မဂ္ဂသစ္စာ၏ နိယျာနဋ္ဌအနက် (၁)
မဂ္ဂသစ္စာဆိုတာ နိယျာနဋ္ဌ သဘောရှိတယ်။ နိယျနဋ္ဌဆိုတာ ၀ဋ် ၃-ပါးမှ ထွက်မြောက်ကြောင်းတရား၊ ၀ဋ် ၃-ပါးမှ ထုတ်ဆောင်နိုင်တဲ့ မဂ္ဂင် ၈-ပါးလို့ ဆိုလိုတယ်။ မဂ္ဂင် ၈-ပါးဟာ ၀ဋ် ၃-ပါးမှ ဆန်တက်၍ နိဗ္ဗာန်ဘက်သို့ ထွက်မြောက်နိုင်ကြောင်း လမ်းကောင်းလမ်းမှန် ဖြစ်တရားပဲ။ ဒီမဂ္ဂင် ၈-ပါးက ၀ဋ် ၃-ပါးထဲမှ သတ္တ၀ါတွေကို ထုတ်ဆောင်တယ်။ ဒီလိုထုတ်ဆောင်တဲ့ နေရာမှာ ခင်ဗျားတို့က ထုတ်ဆောင်ပါလို့ ခိုင်းဖို့မလိုဘူး။ သူ့သဘော သူ့ဓမ္မတာအတိုင်း ဆောင်သွားတာပဲ။ ၀ိပဿနာလုပ်တော့ မဂ္ဂင်တွေ ၀မ်းထဲရောက်လာပြီး အားထုတ်တဲ့ပုဂ္ဂိုလ်ကို သူ့သဘောအတိုင်း ၀ဋ် ၃-ပါးမှ ထုတ်ဆောင်ပြီး နိဗ္ဗာန်သို့ ပို့ပေးတာပဲ။မဂ္ဂင်လမ်း ၂-မျိုး။ ။ မဂ္ဂင်လမ်းမှာ အပါယ်ပို့ဆောင်တဲ့ မဂ္ဂင်လမ်း၊ နိဗ္ဗာန်ပို့ဆောင်တဲ့ မဂ္ဂင်လမ်းရယ်လို့ ၂-မျိုးရှိတယ်။ ထုတ်ဆောင်တတ်တဲ့တရား ၂-မျိုး ရှိတယ်လို့မှတ်။ ထုတ်ဆောင်တတ်တဲ့တရားက အကောင်းအဆိုး ၂-မျိုးရှိတော့ ခင်ဗျားတို့က အပါယ်ရောက်ကြောင်း အဆိုးတရားတွေကို ကြိုးစားရင် အဲဒီတရားက ခင်ဗျားတို့ကို အပါယ်သို့ ထုတ်ဆောင်သွားမှာပဲ။ နိဗ္ဗာန်ရောက်ကြောင်း အကောင်းတရားတွေကို ကြိုးစားရင် အဲဒီတရားက ခင်ဗျားတို့ကို နိဗ္ဗာန်သို့ ထုတ်ဆောင်ပေးမှာပဲ။ ဒါ ဓမ္မနိယာမလို့ခေါ်တယ်။ ဓမ္မနိယာမဆိုတာ သူ့သဘောနဲ့ သူဆောင်သွားတယ်လို့မှတ်။ ရှောင်လို့ ကွင်းလို့မရဘူး။ မကောင်းတဲ့ တရားလုပ်ရင် အပါယ်သွားမှာပဲ။ တားလို့မရဘူး။ ကောင်းတဲ့တရားလုပ်ရင် နိဗ္ဗာန်ရောက်မှာပဲ။ ဆုတောင်းနေဖို့ မလိုဘူး။ ဆုတောင်းလို့ မရဘူး။ အလုပ်ကမှ ထုတ်ဆောင်နိုင်တာကို နှုတ်နဲ့ပြောနေလို့တော့ ဘယ်နည်းနဲ့မှမရဘူး။
ဝဋ် ၃-ပါး။ ။ ခင်ဗျားတို့ ခန္ဓာထဲမှာ ဝေဒနာတွေဟာ အမြဲရှိနေတယ်။ ဒီဝေဒနာတွေဟာ ၃-မျိုးရှိတယ်။ သုခဝေဒနာဆိုတဲ့ ချမ်းသာတဲ့ဝေဒနာ၊ ဒုက္ခဝေဒနာဆိုတဲ့ ခန္ဓာကိုယ်ထဲမှာ ဆင်းရဲတဲ့ ဝေဒနာ၊ ဥပေက္ခာ ဝေဒနာဆိုတဲ့ ချမ်းသာဆင်းရဲ ကင်းတဲ့ဝေဒနာ၊ အဲ ... တကိုယ်လုံးမှာ ဒီဝေဒနာ ၃-မျိုးဟာ လှည့်ဖြစ်နေတာပဲ။ ဖြစ်တော့ (၁) သုခဝေဒနာဖြစ်ရင် တဏှာ ဖြစ်မယ်။ (၂) ဒုက္ခဝေဒနာဖြစ်ရင် ဒေါသ ဖြစ်မယ်။ (၃) ဥပေက္ခာဝေဒနာဖြစ်ရင် မောဟ ဖြစ်မယ်။ ဒီတော့ ဝေဒနာ ၃-ပါးကနေပြီး လောဘ၊ ဒေါသ၊ မောဟဆိုတဲ့ ကိလေသာ ၃-မျိုး ဖြစ်နိုင်တယ်။ ဒီ ကိလေသာ ၃-ပါးဟာ ကိလေသ၀ဋ်လို့ ခေါ်တယ်။ ဒီ ဝေဒနာ ၃-ပါးကို ဖြစ်ပျက်မရှုတဲ့ ပုဂ္ဂိုလ်မှာ ကိလေသ၀ဋ် ၃-ပါးဖြစ်တယ်။ သုခ ဝေဒနာ၊ ချမ်းသာတယ် သဘောကျတယ်ဆိုရင် တဏှာက လာတာပဲ။ ဒုက္ခဝေဒနာ ဆင်းရဲတယ် မကျေနပ်ဘူးဆိုရင် ဒေါသက တခါတည်းလာတာပဲ။ ဥပေက္ခာဝေဒနာ ချမ်းသာ၊ ဆင်းရဲ မသိဘူးဆိုရင် မောဟ (အ၀ိဇ္ဇာ)လာတာပဲ။ ဥပေက္ခာ ဝေဒနာဟာ ခန္ဓာကိုယ်ထဲ ရောက်တဲ့အခါ အင်မတန် သိမ်မွေ့တယ်။ သိမ်မွေ့တော့ မသိလိုက်ဘူး။ မသိလိုက်တော့ မောဟ လာတယ်။
ဝေဒနာ ၃-ပါး ပေါ်လာတာကို ဖြစ်ပျက်မရှုလိုက်ရင် ကိလေ၀၀ဋ်ဖြစ်လာတယ်။ ဝေဒနာ ၃-ပါးဟာ ခင်ဗျားတို့ ခန္ဓာထဲမှာ ခဏခဏအပြောင်းအလဲနဲ့ (တလှည့်စီ) အဆက်မပြတ် အချိန်မရွေးပေါ်လာနေတယ်။ ဒါတွေကို ဖြစ်ပျက်မရှုလိုက်တဲ့အတွက် တဏှာ (ဥပါဒါန်) ဒေါသ အ၀ိဇ္ဇာဆိုတဲ့ ကိလေသ၀ဋ် လာတာပဲ။ ကိလေသ၀ဋ်လာရင် ကမ္မဘ၀ သင်္ခါရဆိုတဲ့ ကမ္မ၀ဋ်လာမှာပဲ။ ကမ္မ၀ဋ်လာရင် ခန္ဓာငါးပါး ဇာတိ ဆိုတဲ့ ၀ိပါက၀ဋ် လာပါလိမ့်မယ်။ ဒီတော့ ဝေဒနာကို ဖြစ်ပျက်မရှုလိုက်တဲ့အတွက် ကိလေသ၀ဋ် ကမ္မ၀ဋ် ၀ိပါက၀ဋ် ဆိုတဲ့ ၀ဋ်သုံးမျိုးဟာ ဆက်တိုက်လာတော့တာပဲ။
ဒီတော့ ဝေဒနာမရှုလိုက်တဲ့အတွက် ၀ဋ် ၃-ပါးလည်ရတယ်လို့မှတ်။ ဇာတိဆိုတဲ့ ၀ိပါက၀ဋ်ထဲရောက်ရင်တော့ အိုမှု ဇရာ၊ နာမှု ဗျာဓိ၊ သေမှု မရဏဆိုတဲ့ ဆင်းရဲမှုတွေဟာ ပြေးမလွတ်တော့ဘူး။ ဒုက္ခ၀ဋ်ကြီးထဲ ရောက်သွားတော့တာပဲ။ ခင်ဗျားတို့ ဒီဝဋ်တွင်း ရောက်နေတာဆိုတော့ ၀ဋ်ကောင် အစစ်ပေါ့။ ၀ဋ်ကောင်ဖြစ်ပေမယ့် ခင်ဗျားတို့က ကိုယ့်ကိုယ်ကို ၀ဋ်ကောင်မှန်း မသိတော့ ၀ဋ်မကျွတ်ချင်ကြဘူးပေါ့။ ၀ဋ်မကျွတ်ချင်လို့ပေါ့ သားရေး သမီးရေး စီးပွားရေးတွေနဲ့ အချိန်တွေကုန်နေကြတာ။ ဒီတော့ ဒီဝဋ်တွင်းမှ ထုတ်ဆောင်ပေးမယ့် တရားကိုတော့ ခင်ဗျားတို့ ရှာသင့်ပြီ။ မရှာရင် ၀ဋ်ဆင်းရဲတွင်းက ဘယ်တော့မှ ထွက်တော့မှာမဟုတ်ဘူး။ ထွက်လမ်းထွက်ပေါက် မရှိတော့ဘူးလို့မှတ်။
