ဝေဒနာပစ္စယာတဏှာ (ဝေဒနာကြောင့် တဏှာဖြစ်၏)လို့ ဘုရားကဟောထားတယ်။ ခင်ဗျားတို့ သန္တာန်မှာ ဝေဒနာသာပေါ်လို့ရှိရင် တဏှာလာမှာပဲတဲ့။ ဘုရားပွင့်ပွင့် မပွင့်ပွင့် ဝေဒနာပစ္စယာတဏှာ..... တော့ ရှိနေတာပဲ။ ဒါပေမယ့် ဘုရားမပွင့်ရင် ဝေဒနာပစ္စယာတဏှာ....ချည်းဖြစ်မယ်။ ဘုရားပွင့်တော့ ဝေဒနာနိရောဓာ တဏှာနိရောဓော (ဝေဒနာချုပ်ရင် တဏှာချုပ်တယ်)ဖြစ်နိုင်တယ်။ ဒါထူးခြားတာပဲ။ ဝေဒနာနိရောဓာ တဏှာနိရောဓောဆိုတာကလဲ အလုပ်လုပ်တဲ့ ပုဂ္ဂိုလ်မှဖြစ်တာ။ အလုပ်မလုပ်တဲ့ပုဂ္ဂိုလ်မှာ ဖြစ်ကိုမဖြစ်ဘူး၊ (ဝေဒနာပစ္စယာတဏှာပဲ ဖြစ်မယ်)။
ဝေဒနာဖြစ်ရင် တဏှာလာမယ်။ တဏှာလာလို့ရှိရင် ဒီဘက်က ဥပါဒါန်၊ ကမ္မဘ၀၊ ဇာတိ၊ ဇရာမရဏတွေဟာ ပဋိစ္စသမုပါဒ် အစဉ်အတိုင်း သွားတော့မှာပဲ။ ဒါ နိယာမပဲ၊ ဘုရားပွင့်လို့ ဘုရားရဲ့တရားတော်ကို နာရလို့ ခင်ဗျားတို့ ကျုပ်တို့ အားထုတ်တဲ့ ပုဂ္ဂိုလ်တွေကျတော့ ဝေဒနာနိရောဓာ တဏှာနိရောဓော= ဖြစ်နိုင်တယ်။ ဒါဘုရားပွင့်ခြင်း၏ ကျေးဇူးပဲ။ ဘုရားဆီက နည်းရပြီး ကျင့်ရင်တော့ ဝေဒနာနိရောဓာ တဏှာနိရောဓော= ဖြစ်မယ်။ ကိုယ့်အိမ်မှာ ဘုရား တရား သံဃာ ကြည်ညိုတယ် ဆိုတာက သဒ္ဓါ ပြဋ္ဌာန်းတယ်။ ၀ိပဿနာအလုပ်လုပ်တဲ့ ပုဂ္ဂိုလ်ကျတော့ ပညာပြဋ္ဌာန်းတယ်။ ဒီအလုပ်မလုပ်တဲ့ ပုဂ္ဂိုလ်ကျတော့ သဒ္ဓါပဲပြဋ္ဌာန်းတယ်။ ပညာယံ သေဋ္ဌော လောကသ္မိံ (လောက ၃-ပါး၌ ပညာသည်သာ တရားတကာတို့ထက်အမြတ်ဆုံး)လို့ ဘုရားဟောတယ်။ ဘာကြောင့် ပညာအမြတ်ဆုံး ဖြစ်ရတာလဲ။
တခြားတရားတွေ မဖောက်ထွင်းနိုင်တဲ့ ၀ိဇ္ဇာတဏှာထုကြီးကို ပညာက ဖောက်ထွင်းနိုင်တယ်။ ကျန်တဲ့တရားတွေက မဖောက်ထွင်းနိုင်ဘူးတဲ့။ ဒါကြောင့် ရှိသမျှ တရားတကာတွေထဲမှာ ပညာဟာ အမြတ်ဆုံးလို့မှတ်။ ဒါဖြင့် ဝေဒနာနိရောဓာ= ဝေဒနာမရှိတာကိုမြင်ပါမှ တဏှာနိရောဓော=ဆိုတဲ့ မဂ်ဉာဏ်လာမယ်= ပဋိစ္စသမုပါဒ်ပြတ်မယ်လို့ ဘုရားကဟောထားတယ်။ ဝေဒနာချုပ်တာကိုမြင်တဲ့ ၀ိပဿနာမဂ်ပေါ်လာတော့မှ တဏှာနိရောဓာ= ဖြစ်တယ်။ နို့မဟုတ်ရင် မဖြစ်ဘူး။ သေသေချာချာရှုလို့ ဝေဒနာဖြစ်ရာက ချုပ်ပျောက်သွားတော့မှ ဝေဒနာချုပ်ပျောက်သွားရာကို မြင်လိုက်မှ တဏှာနိရောဓ ဖြစ်မယ်။ ဝေဒနာနိရောဓ= မမြင်နိုင်တဲ့ပုဂ္ဂိုလ်မှာ တဏှာနိရောဓ မဖြစ်။ ဒါဖြင့် ဝေဒနာနိရောဓဖြစ်အောင် အလုပ်လုပ်မှ ရမယ်လို့မှတ်။
ဝေဒနာရှု။ ။ ဝေဒနာက ခန္ဓာကိုယ်ထဲမှာ သုခပေါ်ပေါ် ဒုက္ခပေါ်ပေါ် ဥပေက္ခာပေါ်ပေါ် ရှုလိုက်လို့ ပျောက်ပျက်တဲ့ နိရောဓကို နောက်ကရှုတဲ့ဉာဏ်က မြင်ပါမှ တဏှာနိရောဓ ဖြစ်တယ်။ (ဒါအလုပ်သဘောပဲ) နို့မဟုတ်ရင် ဝေဒနာဖြစ်တိုင်း တဏှာကလာမှာပဲ၊ ဒါဖြင့် ဝေဒနာပေါ်တုန်း ပေါ်ဆဲကို နိရောဓမြင်အောင် ကြည့်ရလိမ့်မယ်။ ဝေဒနာနိရောဓ= မြင်တဲ့ မဂ်လာရင် တဏှာနိရောဓဖြစ်ပြီ။ ဒီနေရာမှာ (ဝေဒနာနဲ့ တဏှာကြားမှာ) မဂ်မလာဘူးဆိုရင် တဏှာ ဥပါဒါန် ကံတွေဖြစ်မှာပဲ။ ဒါဖြင့် တဏှာချုပ်အောင် ဘယ်လိုလုပ်မလဲ။ ဝေဒနာကို ရှုရှုပေး။ ကြပ်ကြပ်ရှုပေး။ ရှုပြီး ဝေဒနာချုပ်တာ မြင်အောင်ရှုနိုင်တဲ့ အလုပ်လုပ်။ ချုပ်ပြီ ချုပ်ပြီလို့ နောက်ကမြင်နေမယ်ဆိုရင် တဏှာချုပ်နေတာပဲ။ ဝေဒနာချုပ်တာ မြင်မြင်နေတဲ့ပုဂ္ဂိုလ်ဟာ တဏှာချုပ်တာပဲ။ တဏှာဟာ ပေါ်ခွင့်မရပဲနဲ့ ချုပ်သွားတော့ တဏှာနိရောဓော= နိဗ္ဗာန်ဖြစ်တာပဲ။ သံယုတ်မှာ ဒီအတိုင်းလာတယ်။
ဝေဒနာချုပ်တော့ တဏှာချုပ်။ ။ တဏှာချုပ်တော့ နိဗ္ဗာန်လာတာပဲ။ တဏှာသာစွန့် နိဗ္ဗာန်ရပြီလို့ ဘုရားကဟောတယ်။ ဒီတော့ ဝေဒနာကိုကြည့်ကြည့်ပေး (ရှုရှုပေး)။ ကြည့်တဲ့အခါ မဂ္ဂင် ၅-ပါးက ဝေဒနာကိုမြင်တယ်။ နောက်ဝေဒနာနဲ့ မတွေ့စေနဲ့။ ချုပ်တာချည်း တွေ့နေပစေ။ ဝေဒနာတွေ့နေရင် တဏှာလာဦးမယ်။ ချုပ်တာနဲ့တွေ့တော့ တဏှာမလာတော့ဘူး။ တဏှာချုပ်ရင် နိဗ္ဗာန်ပဲ။ မဂ်ဉာဏ်နဲ့နိဗ္ဗာန်ကို