖမ်းရတာမလွယ်ဘူး။ ဥာဏ်နဲ့ဖမ်းမှ မိတယ်။ ဘုရားတောင်မှ ဗောဓိပင်နဲ့ ရွှေပလ္လင်ပေါ်ရောက်မှ တဏှာကို မင်းအကြောင်းကောင်းကောင်းသိပြီ၊ နောက်ကို မင်းဘယ်တော့မှ ငါ့ကို ဒုက္ခပေးလို့ မရတော့ဘူးလို့ ကြွေးကြော်ရဲတာ။ ခင်ဗျားတို့ကတော့ တဏှာကို ခေါင်းငုံ့ပြီး ခံနေတယ်။ မခက်ဘူးလား။ ဒီတော့ ဒီတဏှာကိုသတ်ရမယ်။
တဏှာကို သတ်တော့မယ်ဆိုရင် ဒီတဏှာ မှီနေတဲ့ ကပ်နေတဲ့ နေရာကိုရှာရမယ်။ ဒီ တဏှာက ဘယ်နေရာတွေမှာ ကပ်နေသတုံး။ ဒီတဏှာက ခင်ဗျားတို့ သန္တာန်မှာရှိတဲ့ မျက်လုံး၊ နား၊ နှာခေါင်း၊ လျှာ၊ ကိုယ်၊ စိတ်ဆိုတဲ့ ဒွါရခြောက်ပါး(အတွင်းအာယတန ၆-ပါး)မှာ ကပ်နေတယ်။ ပြီးတော့ “ရူပါရုံ”စတဲ့ အာရုံ ၆-ပါး(အပြင်အာယတန ၆-ပါး)မှာလဲ ကပ်နေတယ်။ ပြီးတော့ ဒွါရ ၆-ပါးနဲ့ အာရုံ ၆-ပါး အသီးသီးတွေ့ဆုံလို့ သိလာတဲ့ “မြင်စိတ်၊ ကြားစိတ်၊ နံစိတ်၊ စားစိတ်၊ တွေ့ထိစိတ်၊ ကြံသိစိတ်”ဆိုတဲ့ စက္ခုဝိညာဏ် စတဲ့ ၀ိညာဏ် ၆-ပါးမှာလဲ ကပ်နေတယ်။ ဒီတော့ တဏှာကပ်နေတဲ့ နေရာဟာ အချုပ်အားဖြင့် ၁၈-ပါးတောင်ရှိနေတာ။ အို ..... တစ်ကိုယ်လုံးကို ဒီ တဏှာကကပ်နေတာ။ ဒီတော့ ဒီတဏှာကို သတ်ရမယ်။ ဘယ်လိုသတ်မလဲ။ ၀ိပဿနာလုပ်ပြီးသတ်ရမယ်။ ဒီတဏှာနေတဲ့ ၁၈-နေရာကို ၀ိပဿနာဥာဏ်နဲ့ ဖြစ်ပျက်အနိစ္စ၊ ဒုက္ခ၊ အနတ္တတွေ မြင်အောင်ရှုရမယ်။ ဒါတွေမြင်သိလာတော့ ဒီ ၁၈-ပါးသောအရာတွေကို သာယာနှစ်သက်မှုမရှိတော့ဘူး။ ရွံ့မုန်းလာမယ်။ မရချင်တော့ဘူး။ ဒါတွေမရှိတာကောင်းတယ်လို့ သိလာတော့ တဏှာဟာ တဖြည်းဖြည်း ပါးပါးသွားပြီး၊ နောက်ဆုံးလုံးဝချုပ်သွားမယ်။ အဲ တဏှာချုပ်ရင် နိဗ္ဗာန်ရောက်တာပဲ။ ဒါဖြင့် ၀ိပဿနာလုပ်ကြပေတော့။
မိုးကုတ်ဆရာတော်ဘုရားကြီး ၏ သြ၀ါဒတရားများ
(၁၃၁၈-ခု၊ တော်သလင်းလဆန်း ၁၀-ရက်နေ့၌ ဟောကြားသည်)
No comments:
Post a Comment