ခင်ဗျားတို့ဟာ ကိုယ့်ကိုယ်ကို ၀ဋ်ကောင်မှန်းမသိတော့၊ အိမ်မှာ စားကာ သောက်ကာ ပျော်ရွှင်စွာနဲ့ နေကြတယ်။ ဒီလိုနေတာဟာ ဟောဒီ ဝေဒနာ ၃-ပါး ပြည့်စုံအောင် ကြိုးစားနေတာပဲ။ ခင်ဗျားတို့ ခက်တယ်။ အနာပေါက်လို့ ပေါက်မှန်းမသိဘူး။ (ဝေဒနာ ၃-မျိုးပေါ်တာဟာ အနာပေါက်တာ)။ အခုကြည့်။ ဝေဒနာ ၃-ပါးကို ဖြစ်ပျက်မရှုတဲ့ ပုဂ္ဂိုလ်မှာ ၀ဋ် ၃-မျိုးလာတယ်။ ရှေးဦးစွာ ကိလေသ၀ဋ် လာတယ်။ ဒီ ကိလေသ၀ဋ်ကြောင့် ကမ္မ၀ဋ်ဖြစ်တယ်။ ကမ္မ၀ဋ်ကြောင့် ၀ိပါက၀ဋ်ဆိုတဲ့ ဇာတိ=ပဋိသန္ဓေ အပါယ်ဇာတိဖြစ်တယ်။ အပါယ်မှာ ပဋိသန္ဓေနေရတယ်။ ဒါဖြင့် ဒီတရားတွေဟာ ခင်ဗျားတို့ကို အပါယ်သို့ ထုတ်ဆောင်ပို့ပေးတာပဲ။ သူ့သဘောနဲ့သူ ထုတ်ဆောင်ပို့ပေးတာ။ ခင်ဗျားတို့ အိပ်နေပေမယ့် မေ့နေပေမယ့် ဒီတရားတွေက မမေ့ဘူး။ သူ့အလုပ်သူလုပ်နေတာပဲ။ ခင်ဗျားတို့ ဒီဓမ္မသဘောကို ရှောင်လို့တိမ်းလို့ မရဘူး။ အပါယ်ပို့မယ့်တရားကတော့ ပို့မှာပဲ။
ခင်ဗျားတို့က ၀ဋ်ဒုက္ခအကြောင်း မသိတော့ လူ့ပြည် နတ်ပြည်ကို ဆုတောင်းကြတယ်။ ဒါ တဏှာလောဘနဲ့ တောင်းနေတာ။ တဏှာစခန်းဖွင့်နေတာ။ တဏှာဆိုတာ ကိလေသ၀ဋ်။ ဒီတော့ နတ်ပြည်ဆုတောင်းတာဟာ ကိလေသ၀ဋ် လုပ်တာပဲ။ ဆုတောင်းတဲ့အခါ စေတနာကံကလဲ ပါလာတော့ ကမ္မ၀ဋ်လုပ်တာလဲဖြစ်တယ်။ ကိုင်း .... ကိလေသ၀ဋ် ကမ္မ၀ဋ်ပါတော့ ၀ိပါက၀ဋ်ဟာ ပြေးမလွတ်တော့ဘူး။ ကုသိုလ်ကံ အရှိန်ကုန်တော့ အပါယ်ရောက်ပြန်တာပဲ။ အပါယ် ၄-ပါးဟာ ခင်ဗျားတို့ “နေအိမ်”ပဲ။ လူ့ပြည် နတ်ပြည်ဆိုတာ အလည်လာပြီး ခဏနေတာပဲ။
တိုက်တွန်းချက်။ ။ ကဲ .... ခင်ဗျားတို့ ၀ဋ် ၃-ပါးအကြောင်း ကောင်းကောင်းသိပြီ၊ နောက်က ဒါတွေမသိလို့ မိုက်ခဲ့တာတွေလဲ များလှပြီ၊ ဒါပေမယ့် ဒီနောက်က မိုက်ခဲ့တာတွေကို ကြောက်မနေပါနဲ့။ ကြောက်စရာမလိုဘူး။ မဂ်ဆိုက်အောင်သာလုပ်။ မဂ်ဆိုက်ရင် နောက်ကအမှားတွေဟာ အဟောသိကံဖြစ်သွားတယ်။ အကျိုးမပေးနိုင်တော့ဘူး။ မုဆိုးကြီးတွေ အင်္ဂုလိမာလလို လူသတ်သမားကြီးတွေဟာ မဂ်အလုပ်လုပ်သွားတာနဲ့ နိဗ္ဗာန်ရောက်သွားတယ်။ နိဗ္ဗာန်ရောက်တော့ သူတို့ရဲ့ နောက်က အမှားတွေ မိုက်မှုတွေဟာ အဟောသိကံဖြစ်သွားတယ်။ ဒီတော့ ဒီမဂ်အလုပ်ဟာ လုပ်သင့်တဲ့အလုပ်ဆိုတာ ပြောဖို့မလိုတော့ပါဘူး။ ဒါကိုမလုပ်တဲ့ ပုဂ္ဂိုလ်မှာတော့ ၀ဋ် ၃-ပါးလာမှာပဲ။ ဖြစ်ပျက်ရှုတဲ့ ပုဂ္ဂိုလ်ကျတော့ ဒီ ၀ဋ် ၃-ပါးက ကျွတ်သွားမယ်။ ဆန်တက်သွားမယ်။ ဒါဟာ နိဗ္ဗာန်ဘက်သို့ ထွက်မြောက်နိုင်ကြောင်း လမ်းကောင်းအစစ်အမှန်ဖြစ်တဲ့ တရားပဲ။ ရှေးက ခင်ဗျားတို့က ဒီတရားမျိုးမနာဖူးဘူး။ မနာဖူးတော့ မသိဘူး။ မသိတော့ မရှုဖြစ် မလုပ်ဖြစ်ဘူး။ မရှုဖြစ်မလုပ်ဖြစ်တော့ ၀ဋ်သင့်ပြီး ၀ဋ်ထဲမှာ လှည့်လည်နေခဲ့တာပဲ။
ဝဋ်သင့်နေတော့ ခင်ဗျားတို့ သွားရင်းလာရင်း နေရင်း ထိုင်ရင်းနဲ့ အိုမှု နာမှု သေမှုကြီးနဲ့ တွဲလျက်ပါနေတယ်။ ခွဲလို့မရဘူး၊ အခုဝဋ်သင့်နေပါလျက်၊ ၀ဋ်သင့်မှန်း သိပါလျက်နဲ့ ၀ဋ်မှထွက်တဲ့တရားကို ဖြည်းဖြည်းမှ လုပ်မယ်ဆိုရင် သေပွဲပြတ်မှာမဟုတ်တော့ဘူး။ မဟုတ်တော့ ဒီထက်မိုက်တာ မရှိတော့ဘူးပေါ့။ ရှေးက ၀ဋ်ထွက်ကြောင်းတရား မနာခဲ့ရလို့ မလုပ်ခဲ့ရတော့ ၀ဋ်တွေဟာ ရှုပ်ပွေလိမ်နေတာပဲ။ အခုလဲ ၀ဋ်မကျွတ်သေးဘူး။ ဒီတော့ အခုသိတဲ့အချိန်ကစပြီး ၀ဋ်ပြတ်အောင် လုပ်မှပဲဆိုတာကို ယနေ့စိတ်ပြောင်းမှ အဖိုးတန်မယ်။ နက်ဖြန်မှ စိတ်ပြောင်းရင် ည မရဏ=သေမင်းဝင်လာရင် ခက်မယ်။ အခုတရားနာပြီး အခုစိတ်ပြောင်းပြီး အခုလုပ်တော့မယ်လို့ ဆုံးဖြတ်ကြပါ။ အချိန်ဆွဲမနေနဲ့။
ဖြစ်ပျက်ရှု။ ။ ကဲ .... ၀ဋ်ကျွတ်တဲ့ အလုပ်ဆိုတာ တခြားမဟုတ်ဘူး။ ဖြစ်ပျက်ရှုတဲ့အလုပ်ပဲ။ ဒီတော့ ခင်ဗျားတို့ ခန္ဓာထဲမှာ ဝေဒနာ ၃-ပါး လှည့်ဖြစ်နေတယ်။ လှည့်ပေါ်နေတယ်။ ဒီတော့ ဝေဒနာကိုရှု။ ပေါ်ရာကိုရှုဆိုတော့ နာရင် ဒုက္ခဝေဒနာ။ ကောင်းရင် သုခဝေဒနာ။ မကောင်းတကောင်းဆိုရင် ဥပေက္ခာဝေဒနာ၊ သူပေါ်တဲ့နေရာမှာ သူရှိမရှိ ရှုပေး။ ဝေဒနာပေါ်တိုင်းပေါ်တိုင်း ပျက်သွားတဲ့အခါမှာ ပျက်ပြီလို့ သတိထားရမယ်။
ဒီတော့ သတိထား။ ၀ီရိယစိုက်။ ပညာနဲ့ရှုပေး။ ဒီ ၃-ပါး လက်ကိုင်ထား။ သတိရှိရင် သမာဓိဟာပါတာပဲ။ သတိထား ၀ီရိယစိုက်ဆိုရာမှာ သမာဓိလဲ ပါပြီးသားဖြစ်တယ်။ ဒါဟာ သမာဓိမဂ္ဂင် ၃-ပါးပဲ။
