ဒုက္ခဿ=ဒုက္ခသစ္စာ၏
(၁) ပီဠနဋ္ဌော = သတ္တ၀ါကို ညှာတာမဖက် အမြဲနှိပ်စက်တတ်သည့် သဘောလည်းကောင်း၊
(၂) သင်္ခတဋ္ဌော = အဖန်ဖန်ပြုပြင် ထူထောင်တတ်သည့်သဘော (၀ါ) တဏှာယောက်ျားလက်သမား၏ ဆိုးဝါးယုတ်မာပြုပြင်ရာကို ရံခါမသွေ အမြဲခံနေသည့် သဘောလည်းကောင်း၊
(၃) သန္တာပဋ္ဌော = သတ္တ၀ါကို အမြဲတစေ ပူလောင်စေတတ်သည့် သဘောလည်းကောင်း၊
(၄) ၀ိပရိနာမဋ္ဌော = ခန္ဓာငါးပါး၏ အမြဲမပြတ်ဖေါက်ပြန်ပျက်စီးတတ်သည့် သဘောလည်းကောင်း။
ဒုက္ခသစ္စာ၏ ပီဠနဋ္ဌအနက်
ဒုက္ခသစ္စာတခုတည်းမှာ အနုဗောဓဉာဏ်နဲ့ ပဋိဝေဓဉာဏ် ၂-ပါးရှိတယ်။ ဒုက္ခသစ္စာကို ဒီနှစ်ပါးနဲ့ ကြည့်ရမယ်။ အနုဗောဓဉာဏ်ဆိုတာ ဆရာသမားဟောတာကို အစဉ်လျောက်ပြီး မှတ်လို့ ကြည့်လို့ ဖြစ်လာတာ၊ တရားနာလို့ စာအုပ်ကြည့်လို့ ရလာတဲ့ဉာဏ်ပေါ့။ ပဋိဝေဓဉာဏ်ဆိုတာက ကိုယ်တိုင်ကိုယ်ကျ ထိုးထွင်းဝေဖန်ပြီး ခန္ဓာထဲမှ မဂ်ဉာဏ်နှင့် သေသေချာချာကြည့်လို့ ဒုက္ခသစ္စာအစစ်ကို တကယ်မြင်တဲ့ဉာဏ်မျိုးဖြစ်တယ်။ ဒါဖြင့် တရားနာလို့ စာကြည့်လို့ ကိစ္စမပြီးသေးဘူး။ ၀ိပဿနာဉာဏ်ပွားတတ်ရုံနှင့် ကိစ္စမပြီးသေးဘူး။ ဒုက္ခသစ္စာကို တကယ်ကို ဒုက္ခသစ္စာလို့ ပိုင်းခြားပြီးသိတဲ့ ပဋိဝေဓဉာဏ်ရောက်မှ ကိစ္စပြီးမယ်လို့မှတ်ပါ။
ခန္ဓာ ငါးပါး၊ ရုပ်နာမ် နှစ်ပါးရှိတယ်။ ဒီခန္ဓာ ငါးပါး၊ ရုပ်နာမ် နှစ်ပါးဟာ ဖြစ်ပျက်မို့ ဒုက္ခသစ္စာပဲလို့ ဆရာသမားက ဟောပြောတာကို မှတ်ထားတာက အနုဗောဓဉာဏ်နှင့် သိထားတာ။ ရုပ်နာမ် နှစ်ပါး ဖြစ်ပျက်မို့ ဒုက္ခသစ္စာ၊ ဖြစ်ဒုက္ခ ပျက်ဒုက္ခမို့ ဒုက္ခသစ္စာလို့သိရင် ၀ိပဿနာဉာဏ်ဖြစ်နေပြီ၊ ဖြစ်ပျက်သာသိပြီး ဒုက္ခသစ္စာလို့ တကယ်မသိသေးတော့ ဒါ အနုဗောဓဉာဏ်ပဲ ရှိသေးတယ်။ အဲ ...၀ိပဿနာဉာဏ်နဲ့ ရှုဖန်များလို့ ဒုက္ခသစ္စာကို ပီဠနဋ္ဌောနှင့်သိလာမှ ပဋိဝေဓဉာဏ်ဖြစ်တာ။ ဒုက္ခသစ္စာကို ပီဠနဋ္ဌော=သတ္တ၀ါကို ညှာတာမဖက် အမြဲနှိပ်စက်တတ်တဲ့ သဘောရှိတယ်လို့ တကယ်သိလာမှ ပဋိဝေဓဉာဏ်ဖြစ်တာ။
