တဏှာ=သမုဒယဆိုတာ သတ္တ၀ါတွေအား ဒုက္ခ၀တ္ထု ဒုက္ခမှုတွေကို တစ်ခုမကျန် တစ်ရံမစဲ အမြဲပေးအပ်ဆောင်နှင်းတတ်တဲ့ သဘောရှိတယ်။ ဒီတော့ တဏှာ=သမုဒယဟာ တရားတကာတို့တွင် အဆိုးဆုံးတရားပဲ၊ ဒီတရားကို မသတ်နိုင်လို့ရှိရင် ဒုက္ခတွင်းက ဘယ်တော့မှ ကျွတ်လွတ်မှာမဟုတ်ဘူး။ တဏှာသတ်ချင်ရင် သူ့ကို တိုက်ရိုက်မသတ်ရဘူး။ သတ်လို့မဖြစ်ဘူး။ သူ့သတ်ချင်ရင် သူ့ကိုဖြစ်စေတဲ့ အကြောင်းတရားကို သတ်ရမယ်။ အကြောင်းသတ်မှ အကျိုးသေမှာကိုး။ ဝေဒနာပစ္စယာတဏှာတဲ့။ ဝေဒနာကြောင့် တဏှာဖြစ်တာတဲ့၊ ဘုရားကဟောတယ်။ ဝေဒနာနိရောဓာ တဏှာနိရောဓော = ဝေဒနာချုပ်မှ တဏှာချုပ်မယ်တဲ့။ ဘုရားကဟောပြန်တယ်။ ဒါကြောင့် တဏှာချုပ်ချင်လို့ရှိရင် တဏှာ၏အကြောင်းဖြစ်တဲ့ ဝေဒနာကို ဖြစ်ပျက်ရှုရမယ်။ ၀ိပဿနာရှုရမယ်။
ဝမ်းထဲမှာ ဝေဒနာပေါ်လာပြီဆိုရင် တဏှာက၀င်ပူးတာပဲ။ သူဝင်လာရင် ဒုက္ခပေးမလို့သာ မှတ်ပေတော့။ အကျိုးဖြစ်တဲ့ တဏှာသေအောင် အကြောင်းဖြစ်တဲ့ ဝေဒနာကို သတ်ရမယ်။ အာရုံနဲ့ ဒွါရ (အာရုံက ၆-ပါး၊ ဒွါရက ၆-ပါး) တွေ့ဆုံတဲ့အခါမှာ ဝေဒနာတွေပေါ်တယ်။ ဒီလိုတွေ့တဲ့အခါ မနောဒွါရနဲ့ လှမ်းပြီးသာယာလိုက်တယ်။ အာရုံက သာယာစရာတရား။ ဝေဒနာက ခံစားတာ။ မနောဒွါရထဲက တဏှာက သာယာတဲ့တရား။ စက္ခုဒွါရနဲ့ ရူပါရုံ (မျက်စိနဲ့ အဆင်း)တွေ့တယ်။ သောတဒွါရနဲ့ သဒ္ဒါရုံ (နားနဲ့ အသံ)တွေ့တယ်။ ဃာနဒွါရနဲ့ ဂန္ဓာရုံ (နှာခေါင်းနဲ့ အနံ့)တွေ့တယ်။ ဇိဝှာဒွါရနဲ့ ရသာရုံ (လျှာနဲ့ အရသာ)တွေ့တယ်။ ကာယဒွါရနဲ့ ဖောဋ္ဌဗ္ဗာရုံ (ကိုယ်နဲ့ တွေ့ထိဘွယ်ဝတ္ထု)တွေ့တယ်။ မနောဒွါရနဲ့ ဓမ္မာရုံ (စိတ်နဲ့ အကြံအစည်သဘော)နဲ့ တွေ့တယ်။ ဒီလို ဒွါရ ၆-ပါးနဲ့ အာရုံ ၆-ပါး တွေ့တဲ့အခါမှ ခံစားမှုဝေဒနာဖြစ်တယ်။ ပြီးတော့ တဏှာက သာယာတယ်။ ဒီတော့ ဝေဒနာကို မနောဒွါရက ဖြစ်ပျက်ရှုရင် တဏှာမလာနိုင်ဘူး။ ဖြစ်ပျက်မရှုရင် တဏှာကလာမှာပဲ။