မြင်တာပဲ။ ဒီတဏှာချုပ်တာကို မျက်စိ၊ နား၊ နှာခေါင်း၊ လျှာ၊ ကိုယ်တွေနဲ့ မမြင်နိုင် မသိနိုင်ဘူး။ ဉာဏ်နဲ့မှ မြင်တယ်။ ဉာဏ်နဲ့ကြည့်လိုက်တဲ့အခါ သုခဖြစ်ဖြစ်၊ ဒုက္ခဖြစ်ဖြစ်၊ ဥပေက္ခာဖြစ်ဖြစ် ဘယ်ဝေဒနာမှ မတွေ့တော့ဘူး။ ဝေဒနာမရှိတာ ချုပ်တာ (နိရောဓ)ကို သိတော့တယ်။ ဒီတော့ မရှိတာက အနိစ္စ (နိရောဓ)။ သိတာက မဂ္ဂ၊ မဂ်လာကတည်းက တဏှာမလာတော့ဘူး။ တဏှာမလာတော့ ဥပါဒါန်မလာ၊ ဥပါဒန်မလာတော့ ကမ္မဘ၀မလာ၊ ကမ္မဘ၀မှ မလာလို့ရှိရင် ဇာတိ၊ ဇရာ၊ ဗျာဓိ၊ မရဏတွေလဲ မလာတော့ဘူး။ ဒီဘက်လာမယ့် ဒုက္ခတွေ ချုပ်သွားတယ်။ ဒါ မဂ်ဝင်လာသောကြောင့် တဏှာသမုဒယချုပ်သွားလို့ ဒုက္ခသစ္စာတွေ ချုပ်သွားရတာ။
ဝေဒနာရှုတဲ့အခါမှာ ဝေဒနာမြင်ရုံနဲ့ မပြီးသေးဘူး။ ချုပ်သွားတာမြင်မှ ပြီးတယ်။ ရှေ့က (ဝေဒနာက) ချုပ်သွားလိုက် နောက်က (မဂ်က) မြင်လိုက်၊ ဒီလိုချည်း လိုက်ပေးတဲ့ အခါကျတော့ တဏှာဟာ ချုပ်သွားတယ်။ ဒါဖြင့် တဏှာချုပ်အောင် လုပ်တဲ့အလုပ်ဟာ သံသရာစခန်းသတ်တဲ့အလုပ်။ တဏှာမချုပ်စေတဲ့ အလုပ်ကတော့ သံသရာလည်တဲ့အလုပ်လို့မှတ်။ သံသရာလည်တာက ဝေဒနာ၊ တဏှာ ချုပ်အောင် မလုပ်တဲ့ပုဂ္ဂိုလ်၏ လမ်းစဉ်။ သံသရာစခန်း သတ်တာဟာ ဝေဒနာ တဏှာချုပ်အောင် လုပ်တဲ့ပုဂ္ဂိုလ်၏လမ်းစဉ်။ ဒီလိုလမ်းစဉ် ၂-မျိုးကွဲသွားတယ်။ ဝေဒနာချုပ်တာ မြင်မှုသည် နိဗ္ဗာန်ရောက်တဲ့အလုပ်ပဲ။ ဝေဒနာကို နောက်ကသိတာက တဏှာနဲ့သိတာ။ ခံစားလို့ ကောင်းလိုက်တာဆိုတာဟာ တဏှာပဲကိုး။ ဒါဟာ သံသရာရှည်တဲ့အလုပ်ပဲလို့မှတ်။ တဏှာ၊ ဥပါဒါန်၊ ဘ၀၊ ဇာတိဇရာ မရဏလို့ ဒုက္ခထဲလည်တဲ့အလုပ်ပဲ။