အခု ရုပ်နာမ်က နှိပ်စက်ပုံကို ပဋိဝေဓဉာဏ်နှင့် သိပုံရှင်းပြမယ်။
အမေတယောက်က ရုပ်နှင့်နာမ်ဆိုတဲ့ အမွှာပူးကလေး မွေးတယ်။ ရုပ်နှင့်နာမ်က ပဋိသန္ဓေနေကတည်းက အမိဝမ်းခေါင်းထဲမှာ အတူတူနေခဲ့တာကိုး၊ ခင်ဗျားတို့ ခန္ဓာကိုယ်ဟာ ခန္ဓာငါးပါးပဲ ရှိတယ်။ ခန္ဓာငါးပါးကို ချုံးလိုက်တော့ ရုပ်နှင့်နာမ်ပဲ ရှိတယ်။ ရုပ်ဓမ္မနှင့် နာမ်ဓမ္မပဲရှိတယ်။ နာမ်တရားက ခြေကျိုး လက်ကျိုးနှင့် သည်းခြေပျက်၊ ၀မ်းတွင်းရူးဖြစ်တယ်။ ရုပ်တရားဟာ ခြေလက်တွေသန်မာပေမယ့် မျက်စိနှစ်ကွင်း အလင်းမရတဲ့အပြင် သူငယ်နာဝမ်းပျက်ကပါလာသေးတယ်။ ဒီ ရုပ်နာမ်ဆိုတဲ့ သူတို့နှစ်ဦးက သူတို့ကိန်းရာ သတ္တ၀ါကို ချစ်ခင်ပြီး ထိန်းကျောင်းနေတဲ့သတ္တ၀ါကို အမြဲနှိပ်စက်တော့မယ်။ သူတို့ကို ငါ့ကိုယ် ငါ့ဟာ ငါ့ဥစ္စာလို့ နှစ်သက်ခင်မင်ကြင်နာတဲ့ အမေလုပ်သူကို အမြဲနှိပ်စက်တော့မယ်။
နာမ်=အကျိုး၊ အရူး။ ။ နာမ်တရားက ရုပ်မပါပဲ သွားလိုရာကို မသွားနိုင်တော့ ခြေကျိုးလက်ကျိုးပေါ့၊ ကျိုးရတဲ့အထဲ သည်းခြေပျက်ရောဂါက ပါလာသေးတယ်။ သည်းခြေပျက်ဆိုတာ ရူးတာ။ ၀မ်းတွင်းရူးကို ခေါ်တယ်။ သူက ရုပ်နာမ်အနိစ္စတွေကိုပဲ ယောက်ျားမိန်းမထင်လိုထင်၊ သားရယ်သမီးရယ်မြေးရယ် ထင်လိုထင်၊ ဒီလိုထင်နေတော့ သူထင်တဲ့အတိုင်းလိုက်လုပ်ရတာ။ သူ့ ထိန်းကျောင်းရတာမလွယ်ဘူး။ သူ့ အလိုလိုက်ရတာ အားကိုမအားနိုင်ဘူး။ သူကခြေလက်ကလည်းကျိုး၊ အရူးထတာကလည်းခဏခဏ၊ သူ အရူးထတာနဲ့ သားပူ၊ သမီးပူ၊ ဆွေပူ၊ မျိုးပူတွေနဲ့ မအားနိုင်ကြဘူး။ ပြီးတော့ သူက ခြေကျိုးလက်ကျိုးနဲ့ ဟိုဟိုဒီဒီမသွားနိုင်တော့ အမေကပိုချစ်သကိုဗျ။ ပိုချစ်တော့ သက္ကာယဒိဋ္ဌိက သူ့အပေါ်မှာ ပိုစွဲတယ်။ သူကသည်းခြေရူး၊ ၀မ်းတွင်းရူး (၀ိပ္ပလ္လာသ)ဆိုတော့ အချိုပေးလည်း ခါးတယ်ပြောချင်ပြော၊ အချဉ်ကျွေးလဲ ဖန်တယ်ပြောချင်ပြော၊ သူက ကိန်းရာအမေပေးတာနဲ့ တော်ပြီတန်ပြီလို့ မလာနိုင်ဘူး။ ခြေကျိုးလက်ကျိုး ဘယ်မှ မသွားနိုင်တော့ သူ့ပြုစုနေရတာနဲ့ အားကိုမအားနိုင်ဘူး။