ဝေဒနာကို ဖြစ်ပျက်ရှုရင် (သမ္မာဒိဋ္ဌိ=ပညာ၊ သမ္မာသင်္ကပ္ပ= သမ္မ၀ါယာမ =၀ရိယ၊ သမ္မာသတိ၊ သမ္မာသမာဓိဆိုတဲ့) မဂ္ဂင် ငါးပါး ၀င်လာတယ်။ ၀ိပဿနာရှုရာမှာ သမ္မာဒိဋ္ဌိဆိုတဲ့ပညာက ဦးစီးပေမယ့်၊ ဒီ မဂ္ဂင် ငါးပါးဟာ အမြဲပါတာချည်းပဲ။ ၀ိပဿနာဆုံးတဲ့အခါမှာ (သမ္မာဝါစာ၊ သမ္မာကမ္မန္တ၊ သမာအာဇီဝ ဆိုတဲ့) မဂ္ဂင် သုံးပါးထပ်ပါလာလို့၊ မဂ္ဂင် ရှစ်ပါး ပြည့်လာတယ်။ မဂ္ဂင် ငါးပါးက လောကီမဂ္ဂသစ္စာ။ မဂ္ဂင် ရှစ်ပါးက လောကုတ္တရာ မဂ္ဂသစ္စာ။ လောကီမဂ္ဂသစ္စာမရှိပဲနဲ့ လောကုတ္တရာ မဂ္ဂသစ္စာမဖြစ်နိုင်ဘူး။ တနည်းပြောရရင် လောကီမဂ္ဂင် ငါးပါး ပုဗ္ဗဘာဂမဂ်= ရှေ့ပြေးမဂ်။ လောကုတ္တရာမဂ္ဂင်ရှစ်ပါးဆိုတာ ပစ္ဆာဘာဂမဂ်= နောက်ကဖြစ်မဂ်ပဲ။ ဒါကြောင့် ၀ိပဿနာမဂ်။ လောကီမဂ် ဟာ ပုဗ္ဗဘာဂမဂ် (မဂ်အတု)လို့ ခေါ်ပြီး၊ လောကုတ္တရာမဂ် အစစ်ကတော့ ပစ္ဆဘာဂမဂ်လို့ ခေါ်တယ်။ ဒီတော့ ၀ိပဿနာလောကီမဂ်၊ ပုဗ္ဗဘာဂမဂ်မဖြစ်ပဲနဲ့ မလုပ်ပဲနဲ့၊ လောကုတ္တရာမဂ်အစစ်= ပစ္ဆဘာဂမဂ်ဆိုတာ မပေါ်နိုင်ဘူးလို့ မှတ်ပါ။
လက်တွေ့နားလည်ရမှာကတော့ ဝေဒနာပေါ်တယ်။ ပေါ်လာတဲ့ ဝေဒနာကြီးကို ဖြစ်ပျက်ရှုပြီး၊ ဝေဒနာမရှိတာ = ချုပ်ပျောက်သွားတာကို သိအောင်လုပ်။ ဝေဒနာကိုဖြစ်ပျက်ရှုလို့ ဝေဒနာချုပ်တာ = မရှိတာကိုသိရင် လောကီမဂ်ပေါ်ပြီ။ ဖြစ်ပြီ။ ဒီလောကီမဂ်ပေါ်ရင် တဏှာမပေါ်ဘူး။ ဒီတော့ ဒီလောကီမဂ်ဟာ တဏှာ မလာအောင် တားနိုင်တယ်။ လောကီမဂ်က တဏှာမလာနိုင်အောင် တားရုံသာ တားနိုင်တာ။ အမြစ်ပြုတ်အောင် တခါထဲသေသွားအောင် နောက်ထပ်မပေါ်အောင်တော့ မလုပ်နိုင်သေးဘူး။ ဒီလောကီ မဂ်ရင့်လာလို့ မဂ္ဂင်ရှစ်ပါးစလုံး ပေါ်ပြီး လောကုတ္တရာမဂ်ပေါ်တော့မှ တဏှာအမြစ်ပြုတ်တာ။ ဝေဒနာကို ဖြစ်ပျက်ရှုရင် ဟဒယ၀တ္ထုပေါ်မှာ မဂ္ဂင်ငါးပါးပေါ်နေတယ်။ ဒီ မဂ္ဂင်ငါးပါး ၀ိပဿနာမဂ်ဟာ ဝေဒနာကိုဖြစ်ပျက်ရှုလို့ တဏှာမလာအောင် ချုပ်အောင် လုပ်နိုင်တယ်ဆိုတော့ သတ္တိဟာ မသေးဘူး။ အတော်ထက်မြက်တယ်။ သူ့ထက် ထက်မြက်တဲ့ လောကုတ္တရာမဂ်အစစ်ကျတော့ တဏှာဟာ တခါထဲသေသွားတယ်။ နောက် မရှုလဲ မပေါ်တော့ဘူး။ လောကီဝိပဿနာမဂ်ကတော့ ရှုတုန်းသာ တဏှာ မပေါ်အောင်လုပ်နိုင်တာ။ မရှုတဲ့အခါ တဏှာပြန်ပေါ်တာပဲ။ ဒါကြောင့် ဝေဒနာကို ဖြစ်ပျက်ရှုလို့ ဝေဒနာချုပ် ချုပ်သွားတာတွေ့ရင် မြင်ရင် တဏှာမလိုက်တော့ဘူး။ ဒီဖြစ်ပျက် ၀ိပဿနာရှုနေတုန်းမှာ တဏှာဟာ တဒင်္ဂ=တခဏ တော့ ချုပ်သွားတယ်။ သမုစ္ဆေဒအနေနဲ့ အမြစ်မပြတ်သေးဘူး။ ဒီတော့ လောကီမဂ်က တဏှာကို တားရုံတင်တားနိုင်ပြီး၊ လောကုတ္တရာမဂ်က အသေသတ် အမြစ်ဖြတ်နိုင်တယ်လို့ မှတ်ပါ။
