ဗုဒ္ဓဘာသာ မြန်မာလူမျိုးတိုင်းဟာ နိဗ္ဗာန်သိဖို့အရေးကြီးတယ်။ နိဗ္ဗာန်ကိုမသိပဲနဲ့ ရမ်းပြီးရချင်သူနဲ့၊ နိဗ္ဗာန်ကို သိပြီးမှ တကယ်ရချင်သူဟာ မတူဘူး။ ကွားခြားတယ်။ ပြောသံကြားနဲ့ နိဗ္ဗာန်ကိုလိုချင်တာက အဟုတ်လိုချင်လို့ မဟုတ်ပဲ။ ထုံးစံအတိုင်း ရချင်သာတာဖြစ်နေတယ်။ နိဗ္ဗာန်ကို သေသေချာချာမသိတော့ ရချင်မှန်းမသိဘူး။ လှူတုန်းမှာ နိဗ္ဗာန်ရောက်ရပါလို၏လို့ အသံထွက်ပေမယ့် စိတ်ထဲကတော့ မပါဘူး။ ဒါဟာ နိဗ္ဗာန်ရဲ့အရသာကို မသိလို့ပဲ။ ဒါကြောင့် နိဗ္ဗာန်ကို သိဖို့ အရေးကြီးတယ်လို့ ပြောတာ။
ဝိဝေကဋ္ဌော= နှောင့်ယှက်ခြင်းမှ ကင်းဆိတ်ခြင်းသဘော၊ ဆိတ်ငြိမ်ခြင်းသဘော။ နှောင့်ယှက်ခြင်းမှ ကင်းဆိတ်ရာသည် နိဗ္ဗာန်မည်၏။ အနှောင့်အယှက် ဘာမှမရှိပဲ ပင်ကိုယ်သဘောအားဖြင့် ကြည်လင်အေးမြပြီး ဘယ်သူ (ဘယ်တရား)ကမှ မနှောင့်ယှက်တဲ့ နေရာမျိုးကို နိဗ္ဗာန်ခေါ်တယ်။ နိဗ္ဗာန်အကြောင်း ပြောမယ့်ကြံရင် နှောင့်ယှက်မှုကိုသိမှ သဘောကျမယ်။
အခု ခင်ဗျားတို့ နေထိုင်ကြရတာက အနှောင့်အယှက်နဲ့ အမြဲဒွန်တွဲနေတယ်။ ဘာတွေ နှောင့်ယှက်သလဲ။ တရားနာနေစဉ်မှာ ခန္ဓာကိုယ်ကြီးဟာ ဟိုဘက်ပြောင်းလိုက်၊ ဒီဘက်ပြောင်းလိုက်၊ ကြာကြာဖိထိုင်ထားလို့ ထုံကျင်ကိုက်ခဲလာကြတာတွေဟာ အနှောင့်အယှက်မကင်းလို့ပေါ့။ ဒီ ခန္ဓာကြီးဟာ ဘယ်လိုထားလို့မှ ကြာရှည်မရဘူး။ ဘာကြောင့် အနှောင့်အယှက်တွေများလို့။ တော်တော်ကြာ အပူက နှောင့်ယှက်လိုက်၊ အအေးက နှောင့်ယှက်လိုက်၊ ကျင်ကြီးကျင်ငယ်တွေက နှောင့်ယှက်လိုက်၊ ဆာလောင်မွတ်သိပ်မှုတွေက နှောင့်ယှက်လိုက်၊ ၀မ်းထဲရှိ လေတွေကနှောင့်ယှက်လိုက်၊ အပြင်ဘက်လည်း မှက်ခြင်ယင်အစရှိတဲ့ ရန်သူတွေက နှောင့်ယှက်လိုက်၊ ဝေဒနာအမျိုးမျိုးက နှောင့်ယှက်လိုက်နဲ့ အငြိမ်ကိုမနေရဘူး။