သူက ၀မ်းတွင်းရူးဆိုတော့ မျက်လုံးပေါက်က တခုတည်းက တော်ပြီတန်ပြီလို့ကို မရှိဘူး။ နားပေါက်တခုတည်းက တော်ပြီတန်ပြီလို့ကိုမရှိဘူး။ ရေဒီယို အမြဲဖွင့်ပေးရတယ်။ ဒါ နားပေါက်ကို အခွန်ဆက်နေရတာတွေ၊ အချိုကျွေးလဲ ၀မ်းတွင်းရူးက ချိုလွန်းတယ်ဆိုပြီး မစားပြန်တော့ အချိုလျှော့ချက်ရ၊ ကျွေးရတာနဲ့ ၀မ်းတွင်းရူးကို ချစ်တဲ့ပုဂ္ဂိုလ် အားသေးရဲ့လား။ ၀မ်းတွင်းရူးနှိပ်စက်တာ အကုန်ခံရတယ် မဟုတ်လား။ သူကတောင်သွားချင် မြောက်သွားချင်နဲ့ သူသွားချင်ရာကို ပို့နိုင်ရဲ့လား။ သူသွားချင်ရာ လိုက်ပို့ရတော့လဲ နှေးတယ်ပြောလို့ ကားဝယ်ပေးရတယ်။ တခါတလေ ကိစ္စကြီးတယ်ဆိုလို့ လေယာဉ်ပျံနဲ့ သွားရတယ်။ သည်းခြေးပျက် ၀မ်းတွင်းရူး ကြိုက်တာလဲ အကုန်ဝယ်ပေးရတယ်။ အစားဘက်က အ၀တ်ဘက်က ကြိုက်တာဝယ်ပေးရတယ်။ ၀ယ်ပေးလို့ ကြိုက်ရင်းမတ္တနဲ့ သည်းခြေကထလာလို့ ဟာ ... ဒါကြီးက ခေတ်နောက်ကျသွားပြီ မ၀တ်တော့ဘူးလို့ ဆိုချင်ဆိုတာ၊ ကားဝယ်ပေးပြန်လဲ ဒီကားမစီးချင်ဘူး၊ နောက်ဆုံးပေါ်ကားမှ စီးချင်တယ်တဲ့။ နာမ်တရား သည်းခြေရူးက ဘယ်လောက်နှိပ်စက်သတုံး၊ သူ့ကို ခင်တဲ့ မိဘကတော့ နေ့လည်းမအားရ၊ ညလည်းမအားရ။ ရှာဟဲ့၊ ဖွေဟဲ့၊ လုပ်ဟဲ့၊ ကိုင်ဟဲ့ ပြုစုဟဲ့နဲ့ အလုပ်နဲ့ လက်နဲ့ကို မပြတ်ရဘူး။ အမောဆို့ပြီးမှ အိပ်ချလိုက်ရတာပဲ။
သူ့ချစ်တဲ့ ပုဂ္ဂိုလ်ကတော့ အောင့်အည်းသည်းခံပြီး လုပ်ပေတော့။ သူကတော့ ဘယ်တော့မှ အလိုပြည့်တယ် မရှိဘူး။ သူကတော့ အဖိုးကြီးအဖွားကြီးဖြစ်တော့လည်း ချမ်းသာမပေးဘူး။ အဖိုးကြီးခိုင်း အဖွားကြီးခိုင်း ခိုင်းမှာပဲ။ တောင်ဝှေးထောက်ပြီး နင့်မြေးအိမ် သွားပါလား၊ နင်သွားနိုင်တုန်း သွားရတာဆိုပြီး ခိုင်းတယ်။ သည်းခြေပျက်သားကို မွေးမိတဲ့အတွက် ခင်ဗျားတို့ ခုအထိမအားတာ ပီဠနဋ္ဌတဲ့။ သူကတော့ ကိန်းရာသတ္တ၀ါကို ညှာတာမဖက် အမြဲနှိပ်စက်တတ်တယ်။ သေတဲ့အထိ သူကနှိပ်စက်တတ်တယ်။ ဘိုင်းဘိုင်းလဲသေလဲ သူကတော့ အနှိပ်စက်မလျော့ဘူး။ သေလမ်းလဲ သူကပို့မှာပဲ။ မိုးရွာထဲ သွားက။ မိုးရွာတာများ အရေးလုပ်မနေနဲ့။ နေပူလဲ ခိုင်းတာပဲ။ သူခိုးဓားမြတွေ ထူတဲ့နေရာလဲ သွားခိုင်း၊ မြစ်ထဲ ပင်လယ်ထဲ လှိုင်းတွေ ၀ဲတွေရှိလဲ ခိုင်းတာပဲ။
ခင်ဗျားတို့ဟာ ဒီရုပ်နာမ်ကို မွေးထုတ်ပေးတဲ့ အမေဖေတွေပဲ၊ နာမ်ရုပ်ခင်တဲ့လူဆိုတော့ ဒီသည်းခြေရူးအကျိုး နှိပ်စက်သမျှကို ခံကြပေတော့။ နာမ်ဓမ္မအရူးကတော့ အချိန်ရှိသရွေ့ ခိုင်းနေတာပဲ။ သူကရေတိုက်ပါဦး၊ နို့တိုက်ပါဦး၊ ရေတိုက်တော့လဲ ရေနောက်ကြီးမတိုက်ပါနဲ့ ရေကြည်မှတိုက်ပါတဲ့၊ တခါတလေ ရေထဲအဖတ်ပါထည့်ယူခဲ့၊ ဖါလူဒါတို့ပေါ့၊ ရေချည်းမသောက်ချင်ဘူး၊ အဖတ်ပါမှတဲ့၊ သည်းခြေရူးက တောင်းတာ၊ အဲဒီတော့အားသေးရဲ့လား၊ ဥတုသုံးလီအလိုက် သူ့ကို အခွန်ဆက်ပေးရတယ်။ နွေအခွန်ဆက်ရ၊ မိုးအခွန်ဆက်ရ၊ ဆောင်းအခွန်ဆက်ရ၊ လမ်းသွားရင်းများ ဇီဇာကြောင်လိုက်တာ မပြောပါနဲ့၊ ရေတိုက်ပြန်တော့လဲ အို .. ဒီခွက်ကြီးနဲ့ မသောက်ချင်ဘူး၊ ဖန်ခွက်နဲ့မှ သောက်ချင်တယ်ပြောသေး၊ အိမ်မှာ သုံးနေကျပန်းကန်တွေတောင် ဟိုပန်းကန်နဲ့မှ၊ ဒီပန်းကန်နဲ့မှတဲ့၊ ရှုပ်နေတာပဲ။ သုံးနေကျပန်းကန်တွေ အ၀တ်တွေတောင်မှ သည်းခြေရူးထလာတော့ ဒါကြီးက ခေတ်နောက်ကျနေပြီ ခေတ်မရှိတော့ဘူး၊ ခေတ်ဆန်ဆန်မှ ၀တ်ချင်တာဆိုတော့ အိမ်မှာအ၀တ်တွေတပုံကြီးရှိနေတဲ့အထဲက အသစ်ချပ်ချွတ်ဝယ်ပေးတယ်။ မိန်းမတွေပိုဆိုးသေး။ သည်းခြေရူး အလိုကို အလိုက်ဆုံးပဲ။ အ၀တ်အထည်တွေ ဘယ်လောက်များများ သူ့လောဘက မလုံလောက်၊ အရင်ဟာမကြိုက်ဘူး နောက်ဟာဝယ်ပေးဦးလို့ သည်းခြေရူးက တောင်းတိုင်း ၀ယ်ပေးရတာပဲ။ ဘယ်လောက်ဝယ်ပေးပေး သည်းခြေရူးက တော်ပြီတန်ပြီလို့ မလာဘူး။
