(က)ပါဏာတိပါတကံ လွန်ကျူးပြစ်နှင့် ရှောင်ကြဉ်ရကျိုး လင်္ကာနှင့် အဓိပ္ပါယ်
မည်သည့် သက်ရှိသတ္တ၀ါကိုမဆို ညှင်းဆဲသတ်ဖြတ်သောသူသည် သေသောအခါ ငရဲ၌ဖြစ်ရသည်၊
ငရဲမှ လွတ်၍ လူဖြစ်လာလျှင်သော်မှ-
(၁) ကိုယ်အင်္ဂါချို့တဲ့တတ်ခြင်း၊
(၂) အရုပ်ဆိုးခြင်း၊
(၃) အားအင်ချိနဲ့ခြင်း၊
(၄) လျင်မြန်ဖျတ်လတ်မှုမရှိခြင်း၊
(၅) ဘေးရန်နှင့်တွေ.က ကြောက်ရွံ့လွယ်ခြင်း၊
(၆) သူများသတ်၍ သေရခြင်း၊ မိမိကိုယ်ကို မိမိသတ်၍လည်း သေရခြင်း၊
(၇) အနာရောဂါများခြင်း၊
(၈) ခြွေရံပျက်စီးခြင်း၊
(၉) အသက်တိုခြင်း၊
ဤသို့ စသည်ဖြင့် များစွာသော အပြစ်များကိုလည်း ခံစားရတတ်သည်။
လင်္ကာ။ ။ ပါဏာတိပတ်၊ သူ.အသက်သတ်က၊ ချို.တတ်အင်္ဂါ၊ မွဲပြာရုပ်သွင်၊ အားအင်ယိုယွင်း၊လျင်ခြင်းလည်းဝေး၊ ဘေးကိုကြောက်တတ်၊ အသတ်ခံရာ၊ အနာများလျက်၊ ခြွေရံပျက်၍၊ အသက်တိုလျ၊ ပြစ်များစွာသည်၊ ရှောင်က အပြန်အကျိုးတည်း။
(ခ)အဒိန္နာဒါနကံ လွန်ကျူးပြစ်နှင့် ရှောင်ကြဉ်ရကျိုး
ပိုင်ရှင်သည် ကိုယ်နှုတ်ဖြင့် မပေးအပ်သော သက်ရှိ သက်မဲ့ပစ္စည်းကို ခိုးယူခြင်း၊ ဓားပြတိုက်ယူခြင်း၊ အာဏာဖြင့်ယူခြင်း၊ အလေး တင်းတောင်း ချိန်ခွင်တို့ဖြင့် လိမ်လည် လှည့်စား၍ ယူခြင်း၊ ရောင်းကုန်များ၌ ရေ စသည် ရောနှော၍ ရောင်းချခြင်း၊ ဖျင်း၊ အ၊ သူတို့၏ ပစ္စည်းကို လိမ်ညာ၍ ယူခြင်း၊ ခြောက်လှန့်၍ယူခြင်း၊ နှိုက်၍ယူခြင်း စသော မတရား ရယူမှု အားလုံးသည် ခိုးယူခြင်းဖြစ်သည်။ ထို အဒိန္နာဒါန အမှုကို ပြုသောသူသည် သေသောအခါ ငရဲ၌ဖြစ်ရသည်။ ငရဲမှ လွတ်၍ လူပြန်ဖြစ်ခွင့်ရလာလျှင်သော်မှ -
(၁) မွဲတတ်ခြင်း၊
(၂) ကိုယ်စိတ်ဆင်းရဲခြင်းဓ
(၃) ငတ်မွတ်ခြင်း၊
(၄) အလိုရှိသောအရာကို မရခြင်း၊
(၅) ဥစ္စာပျက်စီးခြင်း၊
(၆) ရန်သူမျိုးငါးပါး ဖျက်ဆီးခံရခြင်း၊
ဤသို့စသော မကောင်းကျိုးများခံစားရသည်။
