နိဗ္ဗာန်သည် ၀ိဝေကဋ္ဌသဘောရှိတယ်။ ၀ိဝေကဋ္ဌ ဆိုတာ နှောင့်ယှက်ခြင်းနှင့် ရှုပ်ယှက်ခတ်ခြင်းမှ ကင်းဆိတ်ခြင်း ဆိတ်သုဉ်းခြင်း သဘောရှိတယ်။ ဥပမာ၊ မီးရှို့ထားတော့ မီးခိုးတွေ တမြို့လုံးတရွာလုံး အညှော်မှိုင်းတွေတိုက်တာ ရှုပ်ယှက်ခတ်နေတာပဲ။ ဒီ ကိလေသာတဏှာ ရှုပ်ထားတာနဲ့ ခန္ဓာကိုယ်ထဲမှာ ဖြစ်ပျက်တွေချည်း ဖြစ်နေတယ်။ မီးငြိမ်းသွားတော့ မီးခိုးတွေပျောက်သွားသလို ဒီရှုပ်တဲ့တဏှာကို နောက်မဂ်က သတ်လိုက်တာနဲ့ တပြိုင်နက် ဖြစ်ပျက်အရှုပ်တွေဟာလဲ ချုပ်ငြိမ်းကင်းဆိတ်သွားတာပဲ။ ဒီတော့ ရှင်းတာသည် နိဗ္ဗာန်။ အရှင်းမြင်တာသည် မဂ်ဉာဏ်ပဲ။ ဒီမဂ်ဆိုတာလဲ ၀ိပဿနာ ဉာဏ်ကနေ အစဉ်တက်လာမှ ဖြစ်တာ။ ကိလေသာအကြမ်းစားလဲ သိ၊ ကိလေသာ အနုစားလဲ သိဦးမှ၊ ဒုက္ခပိုင်းခြားတဲ့ ဉာဏ်လာမှ ရှုပ်ယှက်ခတ်တာတွေရှင်းမယ်။ ဒီတော့ နိဗ္ဗာန်ဟာ ကိလေသာ နှောင့်ယှက်ခြင်းမှ ကင်းဆိတ်တဲ့ သတ္တိရှိတယ်။
ဝိပဿနာရှုတဲ့အခါ ၀ိပဿနာဉာဏ်က ဖြစ်ပျက် ဒုက္ခသစ္စာ ရှုပ်ယှက်ခတ်တာတွေမြင်မယ်။ နောက် ဒီ ဖြစ်ပျက်တွေကို ရွံမုန်းလာမယ်။ မလိုချင်တော့ဘူး။ နောက် မဂ်ရောက်လာတဲ့အခါမှာ ဒီဖြစ်ပျက် ဒုက္ခသစ္စာ ရှုပ်ယှက်ခတ်တာတွေ ချုပ်ငြိမ်းကင်းသွားတယ်။ ဒါတွေ ကင်းရှင်းနေတဲ့ နိဗ္ဗာန်ကိုမြင်တယ်။ အမှိုက်တွေရှုပ်နေတုန်း ကြည့်ရတာနဲ့ အမှိုက်ရှင်းမှကြည့်ရတာ ဘယ်ဟာက ကြည့်ကောင်းတုန်း။ ရှင်းတာကကြည့်ကောင်းတယ်။ နိဗ္ဗာန်က ရှင်းတာ။ ကြည့်ကောင်းတာ။ မဂ်ဉာဏ်က ကြည့်တာ။ မြင်တာ။ နိဗ္ဗာန်က အကြည့်ခံရတဲ့ အာရုံတရား၊ မဂ်ဉာဏ်က ကြည့်တဲ့ အာရမ္မဏိကတရားလို့ မှတ်၊ ဒီတော့ နိဗ္ဗာန်က အကြည့်ခံ၊ မဂ်က အကြည့်ဉာဏ် ဆိုတော့ နိဗ္ဗာန်နဲ့ မဂ်ဟာ တွဲနေတယ်လို့ ဆိုနိုင်တယ်။