ဒီလို ပီဠနဋ္ဌော=အမြဲနှိပ်စက်တာကိုသိရင်၊ ပီဠနဋ္ဌတလုံးသဘောကျရင် ခင်ဗျားတို့ ကိစ္စပြီးပါတယ်။ ပီဠနဋ္ဌ = နှိပ်စက်တာကို အလိုအတိုင်းလိုက်ပြီး အလိုက်ပြုစုနေရင်တော့မပြီးဘူး။ ခင်ဗျားတို့က သည်းခြေရူးအကြိုက်အတိုင်း ခိုင်းသလောက်အကုန်ပေးနိုင်တယ်ဆိုတော့ ကျွန်ပီသလို့ပဲ။ မွေးတဲ့သားကလေးက အကျိုးကလေး အရူးကလေးဆိုတော့ ခင်ဗျားတို့က ပိုချစ်ပေါ့ဗျာ။ သူ့ကို ထိန်းကျောင်းရတာ နေ့ရောညပါ အားတယ်လို့ မရှိဘူး။ အလုပ်တွေဟူသမျှ သည်းခြေရူးကြောင့် လုပ်နေရတာချည်းပဲမှတ်။ စာရေးကြီးပဲလုပ်လုပ်၊ တရားသူကြီးပဲလုပ်လုပ်၊ဘာပဲလုပ်လုပ်၊ လုပ်ရတာဟူသရွေ့ သည်းခြေရူးကြောင့် လုပ်ရတာချည်းပဲ။ ခင်ဗျားတို့ သည်းခြေရူးအလို ဖြည့်နေရတာဟာ သူနှိပ်စက်တာကို မသိလို့ပဲ။ မသိလို့ သားဝတ်၊ သမီးဝတ်၊ လင့်ဝတ် မယားဝတ်တွေပြုနိုင်ကြတာပေါ့။ တချို့များ မပြုစုရမှာစိုးလို့တောင် သူများသားသမီးတွေကို လိုက်ရှာပြီး မွေးစားချင်ကြသေးတယ်။ ဒါကြောင့် ပုထုဇဉ်ဆိုတာ အရူးလို့ပြောတာ။
မွေးတဲ့အမေကလည်း သားကျိုး သားရူးဆိုတော့ မစွန့်နိုင်ဘူး၊ မစွန့်ရက်ဘူးပေါ့ဗျာ။ မစွန့်ရက်တဲ့အပြင် ပိုတောင်ချစ်လိုက်သေး အချစ်ဆုံးလေးပေါ့ဗျာ။ ဒီတော့ ဒုက္ခသစ္စာကိုပင်လျှင် သမုဒယသစ္စာက အမြဲချစ်နေတော့ နိရောဓသစ္စာနဲ့ မဂ္ဂသစ္စာဟာ ဘယ်မှာပေါ်နိုင်ပါ့မလဲ။ သူကအမြဲမပြတ် ဒုက္ခပေးနေစေမယ့် သမုဒယရဲ့အပြစ်မမြင်တဲ့အမြင် ပို၍ပင်ချစ်ခင်နေတော့၊ ပီဠနဋ္ဌ=အမြဲနှိပ်စက်နေတဲ့ ဒုက္ခသစ္စာကွယ်နေပြီပေါ့။ ဒုက္ခသစ္စာ၏ ပီဠနဋ္ဌ သဘောကိုသိမှ ဒုက္ခသစ္စာကို ပဋိဝေဓဉာဏ်နဲ့ တကယ့်ကိုသိမှ ၀ိပ္ပလ္လာသ ဆိုတဲ့ အရူးကပျောက်မှာ။ ဒီတော့ ဒီ သည်းခြေရူးက မဂ်ရေစင်တိုက်မှ ပျောက်မယ်။ မဂ်ရေစင် မတိုက်နိုင်ရင် မပျောက်ဘူး။ မဂ်ရေစင်ဟာ သည်းခြေးရူးပျောက်တဲ့ဆေးပဲ။ မဂ်မှ တပါး သည်းခြေရူး ၀မ်းတွင်းရူးပျောက်တဲ့ဆေးမရှိဘူး။ မဂ်ကမှ ၀ိပ္ပလ္လာသ ပယ်နိုင်တာ။ ဒီသည်းခြေရူးကို ၀ိပဿနာဉာဏ်တွေကတောင် မပယ်နိုင်ဘူး။ ဒါကြောင့် ဘုရားက မဂ်မရသေးသမျှ မဂ်မရသေးတဲ့ ပုထုဇဉ်ဟူသမျှ ဥမ္မတ္တက-အရူးချည်းပဲလို့ဟောတာ။