လင်္ကာ။ ။ အဒိန္နာဒါ၊ ခိုးမိပါမူ၊ ဥစ္စာနည်းမွဲ၊ ဆင်းရဲငတ်ဘိ၊ လိုရှိမရ၊ ဘောဂပျက်စီး၊ ရေမီးသူခိုး၊ မွေခံဆိုးနှင့် မင်းဆိုးအပြား၊ ရန်မျိုး ငါးကြောင့်၊ ပျက်ပြားဥစ္စာ၊ ပြစ်များစွာသည်၊ ရှောင်ခါ အပြန် အကျိုးတည်း။
(ဂ)ကာမေသုမိစ္ဆာစာရကံ လွန်ကျူးပြစ်နှင့် ရှောင်ကြဉ်ရကျိုး
မိမိဇနီး၊ မိမိခင်ပွန်းလင်မှ တပါး အခြားမည်သည့်မိန်းမ ယောင်္ကျားတို့နှင့်မဆို ဖေါက်ပြန်ပေါင်းသင်း ကျူးလွန်းခြင်းကို “ကာမဂုဏ်တို့၌ မှားယွင်းစွာကျင့်သည်” ဟုခေါ်သည်။ ထိုသို့ မှားယွင်းစွာကျင့်သူကို ကာမေသုမိစ္ဆာစာရကံ လွန်ကျူးသည်ဟု ဆိုသည်။ ထိုလွန်ကျူးသူသည် သေသောအခါ ငရဲ၌ ဖြစ်ရသည်။ ငရဲမှ လွတ်၍ လူပြန်ဖြစ်ခွင့် ရလျှင်သော်မှ -
(၁) မလိုမုန်းထားသူပေါများခြင်း၊
(၂) ရန်သူလည်းများခြင်း၊
(၃) လာဘ်တိတ်ရှားပါးခြင်း၊း
(၄) ချမ်းသာမရှိခြင်း၊
(၅) မိန်းမဖြစ်ရခြင်း၊
(၆) မိန်းမ မဟုတ် ယောင်္ကျား မဟုတ် (နပုန်းပဏ္ဍုက်)ဖြစ်ရခြင်း၊
(၇) ယောင်္ကျားဖြစ်သော် အမျိုးယုတ်၌ ဖြစ်ရခြင်း၊
(၈) မျက်နှာပျက် အရှက်ကွဲရတတ်ခြင်း၊
(၉) ကိုယ်အင်္ဂါချို.တဲ့ သေးသိမ်ခြင်း၊
(၁၀)စိုးရိမ်ကြောင့်ကြအားကြီးခြင်း၊
(၁၁)ချစ်သူနှင့်ကွေကွင်းရခြင်း၊ အိမ်ထောင်မမြဲခြင်း၊
ဤသို့စသော များစွာသော အပြစ်များကိုလည်း ခံစားရတတ်သည်။
လင်္ကာ။ ။ မိစ္ဆာစာရ၊ ကျူးလွန်ကလည်း၊ မုန်းကြသူများ၊ ရန်သူပွါး၍၊ ရှားပါးလာဘ်တိတ်၊ ချမ်းသာဆိတ် ၏၊ ဣတ္ထိ ပဏ္ဍုက်၊ မျိုးယုတ်ခါခါ၊ မျက်နှာမလှ၊ အရှက်ရလျက်၊ ရူပဣနြေ္ဒ၊ ယွင်းသွေချို.သိမ်၊ စိုးရိမ်များစွာ၊ ချစ်သူကွာသည်၊ ရှောင်ခါအပြန်အကျိုးတည်း။
(ဃ)မုသာဝါဒကံကို လွန်ကျူးပြစ်နှင့် ရှောင်ကြဉ်ရကျိုး
ကိုယ်အမူအရာနှင့်ဖြင့်ဖြစ်စေ၊ နှုတ်ဖြင့်ဖြစ်စေ၊ သူတစ်ပါးအကျိုးပျက်စီးအောင် မဟုတ်မမှန်လိမ်လည် လျှင် မုသာဝါဒကံ လွန်ကျုးသည်ဟု ခေါ်သည်။ ထိုမဟုတ်မမှန် ပြောဆိုမှုသည် တစ်ဘက်သား အကျိုးပျက်စီးမှု ကြီးလျှင်ကြီးသလောက် အပြစ်ကြီးသည်။ ထိုသူသည် သေသောအခါ ငရဲ၌ဖြစ်ရသည်။ ငရဲမှ လွတ်၍ လူပြန်ဖြစ်ခွင့်ရလျှင်သော်မှ