နိဗ္ဗာန်ဟာ ရှင်းလင်းတယ်။ ဘာရှင်းတာလဲ ဆိုတော့ ကိလေသာ အရှိန်အစော်တွေ ရှင်းတယ်။ ကိလေသာ ရှုပ်ထားတာတွေကတော့ သေပွဲကြီးတွေ့ရမယ်။ သေပွဲ၊ အိုပွဲ၊ နာပွဲ၊ ရင်ထုပွဲ၊ မြေလူးပွဲ။ ဒီကိလေသာ ရှုပ်တာတွေချည်းတွေ့ရမယ်။ နိဗ္ဗာန်မှာ ဒီအရှုပ်တွေရှင်းတယ်ဆိုတော့ အေးငြိမ်းချမ်းသာတဲ့သဘောပဲ။ နိဗ္ဗာန်ဟာ ကိလေသာအရှုပ်တွေ ရှင်းနေတယ်ဆိုတော့၊ ကိလေသာကလွတ်ရင် နိဗ္ဗာန်ပဲ။ ဘာကမှမပြုပြင်နိုင်ဘူး။ မပြုပြင်နိုင်တော့ အထည်ကိုယ်မရှိဘူး။ ကိလေသာက ရုပ်နာမ်အထည်ကိုယ်သာ လုပ်တတ်တာကိုး။ ဒါဖြင့် နိဗ္ဗာန်မှာ ရုပ်နာမ်မရှိဘူး။ ကျုပ်တို့မှာရှိတဲ့ ရုပ်နာမ်ကတော့ အနိစ္စတွေကိုး။ သို့သော် နိဗ္ဗာန်ဟာ ရုပ်လား နာမ်လားလို့ မေးရင် နာမ်ဓမ္မလို့ဖြေ။ ကျုပ်တို့မှာ ရှိတဲ့နာမ်မျိုးလားဆိုတော့လဲ ဒီလိုမဟုတ်ဘူး။ ဥပါဒ် ဌီ ဘင် (ဖြစ်ပျက်)ရှိတဲ့ နာမ်မျိုးမဟုတ်ဘူး။ ဒီတော့ နိဗ္ဗာန်ဟာ ဖြစ်ပျက်မရှိဘူး။ ဒါဖြင့် ဖြစ်ပျက်မရှိတဲ့ နာမ်ဓမ္မလို့မှတ်လိုက်။
နိဗ္ဗာန်ဟာ နိဗ္ဗာန်ရောက်ကြောင်း အားထုတ်တဲ့ပုဂ္ဂိုလ်တို့၏ ကျက်စားရာဌာန၊ နိဗ္ဗာန်ရောက်ကြောင်း ဓမ္မတို့၏တည်ရာ (အာရုံပြုရာ) ဌာနဖြစ်တယ်။ ဒီပုဂ္ဂိုလ် ဒီဓမ္မတွေဟာ နိဗ္ဗာန်ဆီချည်းလာပြီး အကုန်ဦးတိုက်ရတယ်။ ကျုပ်တို့မှာရှိတာက အာရုံတွေရှိရာကို ပြေးတတ်တဲ့နာမ်ပဲ။ ဒီနိဗ္ဗာန်က ငါ့ဆီအကုန်လာညွှတ်ကြဆိုတဲ့ ညွှတ်အပ်တဲ့ နာမ်ဓမ္မပဲ။ နိဗ္ဗာန်အလိုရှိတဲ့ ပုဂ္ဂိုလ်တွေ ရောက်အောင်အားထုတ်လို့ရှိရင် သူတို့၏ နိဗ္ဗာန်ရောက်ကြောင်းစိတ်တွေဟာ သူ့ဆီပဲညွှတ်ကြရတယ်။ နိရောဓသမာပတ် ၀င်စားတဲ့ ပုဂ္ဂိုလ်များဟာ ၇-ရက်တိတိ နိဗ္ဗာန်ကို ညွှတ်နေနိုင်တယ်။ အာရုံပြုနေနိုင်တယ်။