ဒီလို အနှောင့်အယှက်ကင်းတဲ့ဆီ သွားဖို့ရာအတွက် ၀ိပဿနာအားထုတ်ပြန်ရင်လဲ လိုရင်းပန်းတိုင်ကိုသိမှ စိတ်အားပြင်းပြမယ်။ နှောင့်ယှက်ခြင်းကင်းတာ သိထားမှ နိဗ္ဗာန်ကို သဘောကျမယ်။ နိဗ္ဗာန်ဟာ ၀ိဝေကဋ္ဌသဘောရှိတယ်။ ၀ိဝေကဋ္ဌဆိုတာ နှောင့်ယှက်ခြင်း ရှုပ်ယှက်ခြင်းမှ ကင်းဆိတ်ပြီး ဆိတ်ငြိမ်ခြင်း အေးချမ်းခြင်းသဘောပဲ။ နှောင့်ယှက်တဲ့ ရှုပ်ယှက်ခတ်တဲ့သဘောတွေဟာ ရုပ်နာမ်တွေပဲ။ ရုပ်နာမ်ဆိုတာဟာ ခဏခဏဖြစ်ပျက်နေတဲ့ အနိစ္စတရား၊ ဒုက္ခတရား၊ အနတ္တတရားတွေပဲ။ ဉာဏ်မျက်လုံးပါတဲ့ပုဂ္ဂိုလ်မှာ ဘယ်အချိန် ကြည့်လိုက်ကြည့်လိုက် ဉာဏ်မျက်လုံးထဲမှာ ရှုပ်ယှက်ခတ်နေတာပဲ။ ဉာဏ်မျက်လုံးနဲ့ ကြည့်လိုက်တဲ့အခါ နိဗ္ဗာန်မှာ ဒီလိုရှုပ်ယှက်ခတ်တဲ့သဘောမရှိဘူး။ ရှင်းလင်းကြည်လင်နေတယ်။ ဆိတ်ငြိမ်တဲ့ အေးချမ်းတဲ့ နေရာပဲလို့ ဉာဏ်မျက်လုံးနဲ့ကြည့်ရင် မြင်တယ်။ ၀ိပဿနာရှုတဲ့ကိစ္စ ပြီးဆုံးသွားတော့၊ ရှုပ်ယှက်ခတ်နေတာမှကင်းလွတ်ပြီး ဒီနေရာမှာပင် ရှုပ်ယှက်ခတ် ချုပ်ငြိမ်းရုပ်သိမ်းပြီး ငြိမ်းအေးငြိမ်သက်နေတဲ့ သဘောပါလားဆိုတာ ကိုယ့်ဉာဏ်ထဲမှာ မြင်လာလိမ့်မယ်။
နိဗ္ဗာန်ကို ဉာဏ်မျက်စိနဲ့ အာရုံပြုသောအားဖြင့် ကြည့်လိုက်ရင် ကိလေသာအနှောင့်အယှက်တွေမှ ကင်းဝေး၊ ကံအနှောင့်အယှက်တွေမှ ကင်းဝေး၊ ရုပ်နာမ်ခန္ဓာ အနှောင့်အယှက်တွေမှ ကင်းဝေးတာကို သိမြင်ရမယ်။ နိဗ္ဗာန်မရောက်သေးခင်မှာ ကိလေသာဘေးတွေ ကြောက်နေရသေးတယ်။ အ၀ိဇ္ဇာ၊ တဏှာတို့၏ နှောင့်ယှက်မှုတွေ ကြောက်နေရသေးတယ်။ ကံဘေးကိုလဲ ကြောက်နေရသေးတယ်။ မကောင်းတဲ့ကံ ၀င်နှောင့်ယှက်လိုက်ရင် ဗြုံးကနဲ ချောက်ကျဦးမှာလားလို့ ပူဆွေးရဦးမယ်။ ရုပ်နာမ်ခန္ဓာကြီး ဆင်းရဲဒုက္ခ ဘေးအန္တရာယ်အမျိုးမျိုးမှ ကင်းဝေးဖို့လဲ ကြောင့်ကြနေရတယ်။ နိဗ္ဗာန်မှာ ဒီသဘောဆိုးတွေမရှိတော့ဘူးလို့ ဉာဏ်မျက်စိထဲမှာ မြင်ရတယ်။ ဒီတော့ နိဗ္ဗာန်ဟာ (၁) ကိလေသာတည်းဟူသော အနှောင့်အယှက်၊ (၂) ကံတည်းဟူသော အနှောင့်အယှက်၊ (၃) ကိလေသာကံတို့၏ အကျိုးတရားဖြစ်တဲ့ ရုပ်နာမ်ခန္ဓာတည်းဟူသော အနှောင့်အယှက်၊ ဒီ အနှောင့်အယှက် ၃-မျိုး (၀ဋ် ၃-မျိုး)မှ အကုန်ကင်းဆိတ်ပြီးနေတဲ့သဘောရှိတယ်။
ဝေဒနာနုပဿနာ။ ။ ဒီနေရာမှာ ၀ိပဿနာအလုပ်ကလေးနဲ့ရှင်းပြမှ နှောင့်ယှက်ခြင်းမှ ကင်းဆိတ်တဲ့သဘောဟာ နိဗ္ဗာန်ပါလားဆိုတာ ရှင်းသွားမယ်။ ဒါကြောင့် နိဗ္ဗာန်ရောက်ကြောင်း တရားကျင့်စဉ်ကလေးကို ရှေးဦးစွာပြမယ်။ ဘုန်းကြီးက ဝေဒနာနုပဿနာ၊ စိတ္တာနုပဿနာ၊ ဓမ္မာနုပဿနာဆိုတဲ့ အနုပဿနာ ၃-ပါးနဲ့ နိဗ္ဗာန်ရောက်ကြောင်းကိုပြမယ်။ ဒီ ၃-ပါးမှာ ဝေဒနာနုပဿနာက အရေးကြီးဆုံးပဲ။ ဝေဒနာဟာ စေတသိက်ပဲ။ သူဟာ အခြားစေတသိက်တွေနဲ့ တွဲပြီးဖြစ်တယ်။ အဲဒီ စေတသိက်တွေဟာ ဓမ္မာနုပဿနာဖြစ်တယ်။ ပြီးတော့ ဝေဒနာဟာ ဘယ်တော့မှ စိတ်နဲ့ကင်းပြီးမဖြစ်တော့ ဝေဒနာဖြစ်တိုင်း စိတ်လဲအမြဲပါတယ်။ ဒီတော့ စိတ်ဟာ စိတ္တာနုပဿနာ ၃-ပါးဖြစ်တယ်။ ဒါဖြင့် ဝေဒနာရှုရင် ဝေဒနာနုပဿနာ၊ ဓမ္မာနုပဿနာ၊ စိတ္တာနုပဿနာ ၃-ပါးစလုံးပါတယ်လို့မှတ်။ သတိပဋ္ဌာန် ၄-ပါးမှာ ၃-ပါးစလုံး တပြိုင်နက် ပြီးတဲ့တရားဟာ ဝေဒနာနုပဿနာပဲလို့မှတ်။