(၁) စကားမပီသခြင်း၊
(၂) သွားမညီညွတ်ခြင်း၊
(၃) ခံတွင်းပုပ်ညှီခြင်း၊
(၄) အသားအရေမွဲခြောက်ခြင်း၊
(၅) မျက်စိ နား မကြည်လင်ခြင်း၊
(၆) ရုပ်အဆင်း ချို.တဲ့ခြင်း၊
(၇) သြဇာအာဏာမတည်ခြင်း၊
(၈) နှုတ်လျှာ ပြောဆိုမှု ကြမ်းတမ်းခြင်း၊
(၉) စိတ်မတည် လျှပ်ပေါ်လော်လည်တတ်ခြင်း၊
ဤသို့စသော များစွာသော အပြစ်များကိုလည်း ခံစားရတတ်သည်။
လင်္ကာ။ ။ မုသားစကား ပြောဆိုငြားမူ၊ စကားမပီ၊ သွားမညီတည်း၊ ပုပ်ညှီပါးစပ်၊ ခြောက်ကပ်ကိုယ်ရေ၊ ဣနြေ္ဒယွင်းနှောက်၊ ရုပ်ဆင်းဖောက်၏၊ မရောက်သြဇာ၊ နှုတ်လျှာကြမ်းထော်၊ လျှပ်ပေါ်လော်လည်၊ စိတ်မတည်သည်၊ ရှောင်ကြဉ်အပြန် အကျိုးတည်း။
(င)သူရာမေရယကံကို လွန်ကျူးပြစ်နှင့် ရှောင်ကျဉ်ရကျိုး၊ လင်္ကာနှင့် အဓိပ္ပါယ်
သေရည်သေရက်စသော မူးယစ်ဆေးဝါးအားလုံးသည် တစ်ခါသောက်သုံးမိလျှင် ထပ်ခါထပ်ခါ သောက်ချင် သုံးစွဲချင်၏၊ ဤသောက်သုံးမှုသည် မှုးယစ်မှုအားကြီးလာသောအခါ အချင်းချင်းကိုဖြစ်စေ၊ အခြားသူအားဖြစ်စေ၊ ရိုက်မှု၊ သတ်မှု၊ ခိုးမှု၊ လိမ်ညာမှု၊ သူ.သားအိမ်ရာ ပြစ်မှားမှု စသည်တို့ကို ဆက်လက် လွန်ကျူးမိတတ်ကြသည်။ ဤ သေရည်သေရက် မူးယစ်ဆေးဝါး
သောက်စားသုံးစွဲမှုသည် ဤဘ၀မှာပင် အသက်ဆုံးရှုံးရသည်အထိ ဆိုးကျိုးများကိုသာ ဖြစ်စေတတ်ပြီး သေသောအခါ ငရဲ၌ ကျရတတ်သည်။ထိုသေရည်သေရက် မူးယစ်ဆေးဝါးကို သောက်စားသုံးစွဲသော သူသည် မျက်မှောက်ဘ၀၊ နောက်ဖြစ်လေရာဘ၀တို့၌ -
(၁) အရေးအခွင့် သင့် မသင့်ကို မသိတတ်ခြင်း၊
(၂) ပျင်းရိတတ်ခြင်း၊
(၃) မေ့လျော့မူးဝေတတ်ခြင်း၊
(၄) သူ.ကျေးဇူးကို မသိခြင်း၊
(၅) အရှက်အကြောက်ကင်းခြင်း၊
(၆) ရူးသွပ်တတ်ခြင်း၊
(၇) မကောင်းမှု အားလုံး ကျူးလွန်လွယ်ခြင်း -
ဤသို့စသော များစွာသော အပြစ်ကိုလည်း ခံစားရတတ်သည်။
