နိဒါန်း
အခါတစ်ပါး၌ မြတ်စွာဘုရားသည် သာဝတ္ထိပြည် ဇေတ၀န်ကျောင်းတော်၌ သီးတင်းသုံးနေတော်မူ၏။ ထိုအခါ မြတ်စွာဘုရားသည် သာဝတ္ထိပြည်တွင်းသို့ ဆွမ်းခံလှည့်လည်ရင်း အဂ္ဂိကဘာရဒွါဇ ပုဏ္ဏားကြီး အိမ်သို့ ရောက်လာတော်မူသည်။
မီးပူဇော်ရန် ပြင်ဆင်နေသူ ပုဏ္ဏားကြီးက မြတ်စွာဘုရားကို တွေ့မြင်သောအခါ စိတ်ဆိုးပြီး “ရဟန်းယုတ် - အဲဒီနေရာမှာ ရပ်ပါ၊ သူယုတ်မာ- အဲဒီနေရာမှာ ရပ်ပါ” ဟု ကြမ်းကြမ်းတမ်းတမ်း ပြောဆိုတားမြစ်၏။
ထိုအခါ မြတ်စွာဘုရားက “ပုဏ္ဏားကြီး- သူယုတ်မာကို သိသလား၊ သူယုတ်မာဖြစ်ကြောင်း တရားကိုရော သိသလား”ဟု ချိုချို သာသာ မေးတော်မူ၏။
ပုဏ္ဏားကြီးက မသိပါကြောင်း ဖြေကြားပြီး သူယုတ်မာနှင့် သူယုတ်မာ ဖြစ်ကြောင်းတရားအပေါင်းကို ဟောကြားတော်မူပါရန် တောင်းပန်လျှောက်ထားသဖြင့် မြတ်စွာဘုရားက ဤ၀သလသုတ်တော်ကို အောက်ပါအတိုင်း ဟောကြားတော်မူသည်။
သူယုတ်မာဖြစ်ကြောင်းတရားများ
၁။ အမျက်ကြီးသူ၊ ရန်ငြိုးဖွဲ့သူ၊ သူတစ်ပါးဂုဏ်ကျေးဇူးကို ချေဖျက်သူ၊ မိစ္ဆာဒိဋ္ဌိအယူရှိသူ၊ မိစ္ဆာဒိဋ္ဌိအယူသို့ ကူးပြောင်းသူနှင့် မိမိ အပြစ်ဖုံးလွှမ်း၍ လှည့်စားတတ်သူတို့သည် သူယုတ်မာဖြစ်၏။
၂။ သတ္တ၀ါတို့အား သနားကြင်နာမှု မရှိဘဲ သတ်ဖြတ်သူသည် သူယုတ်မာဖြစ်၏။
၃။ မြို့ရွာတို့ကို တိုက်ခိုက် ဖျက်ဆီးသူသည် သူယုတ်မာဖြစ်၏။
၎။ သူတစ်ပါးအကြွေး ပြန်မပေးသူသည် သူယုတ်မာဖြစ်၏။
၅။ သူတစ်ပါးပစ္စည်း ခိုးသူသည် သူယုတ်မာဖြစ်၏။
၆။ လူသတ်၍ ပစ္စည်းယူသူသည် သူယုတ်မာဖြစ်၏။
၇။ မတရားသက်သေ ထွက်ဆိုသူသည် သူယုတ်မာဖြစ်၏။
၈။ သူတစ်ပါးသားမယားကို ပြစ်မှားလွန်ကျူးသူသည် သူယုတ်မာဖြစ်၏။
၉။ အမိအဘကို မကျွေးမွေး မပြုစုသူသည် သူယုတ်မာဖြစ်၏။
၁၀။ မိဘ, ညီအစ်ကို မောင်နှမ, ယောက္ခမတို့ကို ကိုယ်နှုတ်တို့ဖြင့် နှိပ်စက်ညှင်းဆဲနေသူသည် သူယုတ်မာဖြစ်၏။