ဝေဒနာမှာ သုခဝေဒနာ၊ ဒုက္ခဝေဒနာ၊ ဥပေက္ခာဝေဒနာလို့ ၃-မျိုးရှိတယ်။ ခန္ဓာကိုယ်ထဲမှာ ဝေဒနာက္ခန္ဓာ= ဝေဒနာအစုကြီးရှိတယ်။ ဒီဝေဒနာ ၃-မျိုးဟာ ၃-မျိုးစလုံးတပြိုင်နက်မဖြစ်ဘူး။ တစ်ခုစီ (တလှည့်စီ)သာဖြစ်နိုင်, ရှိနိုင်တယ်။ ဥပမာ- ဒုက္ခဝေဒနာ ပေါ်တဲ့အခါ ကျန်ဝေဒနာ ၂-ပါးမရှိဘူး။ ခင်ဗျားတို့ သန္တာန်မှာ ဝေဒနာကင်းတဲ့ အချိန်မရှိဘူး။ ဝေဒနာ ၃-ခု တခုခုတော့ ရှိနေတာပဲ။ အခု ဝေဒနာကို ရှုတော့မယ်။ ဝေဒနာ၏ သက်တမ်းဟာ ၁-နဲ့ ၂-ပဲ၊ အဖြစ်နဲ့အပျက်ပဲ ရှိတယ်လို့မှတ်။ ၁-မှာ ဖြစ်ပြီး ၂-မှာပျက်တယ်။ ဝေဒနာတွေ တခုခုပေါ်လာတဲ့အခါ၊ ဥပမာ - ခန္ဓာကိုယ်မှာ ယားတာတွေပေါ်လာရင်၊ ယားတဲ့နေရာကလေးကိုစိုက်ကြည့်၊ တော်တော်ကြာ ယားတာကလေးက ဖြစ်ပြီး ပျက်သွားတာပဲ၊ မရှိတော့ဘူး-လို့သိတယ်။ မရှိတာကို အနိစ္စ၊ သိတာကို မဂ္ဂလို့ခေါ်တယ်။ ဒီမှာ ရှုရမှာက အနိစ္စရှုရမှာ။ ဝေဒနာရှုလို့ ဆိုလိုတာမဟုတ်ဘူး။ တကယ်တော့ ဝေဒနာရှုရမှာမဟုတ်၊ ဝေဒနာပျက်တာ- အနိစ္စဖြစ်တာကို ရှုရမှာ၊ ဖြစ်ပျက်ကိုရှုရမှာ၊ ရှုခိုင်းတာ။
ရှုပုံလေး ရှင်းပြမယ်။ ဥပမာ - သုခဝေဒနာ= ချမ်းသာတာလေး ကိုယ်ပေါ်မှာ ပေါ်တယ်။ ကိုယ်ပေါ်မှာပေါ်တဲ့ ဝေဒနာလို့ပဲမှတ်ထား။ ဝေဒနာကိုယ်ပေါ်မှာ ပေါ်တုန်း ၀မ်းထဲမှာ ရှုတဲ့စိတ်က မပေါ်နိုင်ဘူး။ သုခဝေဒနာက ကာယဒွါရ= ကိုယ်ပေါ်မှာပေါ်တယ်။ ရှုတဲ့စိတ်က မနောဒွါရ= ၀မ်းထဲမှာ = ဟဒယ၀တ္ထုပေါ်မှာ ပေါ်တယ်။ ၀မ်းထဲကနေပြီး ဟဒယ၀တ္ထုပေါ်ကနေ ရှုရတော့၊ ဝေဒနာရှိတုန်း ရှုတဲ့ဉာဏ်က ပေါ်တာ မဟုတ်ဘူး။ ဝေဒနာမရှိတဲ့အခါမှ ပေါ်တာ။ ထို့ကြောင့် ဝေဒနာမရှိတာကို အရှုခိုင်းတာ၊ ဒါဖြင့် မရှိတာကအနိစ္စ၊ မရှိမှန်းသိတာက မဂ္ဂ လို့မှတ်၊ ဝေဒနာမရှိတဲ့အချိန်မှ ဒီကဉာဏ်က ရှုရတာဖြစ်လို့ ဝေဒနာကိုတွေ့တာမဟုတ်။ မရှိတာကိုတွေ့တာ။ ဒါဖြင့် ဝေဒနာနုပဿနာဆိုတာ ဆိုင်းဘုတ်ဆွဲတာသက်သက်ပဲ၊ တကယ်တော့ ဖြစ်ပျက်အနိစ္စကို ရှုခိုင်းတာ။