တဏှာ၏ဆိုးဝါးယုတ်မာပုံ။ ။ အခု သမုဒယသစ္စာဆိုတဲ့ တဏှာ=လောဘ၏ ဆိုးဝါးယုတ်မာပုံကို ဟောတော့မယ်။ ဘာကြောင့်ဟောရသတုံး၊ ခင်ဗျားတို့က တဏှာကိုမိတ်ဆွေဖွဲ့ထားလို့၊ ဒီအရွယ်ရောက်ရင် လုပ်တတ်ကိုင်တတ်ပြီ၊ ငွေရှာတတ်ပြီ၊ လောဘဖြစ်တတ်ပြီ။ လူကြီးတွေကတော့ ကလေးတွေကို နင်တို့က တဏှာလောဘနည်းသေးတယ်၊ ပိုက်ဆံမ၀င်သေးတော့ နင်တို့ များများရအောင် ကြိုးစားရမယ် စသည်ဖြင့် သင်ပေးကြတယ်။ ဒါ တဏှာသင်ပေးနေတာပဲ။ ဒီ တဏှာလေးရှိလာတဲ့ ပုဂ္ဂိုလ်ကျတော့ ပစ္စည်းကို ရှာဖွေလာတယ်။ ပစ္စည်းကလေးရမှန်းသိတော့ စွဲလမ်းလာတယ်။ ဒီတော့ တဏှာ ဥပါဒါန် ကမ္မဘ၀လာတော့တာပဲ။ ကမ္မဘ၀ဖြစ်တော့ ဇာတိ ဇရာမရဏဘက် သွားတော့တာပဲ။ လောကီမျက်လုံးနဲ့ ကြည့်လိုက်ရင်တော့ အမေအဖေတွေ အသင်အပြကောင်းတယ်လို့ဆိုမယ်။ လောကုတ္တရာမျက်လုံးနဲ့ ကြည့်တော့ ဒါဂျောက်တွန်းတာပဲ။
တဏှာရဲ့ ဆိုးသွမ်းပုံကို ဟောနေတာ။ ဒီလို တဏှာဆိုးသွမ်းပုံကို သိမှတာ ခင်ဗျားတို့ သူနဲ့ မပေါင်းချင် မသင်းချင်ဆိုတာလာမှာ။ ဘုရားက တဏှာဒုတိယာပုရိသောလို့ ဟောထားတယ်။ ခင်ဗျားတို့ တဏှာအပြစ်ကို မသိသေးသရွေ့ တဏှာနဲ့နေရာတာ ပျော်နေမှာပဲ။ တယောက်တည်း စိတ်ကူးကလေးနဲ့ပေါ့။ နက်ဖြန် ဟိုက ဘယ်လောက်ရမယ်၊ ဘယ်သွားရင် ဘယ်လိုအမြတ်ထွက်မယ်ဆိုပြီး ဒီလိုနဲ့ စိတ်ကူးကလေးနဲ့ ပျော်နေကြတာ၊ တခါတလေ အကြောင်းမညီညွတ်လို့ တဏှာသဘောအတိုင်း ဖြစ်မလာဘူးဆိုရင် ဒေါသနဲ့ နှစ်ယောက်ထဲများ ရန်ဖြစ်နေကြသေး။ ဒေါသနဲ့ခန္ဓာ ရန်ဖြစ်ကြတယ်။ ခင်ဗျားတို့က အခါကောင်းပြန်တော့ “လောဘ”နဲ့ အဖော်လုပ်။ အခါမကောင်းပြန်တော့ “ဒေါသ”နဲ့ အဖော်လုပ်။ ဒီ ၂-ခုနဲ့ အဖော်လုပ်နေရာမှာလဲ မောဟက တွဲလျက်ပါနေတာပဲ။ ဘုရားက တဏှာဖြတ်ခန်း ဟောနေတယ်။ ခင်ဗျားတို့က တဏှာနဲ့မိတ်ဆွေဖွဲ့နေတယ်။ ဒါ ဘုရားကို ဂွတိုက်တာပဲ။
ဝေဒနာပစ္စယာတဏှာ ဟာ နေရာမရွေးဘူး။ သွားရင်း လာရင်းလဲ တယောက်နဲ့တယောက်ဖြစ်ဖြစ် ကိုယ့်စိတ်ကူးကလေးနဲ့ကိုယ်ဖြစ်ဖြစ် တဏှာဟာဖြစ်နေတာပဲ။ အိပ်ရာထဲမှာနေရင်း တဏှာနဲ့အဖော်လုပ်နေတာလဲ ရှိတာပဲ။ ဒါကြောင့် ဘုရားက တဏှာနဲ့သာ အဖော်လုပ်နေလို့ရှိရင် ဘယ်တော့မှ သံသရာကမထွက်ပါဘူးတဲ့။ တဏှာအဖော်လုပ်တဲ့ ပုဂ္ဂိုလ်ဟာ သံသရာရှည်တော့မှာပဲ၊ ဟိုဘ၀ ဒီဘ၀နဲ့ ကူးနေမှာပဲတဲ့။ အို, နာ, သေ, ကွဲ, မွဲဆိုတဲ့ သံသရာကြီးကို ကျော်မသွားနိုင်ဘူးတဲ့။ ဘုရားက သုတ္တနိပတ် သံယောဇနသုတ်မှာ ဟောထားတယ်။ ဒါ တဏှာအဖော်လုပ်မိလို့ ဒုက္ခတွေ့ပြီး သံသရာရှည်နေတာ။ ခင်ဗျားတို့ကတော့ ရရာရကြောင်းကလေးမှ စိတ်မကူးရလို့ရှိရင် ခြောက်တောက်တောက်ကြီး ဖြစ်နေတယ်။ ပျင်းလာတယ်။ စိတ်ပျက်လာတယ်။ ငွေကလေးမှန်မှန်ဝင်ဝင်နေတဲ့ ပုဂ္ဂိုလ်ရဲ့မျက်နှာကိုကြည့်၊ ပြုံးနေတာပဲ။ ဒါ တဏှာနဲ့ အဖော်လုပ်တာ။ အကြောင်းမညီညွတ်လို့ ငွေမ၀င်ဘူးဆိုရင် ပျင်းတယ်တဲ့။ လူပေါင်းတော့မှားပေါ့။ လူပေါင်းမှားလို့ ဒုက္ခရောက် သံသရာရှည်ရပေါ့။ အိုနာသေဘေးတွေ အပါယ်ဘေးတွေနဲ့ သံသရာထဲက ထွက်တော့မှာ မဟုတ်တော့ဘူး။
ဘယ်သူ့ကြောင့် အဲဒီတဏှာနဲ့ အဖေါ်လုပ်ဖြစ်တာတုံး။ ဟောဒီ ကောင်းကောင်းကလေးဆိုတဲ့ သုခဝေဒနာလေးကို ကြိုက်တာနဲ့ တဏှာဖြစ်နေတာ။ သုခဝေဒနာဟာ တဏှာရဲ့ ရေသောက်မြစ်ပဲ။ ချမ်းသာချင်လို့ လိုချင်ရချင်တာ ရှိနေတာပဲ။ မချမ်းသာချင်တဲ့ ပုဂ္ဂိုလ်မှာ လိုချင် ရချင်မရှိပါဘူး။ ဒါဖြင့် တဏှာကိုမကြောက်နဲ့။ သုခဝေဒနာကိုကြောက်ပါ။ ဒီတော့ သုခဝေဒနာ=ချမ်းသာတာဝမ်းထဲမှာ (ဟဒယ၀တ္ထုပေါ်မှာ) ပေါ်တိုင်းပေါ်တိုင်း ဖြစ်ပျက်သာရှုစမ်းပါ။ ရှုရင် တဏှာအဖော်မလာတော့ဘူး။ တဏှာမလာရင် သံသရာပြတ်ပြီ။ နိဗ္ဗာန်ရောက်ပြီ။ ဒီ တဏှာအကြောင်း ကောင်းကောင်းသိရင် သူ့ကို ပေါင်းသင်းတော့မှာ မဟုတ်တော့ဘူး။
တဏှာနဲ့ မပေါင်းချင်အောင် ဟောရမှာပဲ။ တဏှာဟာ ဘာလုပ်တတ်တုံး။ သူ့လုပ်ငန်းကိစ္စ ဘာတုံး။ တဏှာဟာ သမုဒယသစ္စာပဲ။ သမုဒယသစ္စာဟာ ဒုက္ခဖြစ်ကြောင်းပဲ။ ဒါဖြင့် တဏှာဟာ အလွန်ဒုက္ခပေးတတ် နှိပ်စက်တတ်တဲ့ တရားအစစ်ပဲ။ တဏှာဟာ ခင်ဗျားတို့ရဲ့ ငယ်ပေါင်းဖြစ်တယ်။ ပဋိသန္ဓေ တည်လာကတည်းက