ရုပ်-အကန်း၊ လူနာ။ ။ ရုပ်နာမ်အမွှာပူးထဲက နောက်တယောက်က ရုပ်တရားပေါ့။ သူကမျက်စိနှစ်ကွင်းအလင်းမရတဲ့ အကန်း။ ပြီးတော့ သူငယ်နာဝမ်းပျက်ကပါသေး၊ ဒီတော့ ရုပ်တရားဟာ အကန်းလူပမာပေါ့။ ဒီတော့ သူခိုင်းသမျှ အလိုကျပြုစုရုံပဲပေါ့။ ဓာတ်ကြီးလေးပါးဟာ ဘယ်တော့ညီညွှတ်တယ် မရှိဘူး။ အမြဲပျက်နေတာပဲ၊ ပထ၀ီဓာတ်ပျက်တော့ ၀မ်းလျှောတာပေါ့။ ပထ၀ီဓာတ်ခိုင်နေရင် ၀မ်းချုပ်တာပေါ့။ ရုပ်အကန်းလေးဆိုတော့ သူ့ခင်တဲ့အမေကိုပဲ ခိုင်းမှာပဲ။ အမေ့တာဝန်ချည်းပဲ။ ဗိုက်ထဲက ဘာဖြစ်မှန်းမသိဘူး။ ၀မ်းလျှောတော့ အမေကကြုံးရမှာပဲ။ ရေတောင်းလည်းပေး၊ ထမင်းတောင်းလည်းပေး။ အ၀တ်တောင်းလည်းပေး။ ချမ်းတယ်ဆို အ၀တ်ထူထူထုတ်ပေး။ အိုက်လှချီရဲ့ဆို အပါးထည်လဲပေးရ၊ ခင်တဲ့ပုဂ္ဂိုလ်က သူခိုင်းတာကို ခြွင်းချက်မရှိ အကုန်လုပ်ပေးရတယ်။ သူ့ ၀မ်းပျက်ဝေဒနာကလည်း ခဏ ခဏ၊ ကျင်ကြီးစွန့်ရသေး၊ ခင်တဲ့ပုဂ္ဂိုလ်က ကြုံးသာကြုံးမညည်းနဲ့။ မွေးမိတာကိုး။
ရုပ်တရားကြီးကို တော်တော်ကြာ နဖူးစမ်းရ၊ ခြေဖျားစမ်းရ၊ လက်ဖျားစမ်းရ၊ ခြေလက်ကောင်းပေမယ့် အကန်းဖြစ်နေတော့၊ ဟိုဟာနဲ့တိုက်မိ၊ ဒီဟာနဲ့တိုက်မိ၊ ဒီတော့ အမေက ပတ်တီးစီးပေးရတယ်။ ခလုတ်မထိဆူးမငြိပါစေနဲ့ ဆုတောင်းပေမယ့် သူကအကန်းဆိုတော့ တိုက်ချင်တိုက် လဲချင်ရာလဲလိုက်တာပဲ။ ရုပ်ဓမ္မထုံးစံက ဖောက်ပြန်ချင်သလို ဖောက်ပြန်တော့၊ သူ့ခင်တဲ့လူ သူခိုင်းသမျှ လုပ်ပေးပေရော့။ နှိပ်စက်တဲ့သား သွားရော့ကွာလို့ နှင်ထုတ်ဖို့ကောင်းတယ်။ ဒါပေမယ့် မနှင်ထုတ်နိုင်ဘူး။ ပီဠနဋ္ဌ သဘောမကျလို့။ ပီဠနဋ္ဌသဘောမကျရင် ပြုစုမြဲတိုင်းရှိသေပေတော့။ ၀တ်မပျက်ကြစေနဲ့။ သစ္စာသိဆိုတာ သည်ကျအောင်သိမှ အဖိုးတန်တာ။