၁၁။ သူတစ်ပါးက အကျိုးစီးပွား ရှိရာရှိကြောင်းကို မေးပါလျက် အကျိုးမဲ့ကို ပြောသူနှင့် အကျိုးစီးပွားရှိကြောင်း နည်းလမ်းကို ပေးပါသော်လည်း မေးသူမသိနိုင်လောက်အောင် ပြောသူသည် သူယုတ်မာဖြစ်၏။
၁၂။ မိမိပြုလုပ်ထားသော မကောင်းသော အမှုများကို တစ်ပါးသူ မသိအောင် ဖုံးကွယ်ထားသူသည် သူယုတ်မာဖြစ်၏။
၁၃။ သူတစ်ပါးအိမ်သို့သွားသောအခါ ဧည့်ဝတ်ပြုစုသည်ကို စားသောက်ပြီး မိမိအိမ်သို့ လာသည့်အခါမူ ဧည့်ဝတ် မပြုစုသူသည် သူယုတ်မာဖြစ်၏။
၁၄။ ဖိတ်ကြားဝန်ခံထားသူ အလှူခံပုဂ္ဂိုလ်များနှင့် သူတောင်းစားတို့ကို မလှူဒါန်း မပေးကမ်းပဲ လှည့်ပတ်နေသူသည် သူယုတ်မာဖြစ်၏။
၁၅။ ဆွမ်းခံလာသောရဟန်းကို ဆွမ်းမလောင်းပဲ ကြမ်းတမ်းစွာ ပြောဆိုသူသည် သူယုတ်မာဖြစ်၏။
၁၆။ သူတစ်ပါး၏ ပစ္စည်းကို ရယူလိုသဖြင့် မဟုတ်မမှန် လှည့်ပတ်ပြောဆိုသူသည်သူယုတ်မာဖြစ်၏။
၁၇။ မိမိကိုယ်ကို ဂုဏ်တင်မြှောက်စားပြီး သူတစ်ပါးကို နှိမ့်ချပြောဆိုသူသည် သူယုတ်မာဖြစ်၏။
၁၈။ သူတစ်ပါးကို ရန်ရှာသူ၊ မိမိကိုယ်တိုင် မလှူဒါန်း မပေးကမ်းရုံမျှမက သူတစ်ပါးတို့ လှူဒါန်းပေးကမ်းသည်ကိုပင် နှမြောတွန့်တိုသူ၊ မိမိမှာ မရှိသော ဂုဏ်သိက္ခာဖြင့် ချီးမွမ်းခံလိုသူ၊ နှမြောဝန်တိုသူ၊ မိမိမှာ မရှိသော ဂုဏ်ကို ရှိလေဟန်ဆောင်သူနှင့် မကောင်းမှုကို ပြုရန် မရှက်မကြောက်သူသည် သူယုတ်မာဖြစ်၏။
၁၉။ ဘုရား၊ တရား၊ သံဃာ ရတနာသုံးပါးနှင့် ရတနာသုံးပါးဆည်းကပ် ကိုးကွယ်သူများကို ရှုတ်ချပြောဆိုသူသည် သူယုတ်မာဖြစ်၏။
၂၀။ ရဟန္တာမဟုတ်ပါပဲလျက် ရဟန္တာဟု ၀န်ခံသူသည် လောက၌ အယုတ်မာဆုံးဖြစ်၏။
နိဂုံး
ဤသို့ မြတ်စွာဘုရား ဟောကြားတော်မူသော သူယုတ်မာဖြစ်ကြောင်းတရားတို့ကို ရှုဆင်ခြင်၍ ရှောင်ကြဉ်လိုက်နာ နိုင်ကြပါစေ။
ဗုဒ္ဓဘာသာတရားတော် အခြေခံအဆင့်မှ၊
No comments:
Post a Comment