ပညာနဲ့ရှုဆိုတော့ ပညာသမ္မာဒိဋ္ဌိပဲ။ ပညာပါရင် သမ္မာသင်္ကပ္ပကလဲ အမြဲတွဲပါနေတယ်။ ဒါဟာ ပညာမဂ္ဂင် ၂-ပါးပဲ။ ဝေဒနာဖြစ်ပျက်ရှုရာမှာ ဒီမဂ္ဂင် ၅-ပါးက အမြဲပါရတယ်။ ဝေဒနာကို ရှိမရှိရှုလိုက်တော့ မရှိတာတွေ့တယ်။ မရှိတာသည် အနိစ္စပဲ။ ဒီမရှိတာသိတဲ့ အခါမှာ ခုနကမဂ္ဂင် ၅-ပါးဟာ တပြိုင်နက်ပေါ်လာတယ်။ မရှိမှန်းသိတဲ့အခါမှာ မရှိတာက အနိစ္စ၊ သိတာက မဂ္ဂ၊ သြော် .... အနိစ္စဆိုတာ ရှိပြီး မရှိတာ၊ ခုနကပေါ်တယ်၊ အခုကြည့်လိုက်တော့ မရှိတော့ဘူး။ ဒီလို ဝေဒနာဖြစ်ပြီးပျက်တာကို နောက်ကရှုတဲ့တရားဟာ မဂ္ဂ မဂ်ပဲ။ ဒီလိုရှုတော့ ၀မ်းထဲ ဒီမဂ်ရောက်ပြီ၊ မဂ် ရောက်လာတော့ ဒီမဂ်ဟာ ၀ဋ်မှဆန်တက်ပြီး နိဗ္ဗာန်ဘက်သို့ ထုတ်ဆောင်ပေးတာပဲ။
ဒီ မဂ္ဂင် ၅-ပါး မလာရရင် ၀ဋ် ၃-မျိုးလာမယ်။ ရှုလိုက်လို့ မဂ်ရောက်လာတော့ ၀ဋ် ၃-ပါးဟာ လာခွင့်မရတော့ဘူး။ ၀ဋ်လာခွင့်မရအောင်လုပ်တော့ ဒီမဂ်ဟာ ၀ဋ်မှ ဆန်တက်သွားပြီး ထွက်သွားပြီး ၀ဋ်ကိုဖြတ်ပစ်လိုက်ပြီ။ ဖြတ်တော့ ၀ဋ်ကျွတ်တာပေါ့။ ဒီလို ဖြစ်ပျက်မရှုလို့ မဂ်မလာရင် ၀ဋ် ၃-ပါးလာမယ်၊ ၀ဋ်သင့်မယ်။ ၀ဋ်ထဲမှာ အ၀ိုင်းပြေးနေမှာပဲ။ ရှုတဲ့ပုဂ္ဂိုလ်မှာ မဂ်လာတော့ ၀ဋ်ကျွတ်တာပေါ့။ ဒီတော့ ၀ဋ်ကျွတ်တယ်ဆိုတာ ဒီလို အလုပ်လုပ်မှရမယ်။ ၀ဋ်မှ ကျွတ်ရပါလို၏လို့ ဆုတောင်းလို့တော့ ၀ဋ်မကျွတ်နိုင်ဘူး။ လူ့ပြည် နတ်ပြည်သာ ဆုတောင်းလို့ရတာ၊ နိဗ္ဗာန်ကျတော့ ဆုတောင်းလို့ မရဘူး။ ဖြစ်ပျက်ရှုတဲ့အလုပ် လုပ်ယူရမယ်။ အခု ဝေဒနာရှုလို့ ၀ဋ်ကျွတ်တာ။ ၀ဋ်ပြတ်တာ။ ဒီတော့ ဆုတောင်းကိုပယ်၊ ရှုမှုကို သန်ပေးပါ။
ဖြစ်ပျက်ရှုတဲ့ အလုပ်လုပ်ရင် ၀ဋ်ကျွတ်တယ်။ အကာလိကော၊ အခါမလင့် အကျိုးပေးတယ်။ ဖြစ်ပျက်ရှုလို့ မဂ်လဲလာရော ၀ဋ် ၃-ပါးလာခွင့်မရတော့ဘူး။ ဒါ အခါမလင့် အကျိုးပေးတာပဲ။ ဒိဋ္ဌဓမ္မ၊ လက်ငင်းအကျိုးပေးတာပဲ။ ဒီတော့ ၀ဋ်ကျွတ်ချင်ရင် ကိုယ်တိုင်ဖြစ်ပျက်ရှုရုံပဲ ရှိတယ်။ ဝေဒနာကို ဖြစ်ပျက်ရှုရမယ်။ ဝေဒနာကို ဖြစ်ပျက်မမြင် မြင်အောင်ကြည့်၊ ဗြုံးကနဲ လုပ်စပုဂ္ဂိုလ်မှာ မမြင်နိုင်သေးဘူး။ ဝေဒနာရှုတဲ့အခါ ဝေဒနာဟာဖြစ်ပြီး ချုပ်သွားတယ်။ အဲဒီ ဝေဒနာချုပ်တာကို နောက်က ဉာဏ်ကနေပြီး သြော် .... ဖြစ်ပြီးချုပ်သွားတာပါလားလို့ သိရင်တော်ပြီ။ ဖြစ်ပျက်ဟာ မြန်လွန်းတော့ ဖြစ်တုန်းပျက်တုန်းမှာ မသိမမြင်နိုင်ဘူး (ဝေဒနာ) ဖြစ်ပျက်ပြီးမှ သိ-မြင်နိုင်တယ်။
ဒီတော့ ၀ဋ်ကျွတ်ချင်ရင် ဖြစ်ပျက်မြင်အောင် ဖြစ်ပျက်နဲ့ မဂ် ကိုက်အောင်လုပ်။ ဖြစ်ပျက်မြင်ရင် မဂ်လာပြီ။ နည်းနည်းချဲ့ပြောပြမယ်။ ဝေဒနာကြောင့် တဏှာဖြစ်ရာမှာ၊ တဏှာဆိုတဲ့ ကိလေသ၀ဋ်ဟာ ဟဒယ၀တ္ထုပေါ်မှာ ပေါ်ပါတယ်။ ကမ္မ၀ဋ်ဆိုတဲ့ စေတနာလဲ ဟဒယ၀တ္ထုပေါ်မှာ ပေါ်တယ်။ ၀ိပါက၀ဋ်ဆိုတာလဲ ဟဒယ၀တ္ထုနဲ့ကပ်ပြီး ပဋိသန္ဓေနေတာပဲ။ ဒီတော့ ၀ဋ် ၃-ပါးဟာ ဟဒယ၀တ္ထုပေါ်မှာပဲ ကျက်စားတယ်။ ခင်ဗျားတို့ ဖြစ်ပျက်ရှုတဲ့အခါ မဂ်ဟာလဲ ဟဒယ၀တ္ထုပေါ်မျာပဲ ပေါ်တယ်။ ဒီတော့ဖြစ်ပျက်ရှုလို့ မဂ်လာပြီဆိုရင် ဟိုဝဋ်တွေ မလာတော့ဘူး။ မလာရင် ၀ဋ်ကျွတ်တာပေါ့။ ၀ဋ်ကျွတ်တယ်ဆိုတာ ၀ဋ်မလာအောင် တားလိုက်လို့ ၀ဋ်မလာတာကို ခေါ်တာ။
(၁) ယထာဘူတဉာဏ်။ ။ အခု ဖြစ်ပျက်မြင်တဲ့ဉာဏ်ဟာ ၀ဋ်ကျွတ်ခြင်း၏ အစဉာဏ်ပဲရှိသေးတယ်။ (ဝေဒနာ) မရှိတာ မရှိမှန်းသိသောကြောင့် ဟုတ်တိုင်းမှန်စွာ သိတဲ့ဉာဏ်ပဲ ရှိသေးတယ်။ ဒီ ဉာဏ်ကို ယထာဘူတဉာဏ်လို့ ခေါ်တယ်။ ဖြစ်ပျက်မြင်တဲ့ မဂ္ဂင် ၅-ပါးဟာ ယထာဘူတဉာဏ်ပဲ၊ ဒီဉာဏ်ရရင် ခင်ဗျားတို့ စူဠသောတာပန်ဖြစ်ပြီ။ သို့သော် စူဠသောတာပန်ဆိုတာ ဒီဇောနဲ့သေမှ တဘ၀သာ အပါယ်စိတ်ချရတာ။ သေခါနီးမှာ အခြားဇောတွေဝင်လာရင် စိတ်မချသေးဘူး။ စိတ်မချရသေးတဲ့ စူဠသောတာပန် ဖြစ်သောကြောင့် ဒါကို သိပ်အားမကိုးပါနဲ့။ စိတ်ချရအောင် ဆက်လုပ်ပါဦး။ ဒီတော့ ဖြစ်ပျက်မြင်ရုံနဲ့ မကျေနပ်နဲ့ဦး။ တဆင့်တက်ဦးလို့ သတိပေးပါတယ်။