အရှုပ်ရှု။ ။ ဝေဒနာစတဲ့ ရုပ်နာမ်ဓမ္မတွေ ဖြစ်ပြီးပျက်၊ ဖြစ်ပြီးပျက်သွားတာတွေဟာ ရှုပ်ယှက်ခတ်နေတာပဲ။ ၀ိပဿနာရှုတဲ့နေရာမှာ အဲဒါတွေကို ကြည့်ကြည့်ပေးရတာပဲ။ ဒီတော့ ၀ိပဿနာ ရှုတာဟူသည် နှောင့်ယှက်တာတွေ= ရှုပ်ယှက်ခတ်နေတာတွေကို အရှုခိုင်းတာပဲလို့မှတ်။ ဟိုနေရာကြည့်လိုက်လဲ ဖြစ်ပြီးပျက်သွားတာတွေ တွေ့တာပဲ။ ဒီနေရာကြည့်လိုက်တော့လဲ ဖြစ်ပြီးပျက်သွားတာတွေ တွေ့တာပဲ။ ကြည့်ချင်တဲ့ဆီကြည့် ဖြစ်ပျက်တွေချည်း တွေ့မှာပဲ။ ၀ိပဿနာရှုလိုက်တော့ ဖြစ်ပျက်တည်းဟူသော အနှောင့်အယှက်တွေချည်း ဉာဏ်ထဲမှာ အမြဲတမ်းမြင်နေရတာပဲ။ ၀ိပဿနာ ဉာဏ်အောက်မှာ ဖြစ်ပျက်တွေဟာ ရှုပ်နေတာပဲ။ ရှုပ်ယှက်ခတ်တာတွေဟာ ဒုက္ခတွေဖြစ်တော့၊ ၀ိပဿနာ ရှုတယ်ဆိုတာ ဒုက္ခအကြည့်ခိုင်းတာပဲ။ နိဗ္ဗာန်ဆိုတာ ဒီရုပ်နာမ်ဓမ္မ ရှုပ်ယှက်ခတ်နေတာတွေမှ ရှင်းလင်းနေတဲ့ သဘောဖြစ်တော့ နိဗ္ဗာန်ဆိုတာ အရှင်းဓာတ် အလင်းဓာတ်ပဲ။ ဒီတော့ အရှုပ်မြင်မှ အရှင်းကို သိနိုင်မယ်။ သဘောကျနိုင်မယ်။ အိမ်ဝင်းထဲက အမှိုက်တွေ ရှုပ်ယှက်ခတ်နေတာ မနက်ကျ မြူနီစပယ်က လာသိမ်းသွားလို့ ရှင်းသွားတာကို မြင်ရသလိုပဲ။ ရှုပ်တာမြင်ပြီးမှ ရှင်းတာကို သဘောကျမယ်၊ ရှုပ်တာမြင်မှ ရှင်းတာကြိုက်မယ်။
ဝိပဿနာဉာဏ်နဲ့ ခန္ဓာကိုယ်ထဲကိုကြည့်လိုက်တော့ ဝေဒနာတွေဟာ အခုမွေး အခုသေ(အခုဖြစ်၊ အခုပျက်) တာချည်း တွေ့ရမယ်။ ၀ိပဿနာ ရှုဖန်များလို့ ၀ိပဿနာ ဉာဏ်က စိပ်လေလေ ဖြစ်ပျက်အရှုပ်တွေက များလေလေပဲ။ မိမိခန္ဓာကိုယ်ကို ၀ိပဿနာဉာဏ် မှန်ပြောင်းကြီးနဲ့ ကြည့်မှ ဒီရုပ်နာမ်ဓမ္မတွေ ဖြစ်လိုက်ပျက်လိုက် ဖြစ်လိုက်ပျက်လိုက်နဲ့ ရှုပ်ယှက်ခတ်နေတာကို