ဒီတော့ နိဗ္ဗာန်ဟာ ဘယ်လောက် ကောင်းသတုန်းဆိုတော့ ပြောဖို့တောင် မလိုတော့ပါဘူး။ ဖလသမာပတ်ဝင်စားတဲ့ ပုဂ္ဂိုလ်တွေဟာ နာရီပေါင်းများစွာ ၀င်စားနိုင်တယ်။ ဖလသမာပတ် ၀င်စားတယ်ဆိုတာ နိဗ္ဗာန်ကို အာရုံပြုနေတဲ့ ဖိုလ်စိတ်တွေချည်း ဖြစ်နေတာ။ ဖလသမာပတ် ၀င်စားနေတုန်းမှာဆိုရင် ဖိုလ်စိတ်ဟာ နိဗ္ဗာန်နဲ့ တခါတည်းတွဲနေတာပဲ။ ဒီတော့ နိဗ္ဗာန်ဟာ သာမညပျော်စရာ မဟုတ်ပဲ အလွန်အထူး ပျော်စရာဖြစ်လို့ ဒီလောက်ပျော်ပိုက်နေနိုင်တာပေါ့။ မဂ်ဉာဏ် ဖိုလ်ဉာဏ်ရတဲ့ ပုဂ္ဂိုလ်တွေဟာ ဘယ်တော့မှ နိဗ္ဗာန်ကို မကြည့်ပဲ အာရုံမပြုပဲ မနေနိုင်ဘူး။ ဒီတော့ နိဗ္ဗာန်ဟာ အေးငြိမ်းချမ်းသာ ကြည်နူးစရာကောင်းလှတဲ့ နာမ်ဓမ္မပဲ။ အစဉ်အမြဲ ခိုင်မြဲနေတဲ့ နာမ်ဓမ္မပဲ။ နိစ္စ၊ ဓုဝတရားပဲ။
ဒီနိဗ္ဗာန်ဟာ ဘယ်နှစ်ရက် ကြည့်နေရ ကြည့်နေရ ရောင့်ရဲတယ် တင်းတိမ်တယ်လို့မရှိဘူး။ ကြည့်နေတဲ့ အခါမှာ ဘယ်တော့မှ တော်ပြီတန်ပြီလို့မလာဘူး။ ဒီတော့ နိဗ္ဗာန်ဟာ အကောင်းတကာ့ အကောင်းဆုံးပဲလို့မှတ်။ ဘာကြောင့်တုန်း။ မသာစွဲမရှိလို့။ အရင်ကကြည့်နေရတာတွေဟာ မသာတွေချည်းပဲ၊ ဖြစ်လိုက်ပျက်လိုက် ဖြစ်လိုက်ပျက်လိုက် မသာတွေ မရှိတော့ဘူး။ မမြင်ရတော့ဘူး။ မသာပွဲလဲမရှိဘူး။ ဒုက္ခရောက်တာ ဘာမှရှာမတွေ့ဘူး။
ဒီတော့ ဒီနေရာဟာ အကောင်းဆုံး။ အကောင်းဆုံးမို့ပေါ့ အရိယာပုဂ္ဂိုလ်တွေဟာ စားရေးသောက်ရေး ကိစ္စကလေးတွေပြီးလို့ အားတဲ့အချိန်တိုင်းမှာ ဆိတ်ငြိမ်ရာသွားပြီး နိဗ္ဗာန်ကို အာရုံပြုနေကြတာပဲ။ ဘာပြုလို့ အာရုံပြုနေပါလိမ့်။ သက်သာရာ ရအောင်လို့။ နိဗ္ဗာန်ဟာ သက်သာမှုကို ပေးနိုင်တယ်။ သူ့ကြည့်နေတဲ့ပုဂ္ဂိုလ်အား အေးငြိမ်းချမ်းသာမှုကို ပေးနိုင်တယ်။ ဒီတော့ နိဗ္ဗာန်ဟာ ချမ်းသာအစစ် သုခအစစ်ပါပဲ။ နိဗ္ဗာန်က သူ့ကိုမှီနေတဲ့ပုဂ္ဂိုလ်တွေကို ချမ်းသာမှု ပေးလေ့ရှိတယ်။ နိဗ္ဗာန်မှတစ်ပါး ကျန်တာတွေကတော့ အားကိုးလိုက်တိုင်း ဒုက္ခရောက်တာပဲ။ ရွှေတွေငွေတွေ အားကိုးလိုက်ရင် ရွှေငွေကြောင့် ဒုက္ခရောက်ရတာပဲ။ စိန်ရွှေရတနာတွေ အားကိုးလိုက် စိန်ရွှေရတနာတွေကြောင့် ဒုက္ခရောက်တာပဲ။ နိဗ္ဗာန်ကျတော့ အားကိုးတိုင်း ချမ်းသာရာရမယ်။ ဒါကြောင့် နိဗ္ဗာန်ဟာ ချမ်းသာခြင်းလက္ခဏာ၊ ငြိမ်းအေးခြင်းလက္ခဏာ၊ စိတ်နှလုံးကို ရွှင်ပြုံးစေခြင်း လက္ခဏာရှိတယ်။