သူနဲ့လာခဲ့တာကိုး။ ကြီးတော့လဲ မခွဲကြဘူး။ သူနဲ့သာ အဖော်လုပ်ပြီးနေခဲ့ကြတယ်။ ဒီနေ့တော့ ငယ်ပေါင်း၏ အမြဲနှိပ်စက်တတ်တဲ့သတ္တိကို အကုန်ဟောရမှာပဲ။ ငယ်ပေါင်းကိုထိတော့ ငယ်ပေါင်းနဲ့ ခွဲရတော့မယ်ဆိုတော့ ခင်ဗျားတို့ မျက်ရည်များ ကျမလား မပြောတတ်ဘူး။
တဏှာ နာမည်က သမုဒယသစ္စာတဲ့။ သမုဒယဆိုတာ ဖြစ်ကြောင်း။ ဒုက္ခဖြစ်ကြောင်း၊ သစ္စာက မှန်တာ။ ခင်ဗျားတို့ ဒုက္ခရောက်အောင် မကောင်းအောင် ဆိုးသွမ်းယုတ်မာအောင် သူ့ထက်မှန်အောင် လုပ်နိုင်တဲ့တရား မရှိဘူး။ တဏှာက မကောင်းမှုသာလုပ်ရမယ်ဆိုရင် ကျုပ်အလုပ်နိုင်ဆုံးပဲတဲ့။ မကောင်းတဲ့အကြောင်း မှန်မှန်လုပ်ဖို့အလုပ်ဟာ သူ့ဝတ္တရားပဲတဲ့။ ဘယ်သူ့မှ ချမ်းသာမပေးဘူး။ မကောင်းတဲ့အလုပ် လုပ်ပေးရာမှာ ဘယ်အခါမဆို မှန်မှန်လုပ်နိုင်တဲ့တရားပဲ။ နဲနဲမှ မတိမ်းဘူး။ ပြီးတော့ သူကလဲ လူမိုက် မိုက်တဲ့နေရာမှာ ၂-ယောက်မရှိဘူး။ သူဝင်လာပြီဆိုရင် မကောင်းတာဟူသရွေ့ မိုက်မိုက်ကန်းကန်းလုပ်တော့တာပဲ။ မကောင်းတဲ့အလုပ်တွေဟူသရွေ့ သူ့လက်ရာချည်းပဲ။ မကောင်းတဲ့ ဆိုးကျိုးတွေ ဒုက္ခတွေဟူသရွေ့ သူ့လက်ရာချည်းပဲ။ ဒီတော့ ၀မ်းထဲ သူဝင်လာတယ်ဆိုရင် ဒါ ဂြိုဟ်ဝင်တာပဲ။ သူ့လက်ခံထားရင် ဂြိုဟ်မွှေတော့မယ်သာမှတ်။ ခင်ဗျားတို့ကလည်း ဒီဂြိုဟ်ကလေးနဲ့မှ အတူနေချင်တာ။ သူ့အဖော် မလုပ်ရရင် ပျင်းတယ်တဲ့။ ဒီတော့ ခင်ဗျားတို့က ရန်သူကို မိတ်ဆွေမှတ်ပြီး ပေါင်းနေတော့ မကောင်းတာ ဆိုးတာဟူသရွေ့ ဒုက္ခဟူသရွေ့ အကုန်တွေ့ရတော့တာပဲ။ ဒါကြောင့် ခင်ဗျားတို့ ဒုက္ခရောက်တာ သနားစရာမဟုတ်ဘူး။ ဘာဖြစ်လို့၊ ဖျင်းလွန်း အ,လွန်း....လို့။