လင်္ကာ။ ။ သေရည်သောက်လင့်၊ သင့်-မသင့်၌၊ ရေးခွင့်မသိ၊ ပျင်းရိမေ့ရူး၊ ကျေးဇူးမဆပ်၊ ဟိရောတ္တပ်ကင်း၊ ခပင်းများထို၊ အကုသိုလ်ကို၊ မငြိုလွယ်စွာ၊ ပြုကျင့်ရာသည်၊ ရှောင်ခါ အပြန်အကျိူးတည်း။
သီလတစ်ပါးပါးပျက်လျှင် ခံရသည့် အပြစ်ပြ၀တ္တုများ
ပါဏာတိပါတကံပျက်လျှင် ခံရမည့် အပြစ်ပြ၀တ္တု
ရှေးအခါက အိမ်ရှင်မတစ်ယောက်သည် ဧည့်သည်အတွက် ကျွေးမွေးရန် ဟင်းလျာမရှိသဖြင့် အိမ်မှာရှိသော သိုးကလေးကို သတ်၍ ချက်ပြုတ်ကျွေးမွေးခဲ့၏။ ထိုမကောင်းမှု ကံကြောင့် သေသောအခါ ထိုသိုးကလေး၏ အမွှေးအရေ အတွက်နှင့်အမျှ နှစ်ပေါင်းများစွာ ငရဲ၌ခံရသည်။ ငရဲမှလွတ်သော အခါလည်း ဘ၀များစွာ သူတစ်ပါး အသတ်ခံရ၍ချည်း သေရသည်။
ကဗျာ။ ။
သူ့အသက်ကို သိလျက်သားနဲ့၊
ဒေါသစိတ်ထား သေစေလို၊
လုံ့လပြုကာ သေအောင်သတ်က၊
ပါဏာတိပါတ် အကုသိုလ်။
လွန်ကျူးမိလျှင် တကယ်ပဲပေါ့၊
အပါယ်ငရဲ ကျမည်ဆို။
လွတ်လာပြန်လဲ ရောဂါစွဲ ဆင်းရဲအသက်တို။
အဲဒါကြောင့် ပဉ္စသီလ တည်ကြပါစေလို။
အဒိန္နာဒါနကံပျက်လျှင် ခံရမည့် အပြစ်ပြ၀တ္တု
ရှေးအခါက ဈေးသည်မိန်းမ လေးယောက်တို့သည် မမှန်သော အလေး ချိန်ခွင်တို့ဖြင့် ရောင်းချပြီး ပစ္စည်းများ စုဆောင်းကြသည်။ အရွယ်ကောင်းတုန်းမှာပင် သေလွန်၍ ပြိတ္တာဖြစ်ကြသည်။ မိမိတို့ ရှေးကပြုခဲ့သော မကောင်းမှုများကို သိမြင်ရရုံသာမက ကျန်ရစ်သောယောင်္ကျားတို့ က နောက်မယားများယူကြပြီး မိမိတို့ ရှာဖွေစုဆောင်းထားသော ဥစ္စာပစ္စည်းများဖြင့် သုံးဖြုန်းပျော် ပါးနေကြသည်ကိုပါ တွေ့မြင်ကြရသည်။ “ငါတို့မှာတော့ ဒီပစ္စည်းတွေကို မတရားရှာဖွေခဲ့လို့ ဒုက္ခခံနေကြရပြီ၊ သူတို့မှာတော့ နောက်မယားတွေနှင့် ပျော်ပျော်ပါးပါးစားသုံးဖြုန်းတီးရက်ကြပါပေတယ်”ဟု အော်ဟစ်မြည်တမ်း နေကြလေသည်။
ကဗျာ။ ။
သူ့ဥစ္စာကို သိလျက်သားနဲ့၊
လောဘစိတ်ထား ခိုးယူလို။
လုံ့လပြုကာ ခိုးယူမိက၊
အဒိန္နာဒါန အကုသိုလ်။
လွန်ကျူးမိလျှင် တကယ်ပဲပေါ့၊
အပါယ်ငရဲ ကျမည်ဆို။
လွတ်လာပြန်လဲ ဥစ္စာမွဲ ဆင်းရဲဖြစ်တိုင်းကိုယ်။