နိဗ္ဗာန်ဟာ ဘာအထည်နဲ့တူသတုံး။ နိဗ္ဗာန်ရောက်တဲ့ပုဂ္ဂိုလ် ဘယ်လိုနေထိုင်သတုံးလို့ မေးချင်မေးမယ်။ မေးခွင့်လဲရှိတယ်။ သို့သော် အထည်ကိုမေးလို့ရှိရင် အထည်အကြောင်းကို အရင်ပြောရလိမ့်မယ်။ အထည်ဆိုတာက အထည်(ဒြပ်)ရှိရင် ဖောက်ပြန်တဲ့သဘော။ ဆွေးမြေ့ပျက်စီးတဲ့ သဘောရှိတယ်။ ဒီသဘောမှ မလွတ်ကင်းနိုင်ဘူး။ နိဗ္ဗာန်လဲ အထည်ရှိရင် ဆွေးမြေ့ဖောက်ပြန် ပျက်စီးမှာပဲ။ ဒါဖြင့် နိဗ္ဗာန်ဟာ အထည်(ဒြပ်)ရှိသလားလို့မေးရင် နိဗ္ဗာန်ဟာ အထည်မရှိဘူး။ လုံးရပ် သဏ္ဍာန် ပုံဟန်နိမိတ် လုံးဝမရှိဘူး။ အဲဒါတွေရှိရင် ဖောက်ပြန်ပျက်စီးမှာပဲ။ ဒီသဘောမှ မလွတ်ကင်းနိုင်ဘူး။ အရိယာပုဂ္ဂိုလ်တွေဟာ ခန္ဓာရှိနေတုန်း နိဗ္ဗာန်ကြည့်နေ (အာရုံပြုနေ)ရတာ ချမ်းသာနေတယ်။ ဘာပြုလို့ ချမ်းသာနေသတုံး၊ နိဗ္ဗာန်ဟာ အအိုလဲမရှိ၊ အနာလဲမရှိ၊ အသေလဲမရှိ၊ အကွဲလဲမရှိ၊ အမွဲလဲမရှိ။ သောကပရိဒေ၀လဲမရှိလို့။ နိဗ္ဗာန်ဟာ အိုမှု၊ နာမှု၊ သေမှု၊ ကွဲမှု၊ မွဲမှုဆိုတဲ့ မကောင်းတဲ့အမှုတွေ အကုန်ငြိမ်းတဲ့ နေရာဖြစ်တယ်။ ဒါကြောင့် နိဗ္ဗာန်ဟာ အကောင်းဆုံး အချမ်းသာဆုံးဖြစ်တယ်။ ၀ိပဿနာအားထုတ်လို့ မဂ်ရရင် ဒီနေရာကို မြင်ရတယ်။ နိဗ္ဗာန်မြင်တဲ့ အရိယာပုဂ္ဂိုလ်တွေဟာ ဒီနေရာအကောင်းဆုံးလို့ ဆုံးဖြတ်ကြတယ်။
ဒီနေရာဟာ အကောင်းဆုံးပဲ။ ဒါပေမယ့် မသွားဘူး၊ မရောက်ဘူး၊ မစားဘူးတဲ့ပုဂ္ဂိုလ်က မကြိုက်ဘူးပြောတာကို အမှန်မယူနဲ့။ မစားဘူးသေးပဲနဲ့ မကြိုက်ဘူးပြောတာဟာ အဓိပ္ပာယ်မရှိဘူး။ စားဘူးလို့ မကြိုက်ဘူးဆိုရင်တော့ အဓိပ္ပါယ်ရှိတယ်။ နိဗ္ဗာန်ဘာမှမရှိတာကြီးကို တပည့်တော်တို့ မကြိုက်နိုင်ဘူးလို့ပြောရင် ခင်ဗျားတို့က