အဓိပတေယျဋ္ဌောဆိုတာ မိမိသန္တာန်မှာ မဂ္ဂင် ၈-ပါးရောက်လို့ မိမိကိုယ်ကို မိမိအစိုးရတဲ့အဖြစ်သို့ ရောက်ရှိတာကိုဆိုတာ။ မဂ္ဂင် ၈-ပါးအစုံအလင်ရောက်တော့ ပညာမဂ္ဂင်က သမ္မာဒိဋ္ဌိ သမ္မာသင်္ကပ္ပ ၂-ပါး။ သမာဓိမဂ္ဂင်က သမ္မာဝါယာမ သမ္မာသတိ သမ္မာသမာဓိ ၃-ပါး။ သီလမဂ္ဂင်က သမ္မာဝါစာ သမ္မာကမ္မန္တ သမ္မာအာဇီဝ ၃-ပါး။ ပေါင်း ၈-ပါးဖြစ်တယ်။ ဒီ မဂ္ဂင် ၈-ပါး မိမိသန္တာန်မှာ ရောက်ရှိမှသာလျှင် မိမိ၏ သီလ သမာဓိ ပညာတွေဟာ အဓိ=အကြီးအကဲ အဆင့်သို့ရောက်ပြီး နောင်ဘ၀အဆက်ဆက်မှာ မပျက်မစီးခိုင်မြဲသွားတယ်။ မဂ္ဂင် ၈-ပါးမစုံသေးရင်တော့ ခင်ဗျားတို့မှာရှိတဲ့ သီလ သမာဓိ ပညာတွေဟာ မခိုင်မြဲသေးဘူး။ ဒီဘ၀မှာပဲ ပျက်စီးသွားနိုင်တယ်။ နောင်ဘ၀ရောက်ရင် ပျက်စီးသွားနိုင်တယ်။
အခု ခင်ဗျားတို့ ဆောက်တည်ထားတဲ့ ၅-ပါး၊ ၈-ပါး၊ ၁၀-ပါးစတဲ့ သီလတွေဟာ အခိုက်အတန့်ပဲ တည်နိုင်တယ်။ အကြောင်းတိုက်ဆိုင်လို့ရှိရင် ပျက်ကြတာပဲ။ အသက်နဲ့လဲပြီး ဒီသီလ မဖျက်ပါဘူးလို့ မလာသေးတော့ ဒီသီလဟာ သာမညသီလရှိသေးတယ်။ သမာဓိ ပညာတို့လဲ ထို့အတူပဲ။ ပျက်စီးသွားနိုင်တော့ သာမညပဲ။ အဲ .... မဂ္ဂသစ္စာဆိုက်တဲ့ သီလ သမာဓိ ပညာတို့ကျတော့ အဓိ ပါလာလို့ ဘယ်သူဖျက်လို့မှမရဘူး။ တတ်နိုင်လို့ ကုပ်ပေါ်ဓားဝဲပြီး မင်းသီလဖျက်ရမယ်၊ သမာဓိဖျက်ရမယ်။ ပညာဖျက်ရမယ်လို့ တဦးဦးကအဖျက်ခိုင်းပေမယ့်၊ အသက်သာအသေခံမယ်။ မဖျက်တော့ဘူး၊ အဲဒီကျမှ မြဲတယ်။ မဂ်မဆိုက်သေးတဲ့ သာမည သီလ သမာဓိပညာတွေကတော့ နတ်ပြည် ဗြဟ္မာ့ပြည်တိုင်အောင် အကျိုးပေးပါတယ်။ နိဗ္ဗာန်အထိတော့ အကျိုးမပေးဘူး။ မဂ်ဆိုက်တဲ့ အခါကျတော့ အဓိပါလာတဲ့အတွက် နိဗ္ဗာန်အထိအကျိုးပေးတယ်။ ဒီကျတော့ မြဲသွားပြီ။ ဒီတော့ ဘယ်အချိန်ကျမှမြဲမလဲဆိုတော့ ဒုက္ခချုပ်တာကိုမြင်မှ နိဗ္ဗာန်ကိုမြင်မှ (မဂ်ဆိုက်မှ)ပဲ မြဲမယ်။ ဒီလိုမြဲမှလဲ စိတ်ချရတယ်။ လားရာဂတိ မြဲတယ်။ အပါယ်မကျတော့ဘူး။ ချမ်းသာဟူသရွေ့ အထက်သာတက်သွားတယ်။ သမ္ဗောဓိပရာယနောတဲ့ အထက်မဂ်ကိုသာ သူတက်တော့မှာပဲ။ အောက်ပြန်မဆင်းတော့ဘူး။ ဒီတော့ နိဗ္ဗာန်ကိုမြင်မှ နိဗ္ဗာန်တည်းဟူသောအာရုံကို အမှီရမှ မိမိတို့ သီလ သမာဓိ ပညာဟာ အဓိပါပြီး မြဲမယ်လို့မှတ်။