အဲဒါကြောင့် ပဉ္စသီလ တည်ကြပါစေလို။
ကာမေသုမိစ္ဆာစာရကံ ပျက်လျှင်ခံရမည့်အပြစ်ပြ၀တ္တု
ရှင်အာနန္ဒာလောင်းလျာသည် ကမ္ဘာတစ်သိန်းမျှ ပါရမီဖြည့်ပြီးနောက် ကျွတ်တမ်းဝင်တော့မည့် ဤကမ္ဘာမှာပင် တစ်ခုသောဘ၀၌ ရွှေပန်းထိမ်သည် သားဖြစ်၏။ ထိုဘ၀၌ လူပေ လူတေတို့နှင့်ပေါင်းမိ၍ ကာမေသုမိစ္ဆာစာရကံကို ကျူးလွန်မိသည်။
ထိုအကုသိုလ်ကံကြောင့် ရောရုဝငရဲ၌ နှစ်ပေါင်းများစွာ ခံရပြီးနောက် လွတ်လာသောအခါ မျောက်ဖြစ်၍ ဝှေးစေ့ကို ကိုက်ဖောက်ခံရ၏။ နောက်တစ်ဘ၀၌ နွားဖြစ်၍ ဝှေးစေ့ထုတ်(သင်းကွပ်)ခံရ၏။ နောက်တစ်ဘ၀၌ လူဖြစ်သော်လည်း မိန်းမမဟုတ်၊ ယောင်္ကျားမဟုတ် နပုန်းပဏ္ဍုက်ဖြစ်ရသည်။ ငါးဘ၀မြောက်၌ ကုသိုလ်ကံအခွင့်ရ၍ နတ်ပြည်၌ဖြစ်သော်လည်း ထိုကာမေသုမိစ္ဆာစာရကံကြောင့် နတ်သားမဖြစ်ဘဲ နတ်သမီးချည်း ငါးဘ၀ဖြစ်ရသည်။ ထို့နောက်လူ့ပြည်၌ ရုစာမင်းသမီးဖြစ်လာသည်။ ထို့နောက်မှ ယောင်္ကျားဘ၀ ပြန်ရသည်။
ကာမေသုမိစ္ဆာစာရကံကြောင့် ပါရမီရှင်ကြီးသော်မှ ငရဲ၌ ခံရသည်ကိုသတိပြုကြပါလေ။
ကဗျာ။ ။
ရှောင်ရှားအပ်သူ မိန်းမများ၌၊
ရာဂစိတ်ထား ပေါင်းဖေါ်လို။
လုံ့လထုတ်ကာ ကျူးလွန်ပြုက၊
ကာမေသုတဲ့ အကုသိုလ်။
လွန်ကျူးမိလျှင် တကယ်ပဲပေါ့၊
အပါယ်ငရဲ ကျမည်ဆို။
လွတ်လာပြန်က နပုန်းပ မိန်းမဖြစ်သကို၊
အဲဒါကြောင့် ပဉ္စသီလ တည်ကြပါစေလို။
မုသာဝါဒကံ ပျက်လျှင်ခံရမည့် အပြစ်ပြ၀တ္တု
ရှေးလွန်လေပြီးသောအခါ ကသာပဘုရားရှင်လက်ထက်တော်က ကိမိလပြည်သား သောတာပန်ဖြစ်သော ဥပါသကာတစ်ယောက်သည် ဥပါသကာ ငါးရာတို့နှင့် စိတ်တူ သဘောတူ သစ်ပင်စိုက်ခြင်း ၊ တံတားခင်းခြင်း၊ ကျောင်းဆောက်လှူခြင်း စသော ကုသိုလ်ကောင်းမှုများကို ပြုလုပ်ကြလေသည်။ ထိုငါးရာသောဥပါသကာတို့သည် မကြာမကြာ ကျောင်းသို့သွား၍ တရားနာကြသည်။ ထိုသူတို့၏ မယားငါးရာလည်း လှူဖွယ်ဝတ္တုများဖြင့် ရံဖန်ရံခါ ကျောင်းသို့သွားရောက်ပြီး တရားနာကြသည်၊ လှူဒါန်းကြသည်။