ဝေဒနာသုံးမျိုး။ ။ အာရုံနဲ့ ဒွါရ တိုက်ဆိုင်တဲ့အခါ ဝေဒနာဟာသုံးမျိုးပေါ်နိုင်တယ်။ ကောင်းတဲ့ခံစားမှုကလေးပေါ်ရင် သုခဝေဒနာ၊ မကောင်းတဲ့ ဆင်းရဲတဲ့ ခံစားမှုကလေးပေါ်ရင် ဒုက္ခဝေဒနာ၊ ကောင်းသည်လည်းမဟုတ်၊ မကောင်းသည်လည်းမဟုတ် အလယ်အလတ်ဖြစ်တဲ့ ခံစားမှုကလေးပေါ်ရင် ဥပေက္ခာဝေဒနာ၊ ဒီလိုဝေဒနာ သုံးမျိုးပေါ်နိုင်တယ်။ ဒီ ဝေဒနာ သုံးမျိုးထဲက ပေါ်တဲ့ဝေဒနာဟူသရွေ့ ဖြစ်ပျက်ရှုရမယ်။ မရှုလို့ရှိရင် သုခဝေဒနာပစ္စယာတဏှာ၊ ဒုက္ခဝေဒနာပစ္စယာဒေါသ၊ ဥပေက္ခာဝေဒနာပစ္စယာမောဟ ဆိုတော့ သုခဝေဒနာမရှုရင် တဏှာလာမယ်။ ဒုက္ခဝေဒနာ မရှုရင် ဒေါသလာမယ်။ ဥပေက္ခာဝေဒနာမရှုရင် မောဟလာမယ်၊ ဒီလို ဆဆက္ကသုတ်မှာ ဘုရားကဟောထားတယ်။ ဒီ တဏှာ၊ ဒေါသ၊ မောဟတွေဟာ ပဋိစ္စသမုပ္ပါဒ်အကြောင်းတရားတွေပဲ။ အကြောင်းတရားဟူသရွေ့ သမုဒယချည်းပဲလို့မှတ်။
ဒီတော့ (၁) သုခဝေဒနာကို ဖြစ်ပျက်ဝိပဿနာမရှုလို့ တဏှာလာရင် တဏှာ၊ ဥပါဒါန်၊ ဘ၀၊ ဇာတိ၊ ဇရာမရဏ ဆက်သွားမယ်။ (၂) ဒုက္ခဝေဒနာကို ဖြစ်ပျက်မရှုလို့ ဒေါသလာရင် သောက၊ ပရိဒေ၀၊ ဒုက္ခဒေါမနဿတွေ လာမယ်။ (၃) ဥပေက္ခာဝေဒနာကို ဖြစ်ပျက်မရှုလို့ မောဟ=အ၀ိဇ္ဇာလာရင် သင်္ခါရ၊ ၀ိညာဏ်၊ နာမ်ရုပ်ဘက် လှည့်သွားမယ်။ တဏှာ၏ ရေသောက်မြစ်ဟာ ဝေဒနာပဲ။ ဒေါသ၏ ရေသောက်မြစ်လဲ ဝေဒနာပဲ။ မောဟ=အ၀ိဇ္ဇာဆိုတဲ့ ကိလေသာတွေမလာအောင် ဝေဒနာကို ဖြစ်ပျက်ရှုရမယ်။ ၀ိပဿနာမဂ်နဲ့ ရှုရမယ်။
ဒီလိုရှုလို့ (၁) သုခဝေဒနာကိုရှုရင် တဏှာ၊ ဥပါဒါန်၊ ဘ၀၊ ဇာတိ၊ ဇရာမရဏတွေမလာတော့၊ ပဋိစ္စသမုပ္ပါဒ်ဟာ အလယ်ကပြတ်သွားတယ်။ (၂) ဒုက္ခဝေဒနာကိုရှုရင် သောက၊ ပရိဒေ၀၊ ဒုက္ခဒေါမနဿတွေမလာတော့၊ ပဋိစ္စသမုပ္ပါဒ်ဟာ အဆုံးနားကပြတ်သွားတယ်။ (၃)ဥပေက္ခာဝေဒနာကိုရှုရင် အ၀ိဇ္ဇာ၊ သင်္ခါရ၊ ၀ိညာဏ်၊ နာမ်ရုပ်တွေမလာတော့ ပဋိစ္စသမုပ္ပါဒ် အစကပြတ်သွားတယ်။ တစ်နည်းပြောရရင် (၁) သုခဝေဒနာရှုရင် သံသရာစခန်းအလယ်က ပြတ်တယ်။ (၂) ဒုက္ခဝေဒနာရှုရင် အဆုံးနားကပြတ်တယ်။ (၃) ဥပေက္ခာဝေဒနာရှုရင် အစကပြတ်တယ်။ ဒါဖြင့် ဝေဒနာဖြစ်ပျက်ရှုတဲ့ အလုပ်သည် ပဋိစ္စသမုပ္ပါဒ်(၀ါ)သံသရာစခန်းပြတ်တဲ့အလုပ်လို့မှတ်။ ပဋိစ္စသမုပ္ပါဒ်ဆိုတာ ခင်ဗျားတို့ သံသရာတစ်လျှောက်လုံးပြေးနေတဲ့ အ၀ိုင်းပြေးပုံကို ပြောတာ။ ဒီတော့ သုခဝေဒနာနောက်က တဏှာကို မသတ်နိုင်ရင်၊ ဒုက္ခဝေဒနာနောက်က ဒေါသကို မသတ်နိုင်ရင်၊ ဥပေက္ခာဝေဒနာနောက်က မောဟ=အ၀ိဇ္ဇာကို မသတ်နိုင်ရင်၊ မင်းတို့ ဒီဘ၀ နိဗ္ဗာန်ရောက်မှာ မဟုတ်ဘူးတဲ့ ဘုရားက ဆဆက္ကသုတ်မှာ ဟောထားတယ်။ ဝေဒနာကို ၀ိပဿနာမဂ်နဲ့ ဖြစ်ပျက်ရှုလို့ အဲဒါတွေသတ်နိုင်ရင် ဖြတ်နိုင်ရင် နိဗ္ဗာန်ရောက်မယ်တဲ့။
ဒါကြောင့် နိဗ္ဗာန်ရောက်ချင်ရင် ဝေဒနာကို ဖြစ်ပျက်ရှု၊ ဝေဒနာကိုသတ်၊ ဝေဒနာနဲ့တဏှာမှာ ဝေဒနာသတ်မလား၊ တဏှာသတ်မလားဆိုတော့ အကျိုးဖြစ်တဲ့ တဏှာကို သတ်မနေနဲ့။ တဏှာ၏ဖြစ်ကြောင်း - ရေသောက်မြစ်ဖြစ်တဲ့ ဝေဒနာကို သတ်ပါ။ ဒါကြောင့် ဝေဒနာနုပဿနာကို အမြဲလုပ်။ ဝေဒနာကို အမြဲဖြစ်ပျက်ရှု။ နေ့တိုင်းရှု - အမြဲရှု။ ခင်ဗျားတို့ ခန္ဓာကိုယ်ကြီးဟာ တရွေ့ရွေ့နဲ့ အမြဲပဲ သုသာန်ကို သွားနေတယ်။ ဒီတော့ သုသာန်သွားနေရင်း ဝေဒနာကို အမြဲရှု။ ၀ိပဿနာ အလုပ် လုပ်။ သုသာန်သွားရင်းလုပ်တော့ ဒီ တစ်ခါသာ သုသာန်သွားရမယ်။ နောက်တော့ သွားဖို့မလိုတော့ဘူး။ သုသာန်သွားရင်းမှ မလုပ်တော့ပါဘူးဆိုရင် ဒီသုသာန်ကို ပြန်ရောက်ဦးမှာပဲ။ ဒါကြောင့် သုသာန်သွားရင်းလုပ်။ သူများအသုဘတွေ သုသာန်သွားပို့ပြီး စကားတပြောပြောနဲ့ ထီးဆောင်းပြန်လာတာတွေကများတယ်။ ကိုယ်လဲ ဒီသုသာန် တစ်နေ့ရောက်ရမှာပါလားလို့ တရားနှလုံးမသွင်းကြဘူး။ ခင်ဗျားတို့လည်း သုသာန်ရောက်လုနီးနေပြီ။ ဒီတော့ အိုခြင်းဆိုး၊ နာခြင်းဆိုး၊ သေခြင်းဆိုးမှ လွတ်ချင်ရင် ဝေဒနာကို အမြဲဖြစ်ပျက် ရှုပေတော့။
မိုးကုတ်ဆရာတော်ဘုရားကြီး၏ သစ္စာအနက် ၁၆-ချက် တရားတော်များမှ
No comments:
Post a Comment