သမုဒယ (တဏှာ)ဆိုရင် ဘယ်သမုဒယမှ ကောင်းတယ်လို့ မပြောနိုင်ဘူး။ နတ်ပြည်တောင့်တတဲ့တဏှာလဲ ကောင်းတယ်လို့ မပြောနိုင်ဘူး။ ဗြဟ္မာ့ပြည်ကြိုက်တတ်လို့ တဏှာလဲ ကောင်းတယ်လို့ မဟောနိုင်ဘူး။ နတ်ပြည်တောင့်တတဲ့တဏှာကြောင့် နတ်ဒုက္ခရမှာ၊ ဗြဟ္မာ့ပြည်တောင့်တတဲ့တဏှာကြောင့် ဗြဟ္မာ့ဒုက္ခရမှာ။ လူ့ပြည်တောင့်တတဲ့တဏှာကြောင့် လူ့ဒုက္ခရမှာ။ သားတွေငါးတွေစားချင်တဲ့ တဏှာကြောင့် သားတွေငါးတွေသတ်စားလို့ရှိရင် အပါယ်ဒုက္ခရမှာ။ ဒီတဏှာကိုတော့ သတ်မှတော်မယ်။ ချမ်းသာပေးလို့ မဖြစ်ဘူးလို့ စိတ်မွေးထားမှဖြစ်မယ်။ တဏှာဆိုတာ လောဘပဲ။ ဒီတော့ လောဘလေးပေါ်တိုင်း သမုဒယလေး အဆိုးတရားလေး ပေါ်လာတယ်လို့သိပေးပါ။ ဒီလိုသိရင် သမုဒယသစ္စာကိုသိတယ်မည်တယ်။ သမုဒယဆိုတာ ဒုက္ခဖြစ်ကြောင်း၊ သစ္စာဆိုတာ အမှန်၊ ဘုရားက သဗ္ဗညုတဉာဏ်နဲ့ ကြည်လိုက်တော့ သမုဒယဟာ ဒုက္ခဖြစ်ကြောင်း အမှန်တခုထဲပဲတွေ့တယ်။ ဒုက္ခဖြစ်ကြောင်း အမှန်ဟာ သမုဒယသစ္စာတခုပဲတွေ့တယ်။
တထောင့်ငါးရာ ကိလေသာဆိုတာ ဘုရားက ဉာဏ်ကျယ်လို့ဟောတာ။ ဒါတေါဟာ တဏှာ၏ အခြံအရံတွေ အကူအညီတွေပဲ။ ဒီတော့ အ၀ိဇ္ဇာထက် တဏှာကထက်တယ် လို့မှတ်ပါ။ သစ္စာနဲ့ဝေဖန်ကြည့်တော့မှ တဏှာက ပိုထက်တာကို သိရတယ်။ အ၀ိဇ္ဇာက ဒီလောက်မထက်ဘူး။ သစ္စာလေးပါးဖွင့်ကြည့်တော့မှ ပယ်ရမယ့်တဏှာလဲသူပဲ။ သူ့ပယ်ရင် တဖွဲ့ကြီး ပါတယ်ဆိုသောကြောင့် သူ ခေါင်းဆောင်ပဲ။ တဏှာက ခေါင်းဆောင်ပဲ။ ခင်ဗျားတို့က တဏှာကို ကြည်ညိုလွန်းလို့ ခေါင်းပေါ်ရွက်ထားတယ်။ သူ့ကို ခေါင်းဆောင်တင်ထားတယ်။ သူ့ကို အဖေါ်လုပ်နေရတာ သိပ်ပျော်တယ် ဟုတ်လား။ ဘုန်းကြီးက သမုဒယသစ္စာ၏ ဆိုးဝါးပုံ ညစ်ပတ်ပုံကို သိအောင်လို့ ကိစ္စဉာဏ်ကို ဟောပေးနေရတာ။ သူ့ကို ပယ်ချင်စိတ်ပေါ်လာအောင် ဟောပေးရတာ။ သူ့အကြောင်း သူ့ကိစ္စကိုသာ ကောင်းကောင်းသိရင် သူ့ကို သတ်ချင်တယ်ဆိုတာ ဖြစ်လာမှာ။ သူ့အကြောင်း သူ့ကိစ္စ မသိရင်တော့ သူ့ကို သတ်ချင်မှာ မဟုတ်ဘူး။ အဖော်လုပ်ချင်နေမှာပဲ။
မိုးကုတ်ဆရာတော်ဘုရားကြီး၏ သစ္စာအနက် ၁၆-ချက် တရားတော်များမှ
No comments:
Post a Comment