ရုပ်နာမ် ။ ။ သစ္စာအနက် ၁၆-ချက်ထဲက ပီဠနဋ္ဌ=ညှာတာမဖက် အမြဲနှိပ်စက်တတ်တဲ့ တစ်နံပါတ်ကို သဘောကျရင် ကျန်တာအကုန်သဘောကျတယ်။ အခုခန္ဓာကိုယ်ကြီးဟာ အကောင်းတခုမှ မပါဘူး။ ရှိတာက ရုပ်နဲ့ နာမ်ပဲရှိတယ်။ ရုပ်ဓမ္မက မျက်စိကန်းတာရယ်၊ သူငယ်နာဝမ်းပျက်တာရယ်၊ နာမ်ဓမ္မကတော့ ခြေကျိုး၊ လက်ကျိုး၊ ၀မ်းတွင်းရူး။ ခန္ဓာကြီးဟာ ဒီ ၂-ခုပေါင်းထားတာပဲ။ ပေါင်းမိတော့ ခက်တာပဲ။ အကုန်ပြုစုပေးနိုင်ဖို့မလွယ်ဘူး။ မပေါင်းခင်တုန်းက တခုစီဆို ပြုနိုင်ဦးမယ်။ အခုတော့ ဒီသည်းခြေရူးအလိုလိုက်ရ၊ ဟိုဘက်ကသူငယ်နာဝမ်းပျက် သွားကြုံလိုက်ရ။ ရုပ်နာမ်အစု ခန္ဓာကြီးဖြစ်ရပါလို၏ဆိုတော့ ၂-ယောက်မွေးပါရစေလို့ ဆုတောင်းတာပဲ။ အခုတော့ အကျိုးနဲ့အကန်းဆုံမိပြီ။ တယောက်မှ အကောင်းမပါဘူး။ ကိုယ်ရ-ထားတဲ့ ခန္ဓာကြီးနော်။ ကျိုးရကန်းရတဲ့အထဲ သည်းခြေရူးနဲ့ ၀မ်းပျက်ကပါလိုက်သေး။ ဆုတောင်းပြည့်ထားတဲ့ သားနှစ်ယောက်ကဖြင့် တယောက်မှ ကောင်းကျိုးမပေးဘူး။ အမြဲနှိပ်စက်နေတာပဲ။ ဒါပေမယ့် ခင်ဗျားတို့မှာတော့ အသက်ကြီးတောင် နောင်တမရသေးဘူး။ သည်းခြေပျက်=၀မ်းပျက် ၀မ်းတွင်းရူးကလည်း သေသည်အထိရူးမှာ၊ သူငယ်နာဝမ်းပျက်ကလည်း သေအောင်ပျက်မှာပဲ။ ခင်ဗျားတို့က နှိပ်စက်မှာချည်း ဆုတောင်းယူတယ်။ နိဗ္ဗာန်မရမီစပ်ကြား ဒီ အကျိုးနဲ့ ဒီ အကန်းနဲ့ တွေ့ရြုကုံရဆုံရပါလို၏ဆိုတော့ ဒါ သစ္စာမသိလို့တောင်းကြတာ။ ပီဠနဋ္ဌ၏ ကြောက်စရာကောင်းပုံကို သိရင် တော်ပြီတန်ပြီကွလို့ လာမှာပဲ။
အခုတော့ အကျိုးနဲ့ အကန်းကိုပဲ ခင်ဗျားတို့ ဆုတောင်းယူကြတယ်။ ရုပ်နာမ်ဆိုတဲ့ အကျိုးနဲ့ အကန်းပေါင်းမိတော့ သွားချင်တဲ့နေရာသွားမှာပဲ။ တယောက်က အပေါ်ကလမ်းပြ၊ တယောက်က အောက်ကသွား။ ၃၁-ဘုံမှာ အကုန်လျှောက်သွားမှာပဲ။ အရမ်းသွားမှာပဲ။ အရမ်းသွားတော့ အမေဖြစ်သူက ရုပ်အလိုလိုက်ရ၊ နာမ်အလိုလိုက်ရနဲ့ အပါယ်လေးပါးဒယ်အိုးထဲဆင်းလိုက်ရတာပဲ။ ဒီသားဆိုးနှစ်ယောက်နှိပ်စက်တာ မသိတော့ ၃၁-ဘုံအတွင်း အကောင်းအဆိုးမရွေးနဲ့တော့။ တို့နေရာချည်းပဲသာ မှတ်ပေတော့။ ကျင်ကြီးပုံလည်း တို့နေရာ။ ရေပုပ်ထဲလည်း တို့နေရာ၊ ပိုးလောက်ဖြစ်ရဦးမှာကိုး။