အဲဒါကြောင့် မြဲတဲ့ စိတ်ချရတဲ့ သီလသမာဓိပညာမျိုးဖြစ်အောင် (၁) ဖြစ်ပျက်မြင်အောင်ကြည့်ပါ (၂) ဖြစ်ပျက်မုန်းအောင် ကြည့်ပါ (၃) ဖြစ်ပျက်ဆုံးအောင် ကြည့်ပါ၊ ဖြစ်ပျက်ဆုံးရင် နိဗ္ဗာန်မြင်ပြီ။ အဲဒီကျမှမြဲမယ်။ စိတ်ချရမယ်။ အခု ခင်ဗျားတို့ဆောက်တည်ထားတဲ့ သီလ သမာဓိ (သမထ)ပညာ (၀ိပဿနာ)တွေဟာ အထိမခံရွှေပန်းကန်မို့ မခိုင်မြဲသေးဘူး။ ဘာကြောင့် နိဗ္ဗာန်တည်းဟူသော အာရုံဆွဲကိုင်ရာမရသေးလို့၊ သူတို့ကို နိဗ္ဗာန်က အာရမ္မဏာဓိပတိ ပစ္စည်းနဲ့ ကျေးဇူးမပြုသေးဘူး။ မပြုသေးလို့ မမြဲတာ၊ ဘုရားလက်ထက်က ဒေ၀ဒတ်ကြီးဟာ (အဓိမပါသေးတဲ့) သမာဓိရလို့ ဈာန်ရပြီး မြေလျှိုးမိုးပျံနိုင်ပြီး တော်တော် တန်ခိုးကြီးခဲ့တယ်။ အခုအ၀ီစိမှာနေရတယ်။ ဘာကြောင့်။ သူရထားတဲ့ သမာဓိဟာ အဓိမပါလို့။ အဓိပတိ= ကြီးစိုးနိုင်တဲ့စွမ်းရည် သတ္တိမပါသေးလို့ ဘုရားလက်ထက်က တိဿရဟန်းကြီးဟာ သေတော့ သန်းဖြစ်ခဲ့ရတယ်၊ ဘာပြုလို့၊ သူ့ သီလ သမာဓိ ပညာတွေက အဓိ=အဓိပတိ မဖြစ်သေးလို့။ ဒီတော့ အဓိပတိမဖြစ်သေးတဲ့ မခိုင်မြဲတဲ့ သီလ သမာဓိ ပညာတွေကို သွားပြီး အားမကိုးကြနဲ့။ မခိုင်တာတွေကို သွားအားကိုးလို့ ပြုတ်ကျရင် မျောသွားမယ်၊ မြုပ်သွားမယ်။
ကမ်းနား သစ်ပင်။ ။ ခင်ဗျားတို့ ခန္ဓာ ၅-ပါးဟာ ကမ်းနားသစ်ပင်လို့မှတ်ထား။ ကမ်းနားသစ်ပင်ဆိုတာရေတိုက်စားလို့ အမြစ်ဟာ ခိုင်ခိုင်မြဲမြဲမရှိဘူး။ အမြစ်တွေကကုပ်အားမရှိလို့ ယိုင်တော့ မြစ်ထဲယိုင်နေတယ်။ ယိုင်လို့လဲတော့ မြစ်ထဲလဲပြီး ရေယဉ်ကြောထဲ မျောပါပြီး မြုပ်သွားမှာပဲ။ မင်းတို့ သံသရာခရီးသည်ဟာ ဒီလို ရေမျောလာတာနဲ့တူတယ်လို့ ဘုရားက ဥပမာပြလိုက်တယ်။ သံသရာခရီးသည်ဟာ တဏှာ မျှောတိုင်းမျောရတယ်။ တဏှာက နတ်ပြည်တောင်းလိုက်တော့ နတ်ပြည်မျောတာပဲ။ အင်း..... တဏှာနဲ့ ပတ်သက်ပြီး အကုသိုလ်မှုတွေ လုပ်ပြန်တော့လဲ အပါယ်မျောတာပဲ။ မြုပ်သွားတာပဲ။
အဲဒီတော့ သံသရာခရီးသည်ဟာ တဏှာရေယဉ်ကြောထဲမှာ မျောမှာပဲ။ ဟိုဘ၀ဒီဘ၀ဆိုတာက တဏှာပို့မှရောက်မှာပဲ။ တဏှာရေယဉ်ကြော မျောမှာပဲ ရောက်မှာပဲ။ တဏှာရေယဉ်က မျှောမပေးဘူးဆိုရင် တဘ၀နဲ့ တဘ၀ မရောက်နိုင်ဘူး။ အဲဒီတော့ သံသရာခရီးသည်ဟူသရွေ့ဟာ တဏှာရေယဉ်ထဲမှာ တဏှာမျှောသလို မျောရတာပဲ။ ခင်ဗျားတို့ အပါယ်ရောက်လိုက် လူ့ပြည်ရောက်လိုက် နတ်ပြည်ရောက်လိုက် ဗြဟ္မာ့ပြည်ရောက်လိုက်နဲ့ ၃၁-ဘုံအတွင်း လှည့်ပတ်မျောနေတာဟာ ဘာကြောင့်..... တဏှာရေယဉ်က မျှောလို့ မျောနေတာ။ ခင်ဗျားတို့ကလဲ တဏှာက မျှောလိုက်လို့ အခုလူ့ပြည်ရောက်လာတာပဲ။
ခန္ဓာ ၅-ပါးဟာ ကမ်းနားသစ်ပင်ပဲ၊ သံသရာခရီးသည်က ဒါကိုသွားဆွဲတယ်။ ကိုယ့်ရုပ်ကိုယ့်ခန္ဓာဆိုတဲ ရူပက္ခန္ဓာ ကိုဆွဲတယ်။ ချမ်းသာလေးဆိုတဲ့ ဝေဒနာက္ခန္ဓာကို သွားဆွဲတယ်။ သားမှတ် သမီးမှတ် မယားမှတ် ပစ္စည်းမှတ်ဆိုတဲ့ သညာက္ခန္ဓာကို သွားဆွဲတယ်။ ကိုယ့်စေတနာကိုယ့်စိတ်ဆိုတဲ့ သင်္ခါရက္ခန္ဓာ ၀ိညာဏက္ခန္ဓာကို ခင်တွယ်ပြီး သွားဆွဲတယ်။ ငါ့ကိုယ်ငါ့ဟာ ငါ့ဥစ္စာဆိုပြီး သွားဆွဲတယ်။ သွားဆွဲတော့ ကမ်းနားသစ်ပင်လို မခိုင်တဲ့ခန္ဓာ ငါးပါးဟာ ပြုတ်ကျတာပဲ။ ဆွဲတဲ့ပုဂ္ဂိုလ်ကလဲ တအားဆွဲ ကမ်းနားသစ်ပင် (ခန္ဓာ-ငါးပါး)ကလဲ ရေတိုက်စားလို့ (ဇရာ၊ ဗျာဓိ၊ မရဏ အိုနာသေကြောင့်) မခိုင်ဆိုတော့တခါတည်းပြုတ်ကျတာပဲ။ ခန္ဓာငါးပါးက အနိစ္စဖြစ်တော့ ပြုတ်ကျတယ်။ ပြုတ်ကျတော့ ဆွဲတဲ့လူ (ခင်တဲ့လူ)အပေါ် ပြုတ်ကျတာပဲ။ ပိကျတာပဲ။ ပိကျတော့ ဆွဲတဲ့လူဟာ မြုပ်ဖို့ပဲရှိတော့တယ်။ ဒါဖြင့် ခင်ဗျားတို့ဟာ နဂိုက အမျောသမားနော်။ ဟိုဘ၀ကမျောလာတာ။ အခုဒီဘ၀ကျတော့ တဏှာ ဥပါဒါန်နဲ့ ကိုယ်ဆွဲတဲ့ခန္ဓာငါးပါးကလဲပိပြီး ခင်ဗျားတို့ မြုပ်သွားတယ်။ မြုပ်တော့ အမြုပ်သမား ဖြစ်တာပေါ့။ အဲဒီလို ခင်ဗျားတို့ သံသရာခရီးတလျှောက် ဘ၀တိုင်းဘ၀တိုင်းမှာ မခိုင်တဲ့ခန္ဓာကြီးကို သွား သွားဆွဲနေတော့ ခန္ဓာကအနိစ္စဖြစ်လို့ ပြုတ်ကျတာနဲ့ ဒီခန္ဓာကြီး ပိပြီး ခင်ဗျားတို့မြုပ်ခဲ့ရ၊ မျောခဲ့ရတယ်။ သံသရာမှာ အမျောသမား၊ အမြုပ်သမားအဖြစ်နဲ့ပဲ နေခဲ့ကြရတယ်။ ခုနက အဓိသီလ အဓိသမာဓိ အဓိပညာတို့ကို မရခဲ့တော့ တဏှာမျှောတိုင်းမျောရတော့ မျောလိုက် မြုပ်လိုက် နေခဲ့ကြရတယ်။ ဒီလိုနေ ဒီလိုသေလို့ တဏှာပြောတိုင်း ဖြစ်ခဲ့ကြရတယ်။
အဲဒီတော့ အခုဘ၀မှာ ခင်ဗျားတို့ အဆွဲမမှားဖို့ အရေးကြီးတယ်။ ခန္ဓာငါးပါးကို သွားမဆွဲနဲ့။ အနိစ္စချည်းဖြစ်လို့ သွားမဆွဲနဲ့၊ ဆွဲရင် ဆွဲတဲ့ပုဂ္ဂိုလ်အပေါ်မှာ သူပြုတ်ကျမှာပဲ။ အဲ ခိုင်မြဲလှတဲ့ နိဗ္ဗာန်တည်းဟူသော ကျောက်ဆောင်ကြီးကို ဆွဲမိရင်တော့ ပြုတ်မကျလို့ မျောစရာမရှိတော့ဘူး။ ဒီတော့ နိဗ္ဗာန်ကို အဆွဲမှန်ဖို့ အရေးကြီးတယ်။ ခင်ဗျားတို့ အဆွဲမှားခဲ့လို့ အဆွဲမမှန်ခဲ့လို့ သံသရာတလျှောက် ဒီအတိုင်းမျောလာခဲ့ကြရတာနော်။ အဲဒီတော့ ခင်ဗျားတို့က ဘာတွေပဲ ပြောနေနေ၊ အမျောသမား အမြုပ်သမားဘ၀နဲ့ပဲ ဇာတ်ဆုံးတာပဲ။ အမျောသမား ဆိုတာက ဟိုဘ၀ ဒီဘ၀မျောတာကူးတာ။ အမြုပ်သမား ဆိုတာက အပါယ် ၄-ဘုံ ရောက်သွားတာ။ အဲ .... အပါယ်လေးဘုံရောက်ပြီး အမြုပ်သမားဘ၀က တက်လာပြန်တော့ အမျောသမားအဖြစ်နဲ့ လာပြန်တာပဲ။ မျောပြီးရင် နောက်မြုပ်ဦးမှာပဲ။ ဒါ သံဝေဂရအောင် ဟောနေတာမဟုတ်ဘူး။ ခင်ဗျားတို့ရဲ့ ဖြစ်စဉ်ကို ပြောနေတာလို့မှတ်။
ခင်ဗျားတို့ နောက်နောက်က ဒါန သီလလေး သမထလေးလုပ်ခဲ့လို့ လူ့ပြည် နတ်ပြည် ဗြဟ္မာ့ပြည်မှာ မျောခဲ့ရပြီ။ လူ့ခန္ဓာလဲ အနိစ္စပဲ။ နတ်ခန္ဓာလဲအနိစ္စပဲ။ ဗြဟ္မာ့ခန္ဓာလဲအနိစ္စပဲ။ သွားဆွဲရင် ပြုတ်ကျတာပဲ။ ပြုတ်ကျတော့ ဆွဲတဲ့လူအပေါ်မိမှာပဲ။ ပိတော့ အောက်ပြန်ကျမှာပဲ။ အောက်ပြန်ကျတော့ မြုပ်တာပဲ။ အပါယ်လေးပါးကျအောင် မြုပ်မှာပဲ။ မြုပ်သွားရင် ကမ္ဘာအသင်္ချေတိုင်အောင် မြုပ်သွားတာ ပေါ်လာဖို့မလွယ်ဘူး။ ခင်ဗျားတို့ နောက်တုန်းက “မျောလိုက် မြုပ်လိုက်” ဘုရားတွေအဆူဆူပွင့်ပေမယ့် ဘုရားပွင့်တုန်း ခင်ဗျားတို့က အပါယ်လေးပါး မြုပ်တဲ့အထိ တာရှည်နေတော့ ဘုရားကလဲ အဲဒီနေရာမကြွဘူး။ မြင်တော့မြင်တာပဲ။ မြင်ပေမယ့် ဒုဂ္ဂတိဘုံသားဖြစ်နေတဲ့အတွက် ကျွတ်တမ်းဝင်စရာ မရှိဘူးဆိုပြီး ဘုရားက မကြွဘူး။ ဘုရားက ကျွတ်တမ်းဝင်မယ့် ပုဂ္ဂိုလ်တွေဆီတာ အမြဲကြွတာ။ ကျွတ်မယ့်လူတွေဆီနောက်က အမြဲတမ်းလိုက်ပြီးကယ်နေရလို့ နေ့မအိပ်ရ ညမအိပ်ရတဲ့ ဘုရားဗျ။ ဘုရားပွင့်တာနဲ့ ကိုယ်က သုဂတိဘုံရောက်တာနဲ့ကြုံမှ၊ ဘုရားကလဲချွတ်မှ၊ ကိုယ်ကလဲ အဆွဲမမှားမှ ကျွတ်တမ်းဝင်နိုင်တာ။ ခင်ဗျားတို့ဘာ့ကြောင့် ကျွတ်တမ်းမ၀င်နိုင်ခဲ့တယ်ဆိုတာ အကဲခတ်ကြည့်ရင် သိလောက်ပြီ။ ဒီတခါ အဆွဲမှားရင် နောင်ဘ၀ ဘာဖြစ်မှာတုံးဆိုတာ ခင်ဗျားတို့ ဖြေတတ်ပြီလား။
ကဲ.... အခု ဘုန်းကြီးပြောပြလို့ ခင်ဗျားတို့က “ဒီ ခန္ဓာ ငါးပါးကို အားမကိုးတော့ဘူး၊ မဆွဲတော့ဘူး၊ အနိစ္စကို အနိစ္စမှန်း သိမယ်၊ ဒုက္ခကို ဒုက္ခမှန်းသိမယ်၊ အနတ္တမို့ အားကိုးစရာ အားထားစရာ မရှိဘူးလို့ သိမယ်” ဆိုရင် ဒီခန္ဓာကြီး ကမ်းနားသစ်ပင်ကို ဆွဲမှာ မဟုတ်ဘူး။ မဆွဲတော့ မခင်ဘူး။ မခင်လို့ မဆွဲတော့ဘူး။ (ခင်တာကတဏှာ) မခင်လို့ မဆွဲတော့ ဒီခန္ဓာကြီးက ခင်ဗျားတို့အပေါ် ပိကျစရာအကြောင်းမရှိတော့ဘူး။ မခင်တော့ တဏှာရေလဲခန်းသွားတယ်၊ ပိစရာလဲမရှိ၊ မျောစရာ ရေလဲမရှိတော့၊ မျောစရာ မြုပ်စရာအကြောင်းမရှိတော့ဘူး။ နိဗ္ဗာန်သောင်ကမ်းသို့ ရောက်သွားပြီ။ အဲဒီ အခြေအနေရောက်အောင်ဆိုရင် အလုပ်လုပ်မှပဲရမယ်။ တဏှာရေခန်းအောင်လုပ်ရမယ်။ ခန္ဓာငါးပါး ကမ်းနားသစ်ပင်ကိုလဲ မဆွဲရဘူး။ ဆွဲရင်မခိုင်ဘူးဆိုတာ သိရမယ်။ ဒါကြောင့် မဆွဲမိဖို့ ဆိုတာသည် တဏှာ ဥပါဒါန် မရှိအောင်နေပါလို့ ပြောတာပဲ။ အဲဒီတော့ သံသရာ စခန်းသတ်ချင်ရင် “တဏှာရေ” ခန်းအောင်လုပ်ပါ။ တဏှာရေခန်းရင် မျောစရာမရှိတော့ဘူး။