(၂) နိဗ္ဗိဒါဉာဏ်။ ။ ဘာတဆင့် တက်ရမလဲဆိုတော့ ဒီ ဖြစ်ပျက် မုန်းအောင်ရှုပါ။ နိဗ္ဗိဒါဉာဏ်ဆိုတာ ဖြစ် ပျက် (ဒုက္ခသစ္စာ)ကို ငြီးငွေ့မုန်းတီးလာတဲ့ဉာဏ်ကို ပြောတာ။ ဖြစ်ပျက် မုန်းလာရင် နိဗ္ဗိဒါဉာဏ် ရောက်ပြီ။ ခုနကတော့ ဖြစ်ပျက်မြင်တယ်။ အခုဟာက ဖြစ်ပျက်မုန်းတယ်။ ဒီလို ဉာဏ် ၂-ပါး ထူးခြားတယ်။ ဒီတော့ ဖြစ်ပျက် မြင်တဲ့ဉာဏ် ဖြစ်ပျက်မုန်းတဲ့ ဉာဏ်က ပိုထက်သန်တယ်။ ဖြစ်ပျက်မြင်တဲ့ ဉာဏ်လာပြီးမှ ဖြစ်ပျက်မုန်းတဲ့ဉာဏ် ရလာတာကိုး။ ဖြစ်ပျက်မမြင်ပဲနဲ့ ဖြစ်ပျက်မုန်းတဲ့ဉာဏ် မလာနိုင်ဘူး။ ဒီတော့ ဉာဏ် ၂-ဉာဏ်တွင် အရင် ယထာဘူတဉာဏ်တုန်းက ကိလေသ၀ဋ်ကို အကြမ်းစားလောက်ပဲဖြတ်တယ်။ အခု နိဗ္ဗိဒါဉာဏ်က ကိလေသာအနုစားကိုပါ ဆက်ဖြတ်တယ်။ ဒီလို ဉာဏ် ၂-ဉာဏ်အထူးကို မှတ်ပါ။ နိဗ္ဗိဒါဉာဏ်လာလို့ရှိရင် ငြီးငွေ့လျက်နဲ့ မကြည့်ချင်ပဲနဲ့ ကြည့်နေရတာပဲ ဆိုတော့ အင်း ဒီဟာမရှိရင် ကောင်းလေစွ၊ ဒီဟာမှ ကျွတ်လွတ်ရင် ကောင်းစွဆိုတာတွေလာတယ်။ အဲဒါအပြင် မုဉ္စိတုကမျတာဉာဏ် (ဒုက္ခမှ လွတ်လိုတဲ့ဉာဏ်)တို့ ဘာတို့လဲ အလိုလိုတက်လာတာပဲ။ ဒီဉာဏ်တွေဟာ အလိုလို အကျုံးဝင်သွားလို့ ထည့်ပြောဖို့ မလိုပါဘူး။
(၃) မဂ်ဉာဏ်။ ။ ဖြစ်ပျက်ကို မုန်းလျက်နဲ့ပေရှု၊ ရှုရင်းမတ်တတ်နဲ့ပဲ မုန်းပြီးတော့၊ အင်း... ဒါကြီးကိုတော့ဖြင့် မလိုချင်တော့ပါဘူးလို့လာမယ်။ ဒီ ဝေဒနာကြောင့် ဖြစ်တဲ့တဏှာ နည်းနည်းမှ မရှိလို့ မလိုချင်တာ။ နည်းနည်းလေးရှိ နည်းနည်းလေးလိုချင်တယ်။ ငါ ငါ့ဥစ္စာဆိုတဲ့ တဏှာတို့၊ ဒိဋ္ဌိတို့လဲ နည်းနည်းမှ မရှိတော့ဘူး။ ၀ိစိကိစ္ဆာလဲ နည်းနည်းမှ မရှိတော့ဘူး။ ဒါဖြင့် မလိုချင်တဲ့မဂ် ပေါ်တဲ့အခါကျရင် တဏှာလဲမရှိ၊ ဒိဋ္ဌိလဲမရှိ၊ ၀ိစိကိစ္ဆာလဲ မရှိတဲ့အတွက်၊ တဏှာဝိစိကိစ္ဆာတို့ စွမ်းရည်သတ္တိက ဖြစ်စေတဲ့ ခင်ဗျားတို့ ဝေဒနာက္ခန္ဓာကြီးဟာ ပျောက်ထွက်သွားတယ်။ အကြောင်းပျေက်လို့ အကျိုးပျောက်သွားတယ်။ အဲဒါ မီးသေလို့ အခိုးမရှိတာပဲ။ အကြောင်းကိလေသ၀ဋ် ပျက်သွားတာနဲ့ အကျိုးဝေဒနာက္ခန္ဓာ ဒုက္ခသစ္စာကြီးဟာ တခါတည်း မလိုချင်တဲ့အချိန်မှာ ပျောက်သွားတယ်။