တနေ့သောအခါ အရက်သမားတို့သည် ထိုငါးရာသောမိန်းမတို့ကို မြင်လျှင်တပ်မက်ကြသဖြင့် “အဘယ်သူသည် ထိုမိန်းမတို့၏ အကျင့်သီလကို ဖျက်ဆီးနိုင်သနည်း”ဟု အချင်းချင်းပြောဆိုကြ၏။ တစ်ယောက်သောသူက “ငါ ဖျက်ဆီးနိုင်၏” ဟု ဆို၏။ ထိုသူတို့သည် အလောင်းအစားပြုပြီး နည်းမျိုးစုံဖြင့် ထိုမ်ိန်းမတို့ကို ဖြားယောင်း သွေးဆောင် ဖျက်ဆီးကြလေရာ မိန်းမတစ်ဦး သီလပျက်ပြီး အရက်သမားတစ်ယောက်နှင့် ဖောက်ပြန်ကျူးလွန်မိလေတော့ သည်။ထိုအခါ ရှုံးသောအရက်သမားမှတဆင့် ထိုမိန်းမ၏လင်ယောင်္ကျားကြားလေရာ မိမိမယားအားခေါ်၍ မေးလေလျှင် မဟုတ်မှန်ကြောင်း လိမ်လည်ပြောဆို၏။ လင်ကမယုံလေသဖြင့် အနီးတွင်ရှိသည့် နားရွက်ပြတ်သော ခွေးနက်ကြီးကို ပြလျက် “ကျွန်မသည်တစ်ပါးသောယောင်္ကျားနှင့် ဖောက်ပြန်ကျူးလွန်မိ ပါက နောက်ဘ၀တွင် ဤခွေးနက်ကြီး အစားခံရပါစေ”ဟု ထပ်မံကျိန်ဆိုပြန်လေသည်။ဤသို့ ကျိန်ဆိုသော်လည်း လင်က မယုံသေးသဖြင့် အဖေါ်ဖြစ်သော မိန်းမတို့အား မေးမြန်းပြန်ရာ ထိုမိန်းမတို့လည်း သိလျက်နှင့် “ကျွန်မတို့မသိပါ၊ ဤအတိုင်း မမှန်ပါက ထိုမိန်းမ၏ ကျွန်ဖြစ်ပါစေ”ဟု ကျိန်ဆိုကြလေ၏။ ဖောက်ပြန်လွန်ကျူးသော မိန်းမသည် မကြာမီသေလွန်ပြီးလျှင် သီလစောင့်သောလင်ကို လိမ်လည်မိသော မုသာဝါဒကံကြောင့် ဟိမ၀န္တာတော ကဏ္ဍမုဏ္ဍအိုင်အနီး၌ နတ်ပြိတ္တာမဖြစ်လေသည်။ ကြွင်းသော မ်ိန်းမလေးရာကိုးဆယ့်ကိုးယောက်တို့သည်လည်း မမှန်စကားကျိန်ဆိုမိသောကြောင့် ထိုမိန်းမ၏ ကျွန်များ ဖြစ်လာကုန်၏။ ကာမဂုဏ်ဖောက်ပြန်မှုနှင့် မုသားဆိုခဲ့သော ထိုမိန်းမတို့သည် တစ်ချိန်က ရတနာသုံးပါးအား ကြည်ညိုပြီး တရားနာခဲ့ဖူးသော ကောင်းမှုကြောင့် နေ့အခါ လွန်စွာကြီးကျယ်ခန်းနားသော ရွှေဗိမာန်၌ နတ်စည်းစိမ်ကို ခံစားရသည်၊ ညဥ့်အခါ ခွေးနက်ကြီး ကိုက်စားခံကြရလေသည်။ ထို့အပြင်ထိုမိန်းမတို့သည် နတ်စည်းစိမ်ခံစားနေကြ ရသော်လည်း ယောင်္ကျားမရှိကြ၊ ယောင်္ကျားနှင့် ကင်းကွာနေရသဖြင့် ပျော်ရွှင်မှုမရှိ၊ ပျင်းရိငြီးငွေ့နေကြရကုန်၏။