ဒီတော့ ခန္ဓာ ငါးပါးကို အနိစ္စ, ဒုက္ခ, အနတ္တရှုပေါ့ဗျာ။ ရှုတော့ မခိုင်မှန်း (မမြဲမှန်း) သိမယ်။ သိရင် မခင်တော့ဘူး။ မခင်ဘူးဆိုရင် တဏှာခန်းပြီ။ ဒီတော့ (၁) မခိုင်မှန်းသိတာရယ် (၂) မခိုင်မှန်းသိလို့ မခင်တာရယ် - ဒီ (၂)ချက်အရေးကြီးတယ်။ မခိုင်မှန်းသိရင် အနိစ္စမြင်မယ်။ အနိစ္စမြင်ရင် မခင်ဘူး။ မခင်လို့ရှိရင် တဏှာသေတယ်။ တဏှာရေခန်းတယ်၊ မခိုင်မှန်းသိရင် “အနိစ္စ, ဒုက္ခ, အနတ္တ” အကုန်မြင်တယ်။ ဒါတွေ မြင်ရင် နိဗ္ဗာန်မြင်တာပဲ၊ နိဗ္ဗာန်မြင်ရင် နိဗ္ဗာန်သောင်ကမ်းရောက်ရင် မမျောတော့ဘူး။ မမြုပ်တော့ဘူး။ အဲဒီတော့ နိဗ္ဗာန်မြင်အောင်ဆိုရင် ရှေးဦးစွာ ခန္ဓာငါးပါးကို ဖြစ်ပျက် ရှုရမယ်။ ရှုတုန်းတော့ မဂ္ဂင် ၅-ပါးပဲရှိသေးတယ်။ ၅-လုံးတွဲ ဖောင်ကလေးရပြီပေါ့။ ဒီဖောင်ကလေးက နည်းနည်းလောက်ပဲ အားကိုးလို့ရတယ်။ လှိုင်းတွေ, ၀ဲတွေဒဏ် မခံနိုင်သေးဘူး။ အဲဒါတွေနဲ့ တွေ့ရင် မြုပ်သွားနိုင်တယ်။ ဒီတော့ ဆက်ရှု၊ ဆက်ရှုလို့ ဖြစ်ပျက် ဒုက္ခသစ္စာ ခန္ဓာငါးပါးကို မခင်တော့ဘူး၊ မလိုချင်တော့ဘူးဆိုတာလာမယ်။ ဆက်ရှုလို့ ခန္ဓာငါးပါး ဒုက္ခသစ္စာကြီး ချုပ်သွားရင် မဂ္ဂင် ၈-ပါး ပြည့်သွားပြီ။ ၈-လုံးတွဲ ဖောင်ကြီးရပြီ။ ဒီဖောင်ကြီးကမှ အားကိုးလောက်တာ။ လှိုင်းဒဏ်လေဒဏ်ခံနိုင်ပြီ။ ဘယ်နည်းနဲ့မှ မမြုပ်နိုင်တော့ဘူး။ အဲဒီ မဂ္ဂင် ၈-ပါးဆိုတဲ့ ဖောင်ကြီးရမှ နိဗ္ဗာန်သောင်ကမ်းရောက်မယ်။ ရောက်ရင် နိဗ္ဗာန်ကိုဆွဲကိုင်မိပြီ။ အဆွဲမှန်ပြီ။ ဘယ်လောက်ဆွဲဆွဲပြုတ်မကျတော့ဘူး။ ဒီကျမှ ခင်ဗျားတို့ရဲ့ သီလ, သမာဓိ, ပညာတွေဟာ “အဓိ”ပါလာပြီး “အဓိပတေယျဋ္ဌော” (အဓိပတိ)ဖြစ်တာ။ ခိုင်မြဲတဲ့ အဆင့်ရောက်တာ။
မိုးကုတ်ဆရာတော်ဘုရားကြီး၏ သစ္စာအနက် ၁၆-ချက် တရားတော်များမှ
No comments:
Post a Comment