မြင်ရမှာ။ ဒီလိုမကြည့်ရင် မမြင်ရဘူး။ မမြင်တော့ ရှုပ်တာ ရှင်းတာကိုလဲ မသိဘူး။ မသိတော့ ရှုပ်တာကို မကြိုက်ရမှန်း၊ ရှင်းတာကို ကြိုက်ရမှန်းလဲ မသိတော့ဘူး။ ဒီတော့ ၀ိပဿနာမရှုရင် ရုပ်နာမ်ဓမ္မတွေ မကောင်းမှန်း၊ နိဗ္ဗာန်ကောင်းမှန်းလဲ မသိတော့ဘူး။ မသိရင် နိဗ္ဗာန်ဆိုတာကို ဘယ်သူမှ အိမ်မက်မက်မှာ မဟုတ်ဘူး။ လိုချင်မှာမဟုတ်ဘူး။ ဒါကြောင့် ၀ိပဿနာဉာဏ်နဲ့ ရုပ်နာမ်ဓမ္မတို့၏ ဖြစ်ပျက်အရှုပ်တွေကို ရှုနေခြင်းသည် ဒုက္ခကိုရွံမုန်းပြီး နိဗ္ဗာန်လိုချင်တဲ့စိတ်တွေ တဖွားဖွား ပေါ်လာပါလိမ့်မယ်။
ဒီတော့ ၀ိပဿနာဉာဏ်နဲ့ ရုပ်နာမ်ဓမ္မတို့၏ ဖြစ်မှု-ပျက်မှု အရှုပ်တွေကို စိုက်စိုက်မတ်မတ် ရှုနေရမယ်။ ရှုဖန်များလာရင် ဒီဖြစ်ပျက်တွေကို မကြည့်ချင်တော့ဘူးဆိုတဲ့ အမြင်ရလာတယ်။ သို့သော်လဲ ဒါတွေကိုမကြည့်ချင်ပေမယ့် မှိတ်သာရှု။ မုန်းလျက်နဲ့ပဲ ပေရှုရတယ်။ အဲဒီတော့ ခုနက ဖြစ်ပျက် ရှုပ်ယှက်ခတ်တာတွေ မြင်တာက ယထာဘူတဉာဏ်၊ ရှုပ်ယှက်ခတ်တာတွေ မကြည့်ချင်ပဲနဲ့ ကြည့်နေရတာက နိဗ္ဗိန္ဒဉာဏ်၊ ရှုဖန်များလို့ မိမိခန္ဓာကြီးဟာ မုန်းစရာကြီးပါလားလို့ ဉာဏ်အမြင်ပြောင်းလာရင် ဒါ နိဗ္ဗိန္ဒဉာဏ်ရောက်လာတာပဲ။ ငြီးငွေ့တာဟာ သန်လေလေ ကောင်းလေလေပဲကွလို့ ဘုရားကဟောထားတယ်။ ငြီးငွေ့တာသန်ရင် မလိုချင်တာမြင်တာပဲကွတဲ့။ ငြီးငွေ့ပေမယ့်လဲ ပေစိုက်ပြီးရှုနေ၊ နောက်ရှုရာကနေ ဒီခန္ဓာကြီးဟာ ဒုက္ခအစစ်ပါပဲလို့ ဆုံးဖြတ်ချက်ချလိုက်တဲ့အချိန်မှာ ဖျတ်ဆို ဖြစ်ပျက် (ဆိုတဲ့ဒုက္ခသစ္စာဟာ) ချုပ်သွားတယ်။ ချုပ်သွားတော့ ဖြစ်ပျက်တွေ မတွေ့တော့ဘူး။ မတွေ့တော့ ဒီနေရာမှာ ဖြစ်ပျက်မရှိတာပဲ ကျန်တော့တယ်။ အဲဒီ ဖြစ်ပျက်မရှိတာ (ချုပ်သွားတာ ဆုံးသွားတာဟာ)ကို မြင်တဲ့ဉာဏ်ဟာ မဂ် ဉာဏ်ပဲ။ ဖြစ်ပျက်တွေလဲ ချုပ်သွားပါရော ဒီမဂ်ဉာဏ်ပေါ်လာပြီး ဖြစ်ပျက်အရှုပ်တွေ ရှင်းလင်းနေတဲ့ နိဗ္ဗာန်ကို မြင်ရတော့တာပဲ။