ဒီတော့ ၀ိပါက၀ဋ်ခန္ဓာကြီး ဒုက္ခသစ္စာခန္ဓာကြီးဟာ မလိုချင်တဲ့ပုဂ္ဂိုလ်မှာ (မဂ်ဉာဏ်ဝင်လာတဲ့ပုဂ္ဂိုလ်မှာ) ရှုရင်းမတ်တတ်နဲ့ ပျောက်ထွက်သွားတယ်။ မဂ်ဆိုက်လာတဲ့အခါကျတော့ မဂ္ဂင် ၈-ပါး ဖြစ်လာတယ်။ မဂ္ဂင် ၈-ပါးဆိုတဲ့ မဂ်ဉာဏ်ပေါ်လာရင် ဝေဒနာက္ခန္ဓာ ဒုက္ခသစ္စာကြီး ချုပ်သွားပြီး အဲဒီနေရာမှာ သုခနိဗ္ဗာန် အစားထိုးဝင်လာတယ်။ အဲ.. ရှုတဲ့ မဂ်ဉာဏ်က သုခနိဗ္ဗာန်နဲ့ သွားတွေ့တယ်။ အစားထိုးတာ သုခနိဗ္ဗာန်၊ အစားထိုးတာမြင်တာကမဂ်ဉာဏ်၊ ချုပ်သွားတာက ဒုက္ခသစ္စာ၊ သမုဒယသစ္စာ၊ အဲဒီ မဂ္ဂင် ၈-ပါးလာတော့မှ အပါယ်ကိလေသ၀ဋ်၊ အပါယ်ရောက်မယ့် ကမ္မ၀ဋ်၊ အပါယ်မှာ အထည်ကြီးတွေဖြစ်မယ့် ၀ိပါက၀ဋ်၊ ဒီဝဋ်တွေ အမြစ်နဲ့တကွ အကုန်ကျွတ်သွားတယ်။
ခုနက ယထာဘူတဉာဏ်၊ နိဗ္ဗိဒါဉာဏ် ၂-ခုက ၀ဋ် ၃-ပါးကို အပေါ်ယံက ဖြတ်ချတယ်၊ အမြစ်မပြတ်ဘူး။ ယထာဘူတဉာဏ်က အပေါ်ယံကဖြတ်ပြီး၊ နိဗ္ဗိဒါဉာဏ်က အမြစ်နားကဖြတ်တယ်။ မဂ်ဉာဏ်ကျမှ အမြစ်ပါဖြတ်တာ။ ဒီတော့ဝဋ်ကျွတ်တဲ့တရားအစစ်ဟာ မဂ္ဂင် ၈-ပါးပဲ။ အချုပ်ပြောရရင် မဂ္ဂင်တရားဆိုတာ ပွားများရတဲ့ ပွားယူရတဲ့ ဘာဝေတဗ္ဗပဲ။ လောကုတ္တရာ မဂ္ဂင်လဲ ဘာဝေတဗ္ဗပဲ၊ ဒါကြောင့် နိဗ္ဗာန်ဆိုတာ ရှုပွားယူရတာ။ ရှုပွားမယုရင် မရဘူး။ ရှုပွားရာမှာ ပြောခဲ့တဲ့ဉာဏ် ၃-ဉာဏ်နဲ့တက်ရမယ်။ (၁) ယထာဘူတဉာဏ်က ဖြစ်ပျက်ကိုမြင်တယ်။ (၂) နိဗ္ဗိဒါဉာဏ်ကလဲ ဖြစ်ပျက်ကိုပဲ မြင်တယ်။ သို့သော် ဖြစ်ပျက်ကို မြင်ရုံတင်မဟုတ်ပဲ မုန်းလဲမုန်းတယ်။ (၃) မဂ်ဉာဏ်ကျတော့ ဖြစ်ပျက်ကို မမြင်တော့ဘူး။ ဖြစ်ပျက်မရှိတာကိုသာ မြင်တယ်၊ ဖြစ်ပျက်မရှိတာ မြင်တယ်ဆိုသဖြင့် ဒီ အနိစ္စဟူသရွေ့ကို လုံးဝမမြင်၊ ဒုက္ခဟူသရွေ့ လုံးဝမမြင်၊ အနတ္တဟူသရွေ့ လုံးဝမမြင်တော့ဘူး။ အနိစ္စ၊ ဒုက္ခ၊ အနတ္တဖြစ်တဲ့ ရုပ် နာမ်တို့၏ ဖြစ်ပျက်တွေကို ဒီ မဂ်ဉာဏ်က မမြင်တော့ဘူး။ မခိုင်မြဲတာ မမြင်တော့ဘူး။ ခိုင်မြဲတာပဲမြင်တယ်ဆိုတော့ ခိုင်မြဲချမ်းသာတဲ့ နိဗ္ဗာန်ကိုသာမြင်တယ်။
အဲဒီတော့ ဒီမဂ်ဉာဏ်ရမှ အပါယ် ၄-ပါးစိတ်ချရမယ်။ ဒီဉာဏ်မှ မရသေးရင် အပါယ် ၄-ပါးဟာ ကိုယ့်အိမ်လို့ မှတ်ပါ။ ဒီမဂ်ဉာဏ်သာ ခင်ဗျားတို့ ထာဝရအားကိုးရာရှိတော့တယ်။ တခြား တရားတွေကတော့ ခဏ ယာယီလောက်သာ အားကိုးလို့ရမှာ။
မိုးကုတ်ဆရာတော်ဘုရားကြီး၏ သစ္စာအနက် ၁၆-ချက် တရားတော်များမှ
No comments:
Post a Comment