အိပ်ရာထဲရောက်ရင် ဟိုဟာ စိတ်ကူး ဒီဟာ စိတ်ကူး။ သားကူး သမီးကူး ဆွေကူး မျိုးကူးနဲ့ စုံလို့ပေါ့။ ဒီစိတ်ကူးတွေဟာ ဘာတုံး၊ သည်းခြေရူးထနေတာ။ မနက်မိုးလင်းတော့ ညကအရူးထ ထားတဲ့အတိုင်း နှစ်ယောက်ပေါင်းပြီး ကားနဲ့ ဟိုသွားလိုက် ဒီသွားလိုက်နဲ့။ ခြေလျင်ပြေးလိုက်နဲ့။ ခင်တဲ့အမေကတော့ ဘေးကင်းမှကင်းပါ့မလားနဲ့ စိုးရိမ်နေရတာပဲ။ သည်းခြေရူးကလည်း မဟုတ်တာမှ ကြိုက်တာ။ စီးပွားရှာမယ်ဆို ဘယ်သွားရသွားရ၊ သေချင်သေပစေ သူကကြိုက်တယ်။ သစ္စာတရားတွေဟောရင် သူကမကြိုက်ဘူး။ ရုပ်ကလည်း သားဆိုး၊ နာမ်ကလည်း သားဆိုး၊ ဒီတော့ သားဆိုးအမေ တပေပေပေါ့။ သူတို့က သေသည်အထိနှိပ်စက်မှာ၊ ဒီတော့ သေသည်အထိ သူ့ဒဏ်ခံပေါ့။ ဒုက္ခခံပေါ့။ ဆုတောင်းခဲ့တာကိုး။ ဒီလောက် မညှာမတာ အမြဲနှိပ်စက်နေသောကြောင့် ရုပ်နာမ်ဓမ္မကဖြင့် ဒုက္ခသစ္စာအစစ်ပါပဲ။
ဝိပဿနာကုသိုလ်က ကျေးဇူးပြုလိုက်တဲ့ မဂ်ကုသိုလ်ကျမှ ရုပ်ရော၊ နာမ်ရော ဒုက္ခသစ္စာဆိုတာ သဘောကျတာ။ ဆရာသမားကောင်းက ဟောတဲ့တရားတွေ မနာရသရွေ့ ဒီရုပ်နာမ်က နှိပ်စက်နေ ဒုက္ခပေးနေတယ်လို့ မထင်ဘူး။ မသိဘူး။ နှိပ်စက်နေမှန်းမသိလို့ ခင်ဗျားတို့ခင်နေတာ၊ လိုချင်နေတာ၊ သိရင်မခင်တော့ဘူး။ မလိုချင်တော့ဘူး။ နှိပ်စက်မှန်း သိတာက မဂ်ဉာဏ်။ နှိပ်စက်မှန်းသိလို့ မလိုချင်ရင်၊ ယခင်က သူ့ခင်နေတဲ့ အမေဖြစ်တဲ့တဏှာကသေသွားတယ်။ ဒီ တဏှာ အမေသေသွားတဲ့အခါ သားဆိုး ၂-ယောက်လည်း ပြုစုပေးမယ့် သူမရှိတော့ သူတို့လည်း နောက်ဆုံး သေကြရတော့မှာပဲ။ သားဆိုး ၂-ဦးသေတော့ ဒုက္ခချုပ်ငြိမ်းသွားတာပေါ့။ ဒီတော့ ဒုက္ခချုပ်ငြိမ်း ထာဝရအေးငြိမ်းတဲ့ နိဗ္ဗာန်ဆိုတာ ရောက်သွားမှာပဲ။
မိုးကုတ် ဆရာတော်ဘုရားကြီး ၏ သြ၀ါဒတရားများ
(သစ္စာအနက် ၁၆-ချက်တရားတော်များမှ၊)
No comments:
Post a Comment