ဖြစ်ပြီးပျက်တဲ့ တရားတွေဆိုတာ ရုပ်နာမ် ဓမ္မတွေပဲ (၀ိပါက၀ဋ်ပဲ) ဒီရုပ်နာမ်ဓမ္မတွေဟာ ကုသိုလ်ကံ အကုသိုလ်ကံဆိုတဲ့ ကံကြောင့် (ကမ္မ၀ဋ်ကြောင့်) ဖြစ်လာတာပဲ။ ဒီကံဆိုတာ= ကမ္မ၀ဋ် ဆိုတာလဲ အ၀ိဇ္ဇာ, တဏှာဆိုတဲ့ ကိလေသာ အရင်းခံ ၂-ပါး (ကိလေသ၀ဋ်)ကြောင့် ဖြစ်ရတာပဲ။ ဒီတော့ ရုပ်နာမ်ဓမ္မတွေ ရှုဖန်များလို့ နောက်မုန်းလာပြီး ဒီခန္ဓာကြီးဟာ ဒုက္ခအစစ်ပါပဲလို့ မြင်လိုက်ပါရော၊ ဖြစ်ပျက် ဒုက္ခသစ္စာလဲ ချုပ်သွားတာပဲ။ ဒီ ဖြစ်ပျက်ဒုက္ခသစ္စာကြီး ချုပ်သွားတာဟာ အရင်းစစ်တော့ အမြစ်မြေကဆိုသလို အကြောင်းဖြစ်တဲ့ (တဏှာ, အ၀ိဇ္ဇာ)ဆိုတဲ့ ကိလေသာချုပ်သွားလို့ အကျိုးဖြစ်တဲ့ ဒုက္ခချုပ်သွားတာ (တဏှာ နိရောဓာ ဒုက္ခနိရောဓော ပေါ့)။ မဂ်ကနေပြီး ခွာ ပယ်လိုက်တော့ တဏှာချုပ်သွားတယ်။ အကြောင်း တဏှာလဲချုပ်ရော အကျိုးဒုက္ခလဲ ချုပ်သွားရတာပဲ။ ကိလေသာဆိုတဲ့ အမြစ်ကြီးကို မဂ်ကဖြတ်လိုက်တာနဲ့ တပြိုင်နက် ပင်မနဲ့တူတဲ့ ရုပ်နာမ်တို့၏ ရှုပ်ယှက်ခတ်တာကြီးဟာ ပျောက်ထွက်သွားတယ်။ ၀ိပဿနာဉာဏ်က ဖြစ်ပျက်ရှုပ်တာတွေကိုမြင်တယ်။ မဂ်ဉာဏ်ကတော့ ဖြစ်ပျက်အရှုပ်မှ ရှင်းသွားတာကိုမြင်တယ်။ ဒီတော့ မဂ်ဉာဏ်ဟာ ကိလေသာရုပ်နာမ် အရှုပ်တွေလဲ ရှင်းပစ်တယ်၊ အဲဒါတွေ ရှင်းသွားတဲ့ ဆိတ်ငြိမ်ချမ်းသာတဲ့ နိဗ္ဗာန်ကိုလဲ မြင်တယ်။ မျက်မှောက်ပြုတယ်လို့မှတ်။
မိုးကုတ်ဆရာတော်ဘုရားကြီး၏ သစ္စာအနက် ၁၆-ချက် တရားတော်များမှ
No comments:
Post a Comment