ကိုယ်တိုင်လုပ်ပြီး တွေ့ရသေးတာမှ မဟုတ်ပဲ။ စားဘူးပြီး မကြိုက်တာမဟုတ်သေးဘူး။ မစားဘူးပဲနဲ့ ရမ်းပြီးမကြိုက်တာ၊ ပြောသံကြားနဲ့ မကြိုက်တာ။ ဒီတော့ စားဘူးတဲ့အရိယာပုဂ္ဂိုလ်တွေကို မေးကြည့်မှ အဖြေမှန်ရမယ်။ အရိယာတွေဟာ ဆွမ်းကိစ္စ ရေကိစ္စစသည်တွေပြီးတော့ အားလပ်တဲ့အချိန်တိုင်း နိဗ္ဗာန်ကို အာရုံပြုနေကြတယ်။ နေ့တိုင်း ဒီလိုနေကြတယ်။ ဘာပြုလို့ ဒီလိုချည်းနေကြသတုံး, သူတို့က စားကောင်းလို့ စားနေကြတာ။ သူတို့ကိုယ်တိုင်စားရလို့ ကောင်းမှန်းသိလို့ ကြိုက်နေပြီ၊ နေ့တိုင်းစားကြတယ်။ ဒီကို ရောက်ပြီးမှ မကြိုက်ဘူးဆိုပြီး ပြန်လာတဲ့ အရိယာပုဂ္ဂိုလ်တွေ တစ်ယောက်မှမရှိဘူး။
ဒါဖြင့် နိဗ္ဗာန်ဟာ ဉာဏ်အမြင် ကြီးကျယ်တဲ့ပုဂ္ဂိုလ်တို့ ကြိုက်ရာ ကျက်စားရာဌာနပဲ။ နိဗ္ဗာန်မကြိုက်တဲ့ ပုဂ္ဂိုလ်ဟာ အမြင်ကျဉ်းလို့ပဲ။ ဒီလို့ပဲပြောရမှာပဲ။ အရိယာပုဂ္ဂိုလ်အဖို့တော့ နိဗ္ဗာန်ဟာ အကြိုက်ဆုံး အကောင်းဆုံးပဲ။ ဒီတော့ နိဗ္ဗာန်ဟာ အကောင်းဆုံး အမြတ်ဆုံးတရားလို့ ဆုံးဖြတ်။ ဘုရားကလဲ ဒီအတိုင်းဟောတာပဲ။ အရိယာတွေကလဲ ဒီအတိုင်းပြောကြတာပဲ။ တခါ ပုထုဇဉ်ဉာဏ်နဲ့ ဆပြီး ဒုက္ခမရှိဘူးဆိုရင် ကောင်းတာပဲ။ ကြိုက်စရာပဲလို့ ဆိုရမှာပဲ။ တခါ ပုထုဇဉ်ဉာဏ်နဲ့ နိဗ္ဗာန်မှာ ဒုက္ခလုံးဝမရှိတော့ ကောင်းရမှာပဲ ကြိုက်ရမှာပဲ၊ ပုထုဇဉ်ကတော့ ဒီလောက်ပဲမှန်းဆသိနိုင်မယ်။ ဒါသူတပါးပြောသံကြားနဲ့ သိရတာပေါ့။ အနုမာန မှန်းဆပြီးသိတဲ့အသိပေါ့။ အရိယာ ပုဂ္ဂိုလ်တွေကတော့ ပစ္စက္ခသိ၊ ကိုယ်တိုင်သိပေါ့။ ခင်ဗျားတို့က လက်တွေ့မှ ယုံတယ်ဆိုရင်လဲ လုပ်ကြတာပေါ့။ ခင်ဗျားတို့က ဘာဖြစ်ဖြစ် လက်တွေ့မှယုံတဲ့ခေတ်၊ ပြောသံကြားနဲ့ ယုံတဲ့ခေတ်မဟုတ်ဘူးဆိုရင် အလုပ်လုပ်ကြည့်ပေါ့။ ခင်ဗျားတို့ဟာ စကြ၀တေးလောင်းတွေဖြစ်နိုင်တယ်။ စကြာမင်းကြီး ဖြစ်တော့ စကြာရထားကြီးနဲ့ လောကီစည်းစိမ်တွေ အကုန်ရမှာပဲ။ ဒါပေမယ့် စကြာမင်းကြီးဟာ ၀ိပဿနာဉာဏ်နဲ့ တက်ပြီးသွားတဲ့အခါကျတော့၊ စကြာရတနာနဲ့ လောကီစည်းစိမ်ကြီးကို သတိမရတော့ဘူး။ ဘာပြုလို့ နိဗ္ဗာန်ရလို့၊ ဒါဖြင့် နိဗ္ဗာန်ဟာ စကြာရတနာထက်= စကြ၀တေးစည်းစိမ်ထက် ချမ်းသာမယ်ဆိုတာ ထင်ရှားပြီ။
ခင်ဗျားတို့ အခုရထားတဲ့ လောကီစည်းစိမ်ဆိုတာ ဘာမှပြောပလောက်တာ မဟုတ်ဘူး။ ဒုက္ခတွေအဖုံဖုံနဲ့ အမြဲတွေ့ကြုံနေရတာပဲ။ ဒါတောင် ချမ်းသာဆိုတာ ဘာမှပြောပလောက်အောင် မရှိတဲ့ ကိုယ့်စည်းစိမ်ကလေးကို အဟုတ်ထင်ပြီး နိဗ္ဗာန်မကြိုက်နိုင်တာကဖြင့် တော်တော့ကို ကန်းတဲ့ အကန်းပဲ။ ဒီလိုပဲ ပြောရတော့မှာပဲ။ ဘုရားလက်ထက်က ဇောတိက၊ ဇဋိလ စတဲ့ လောကီစည်းစိမ်ရှင်ကြီးတွေ၊ ရှင်ဘုရင်တွေ၊ မင်းသားတွေဟာ မင်းစည်းစိမ် လူ့စည်းစိမ်တွေကို စွန့်ပြီး ရဟန်းပြုပြီးရဟန်းချမ်းသာနဲ့ နေသွားကြတယ်။ အရင်က စည်းစိမ်တွေကို သတိတောင်မရကြတော့ဘူး။ ဘာဖြစ်လို့- ၀ိပဿနာအားထုတ်လို့။ မဂ်ဖိုလ်တွေရပြီး နိဗ္ဗာန်ရောက်သွားလို့၊ စားသောက်မှု၊ ကျင်ကြီးကျင်ငယ်စွန့်မှုဆိုတဲ့ မလွဲသာတဲ့ကိစ္စကလေးတွေပြီးရင် တခါတည်း ဖလသမာပတ်တွေ နိရောဓသမာပတ်တွေ ၀င်စားပြီး နိဗ္ဗာန်ရဲ့အရသာကို ခံစားနေကြတာပဲ။ ကာမဂုဏ်စည်းစိမ်တွေ မှိုလိုပေါက်နေတဲ့ နတ်ပြည်မှာဆိုရင် အဆင့်မြင့်တဲ့ အရိယာတွေဟာ မနေနိုင်ဘူး။ တခါတည်း ဗြဟ္မာ့ပြည်ထွက်ပြေးပြီး နိဗ္ဗာန်ချမ်းသာကို ခံစားကြတော့တာပဲ။ ဘာဖြစ်လို့- နိဗ္ဗာန်ချမ်းသာဟာ နတ်စည်းစိမ်တွေထက် မယှဉ်သာအောင် အဆပေါင်းများစွာ သာလွန်လို့၊ ဒီတော့ နိဗ္ဗာန်ဟာ လောကမှာရှိတဲ့ စည်းစိမ်တကာ ချမ်းသာတကာတို့ထက် သာလွန်မြင့်မြတ်ကြောင်း မှန်းဆနိုင်လောက်ပြီ။
မိုးကုတ်ဆရာတော်ဘုရားကြီး၏ သစ္စာအနက် ၁၆-ချက် တရားတော်များမှ
No comments:
Post a Comment