မုသာဝါဒသည် အကုသိုလ်အရာတွင် အပြစ်အကြီးဆုံးဖြစ်၍သစ္စာစကားသည်ကုသိုလ်အရာတွင်အကျိုး အကြီးဆုံး ဖြစ်သည်။
ကဗျာ။ ။
မဟုတ်မမှန် တစ်ဘက်သားကို၊
ချွတ်ယွင်းလှည့်စား မုသားဆို၊
အဓိပ္ပါယ်ကို ထိုသူသိ၍၊
အကျိုးကိုထိ အကုသိုလ်။
လွန်ကျူးမိလျှင် တကယ်ပဲပေါ့၊
အပါယ်ငရဲ ကျမည်ဆို၊
လွတ်လာပြန်လဲ ပုပ်ညှီစွဲ သွားကျဲ နှုတ်ခမ်းတို။
အဲဒါကြောင့် ပဉ္စသီလ တည်ကြပါစေလို။
သုရာမေရယကံ ပျက်လျှင် ခံရမည့် အပြစ်ပြ၀တ္ထု
ဗာရာဏသီပြည်၌ ဘုရားလောင်းသည် ကုဋေရှစ်ဆယ် ကြွယ်ဝသော သူဌေးမျိုး၌ ဖြစ်သည်။ ဘုရားလောင်းသည် ဒါန သီလ စသော ကောင်းမှုတို့ကို ပြုပြီးနောက် သေလွန်သောအခါ တာဝတိံသာ၌ သိကြားမင်းဖြစ်လေသည်။ ဘုရားလောင်း၏ သားသည် မိဘတို့ကွယ်လွန်သော် ကျန်ရစ်ခဲ့သော ပစ္စည်းဥစ္စာများကို သေအရက်သောက်ကာ သုံးဖြုန်းပစ်ခဲ့သည်။ ထိုငွေကုန်ပြန်သောအခါ မြေ၌မြှုပ်ထားသော ကုဋေလေးဆယ်ကို ဖေါ်ထုတ်ပြီး သေတင်းကုပ်ဆောက်သည်။ သူငယ်ချင်းအပေါင်းအသင်းများနှင့် ပျော်ပျော်ပါးပါးအရက်သေစာ သောက်စားသည်။ အရက်မူးသောအခါ ကျွမ်းသမား ကချေသည်တို့ကို အသပြာတစ်ထောင် တစ်ထောင်စီပေးပြီး ဖျော်ဖြေစေသည်။ဤသို့ဖြင့် သောက်စား သုံးဖြုန်းလာခဲ့ရာ ကုဋေလေးဆယ်ကုန်ပြီး ဆင်းရဲမွဲတေသည့်ဘ၀သို့ ဆိုက်ရောက်ခဲ့သည်။ ပုဆိုးကြမ်းစုတ်ကိုဝတ်လျက် ခွက်လက်ဆွဲကာ တောင်းစားရသည့် သူတောင်းစားဘ၀သို့ ဆိုက်ရောက်သွားသည်။ နောက်ဆုံးအသေဆိုးနှင့်သေရသည်။
ကဗျာ။ ။
မူးယစ်တတ်စွာ သေရည်များကို၊
မူးယစ်သောက်စား ဘိန်းရှူလို။
ဒုစရိုက်တွေ ဖြစ်ပေါ်ကြောင်းမို့၊
မကောင်းစင်စစ် အကုသိုလ်။
လွန်ကျူးမိလျှင် တကယ်ပဲပေါ့၊
အပါယ်ငရဲ ကျမည်ဆို။
လွတ်လာစေဦး လူမေ့မူး အရူးဖြစ်တိုင်းကိုယ်။
အဲဒါကြောင့် ပဉ္စသီလ တည်ကြပါစေလို။
ဗုဒ္ဓဘာသာ တရားတော် (အခြေခံအဆင့်)မှ
No comments:
Post a Comment